କନକ ବ୍ୟୁରୋ : ଆଖୁ ଚାରା ପ୍ରସ୍ତୁତ ଠାରୁ ରୋପଣ ପର୍ଯ୍ୟନ୍ତ । ଅମଳ ଠାରୁ ଗୁଡ଼ ପ୍ରସ୍ତୁତି କରିବା ପର୍ଯ୍ୟନ୍ତ ସବୁ କିଛି ଚାଲିଛି ଗୋଟିଏ ସ୍ଥାନରେ । ଏପରିକି ଚାଷୀଙ୍କ ଠାରୁ ଆଖୁ କିଣି ଏହି ସ୍ଥାନରେ ଗୁଡ଼ ପ୍ରସ୍ତୁତି କରାଯାଉଛି । ଆନ୍ଧ୍ର ଅପେକ୍ଷା ଏଠାରେ ଆଖୁ ବିକ୍ରି କରି ଚାଷୀ ଅଧିକ ଲାଭବାନ ହେଉଛନ୍ତି । ଏଭଳି କିଛି କାମ କରି ଆଖୁ ଚାଷୀଙ୍କ ମୁହଁ ହସ ଫୁଟାଇଛନ୍ତି କୋରାପୁଟ କୋଟପାଡ଼ ଅଂଚଳର ସନ୍ତୋଷ ମିଶ୍ର । ଜଣେ ସଫଳ ଉଦ୍ୟୋଗୀ ଭାବେ ମଧ୍ୟ ସେ ବେଶ ନାଁ କରିଛନ୍ତି । ବର୍ଷକୁ ୭୦ରୁ ୮୦ ଲକ୍ଷ ଟଙ୍କା ବ୍ୟବସାୟ ହେଉଥିବା ବେଳେ ୧୫୦ରୁ ୨୦୦ ଲୋକଙ୍କୁ ରୋଜଗାର ଯୋଗାଇଛନ୍ତି । ଚାକିରି ଛାଡ଼ି ଆଖୁ ଚାଷ ଆପଣାଇଥିଲେ ସନ୍ତୋଷ । ଦୀର୍ଘ ୨୮ ବର୍ଷ ହେଲା ସେ ଏହି କାମ କରୁଛନ୍ତି । ଏଥିପାଇଁ ତାଙ୍କୁ ଜିଲ୍ଲା ଓ ରାଜ୍ୟ ଭିତରେ ଅନେକ ପୁରସ୍କାର ମିଳିଛି । ବର୍ତମାନ ସେ ରାଜ୍ୟର ୧୭ଟି ଜିଲ୍ଲାର ଚାଷୀଙ୍କୁ ନିଜର ଆଧୁନିକ ପ୍ରଣାଳିରେ ହେଉଥିବା ବିହନ ଯୋଗାଇବା ସହ ତାଲିମ ମଧ୍ୟ ଦେଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସନ୍ତୋଷଙ୍କର ଏହି ଉଦ୍ୟୋଗ ପାଇଁ ଚାଷୀଙ୍କୁ ଆଉ ଆଖୁ ବିକ୍ରୀ ପାଇଁ ଅପେକ୍ଷା କରିବାକୁ ପଡ଼ୁନାହିଁ କି ଆନ୍ଧ୍ର ଉପରେ ନିର୍ଭର କରିବାକୁ ପଡ଼ୁନାହିଁ । ଏବେ ଏହି ସବୁ ସୁବିଧା ଗୋଟିଏ ସ୍ଥାନରେ ମିଳୁଛି । ଚାଷୀ ମାନେ ସନ୍ତୋଷଙ୍କ ଠାରୁ ଚାରା କିଣି ନିଜ ଅଂଚଳରେ ଚାଷ କରୁଛନ୍ତି । ବିକ୍ରି ବି ସହଜରେ କରିପାରୁଛନ୍ତି ।
ଦେଖନ୍ତୁ ଏହି ଦୃଶ୍ୟକୁ.. କିଏ ସଂଗୃହିତ ଆଖୁକୁ ଆଧୁନିକ ମେସିନରେ ପେଡ଼ୁଛି ତ ଆଉ କିଏ ଗୁଡ଼ ପ୍ରସ୍ତୁତ କରୁଛି । ପୁଣି କିଏ ଡ଼ବାରେ ଭର୍ତି କରୁଛି । ଏହି ସବୁ କାମ କରୁଥିବା ଲୋକମାନେ ହେଉଛନ୍ତି ଉତରପ୍ରଦେଶର । ସାଧାରଣତଃ ଆମ ରାଜ୍ୟ ଲୋକମାନେ ବାହାର ରାଜ୍ୟକୁ କାମ କରିବାକୁ ଯାଉଥିବା ବେଳେ ଉତରପ୍ରଦେଶରୁ ମଧ୍ୟ ଲୋକମାନେ ଆସି ଆମ ରାଜ୍ୟରେ କାମ କରୁଛନ୍ତି । ପରିବାର ସହ ଆସି ଏଠାରେ ୪ରୁ ୫ ମାସ କାମ କରିବା ପରେ ପୁଣି ବର୍ଷା ଦିନ ଆସିଲେ ନିଜ ଭିଟାମାଟିକୁ ଫେରିଯାଆନ୍ତି ।
ଆଖୁ..ଏକ ଅର୍ଥକାରୀ ଫସଲ ହୋଇଥିବା ବେଳେ ଏହି ଚାଷ କରି ଅନେକ ଚାଷୀ ଲାଭବାନ ହେଉଛନ୍ତି । ତେବେ କୋରାପୁଟ ଜିଲ୍ଲାର ଜଳବାୟୁ ଏହି ଚାଷ ପାଇଁ ବେଶ ଉପଯୋଗୀ ହୋଇଥିବା ବେଳେ ସନ୍ତୋଷଙ୍କ ଉଦ୍ୟୋଗ ଅନେକ ଚାଷୀଙ୍କ ମୁହଁରେ ହସ ଫୁଟାଇଛି ।