କନକ ବ୍ୟୁରୋ : ବିଜେପି ନେତା ସୁବ୍ରମଣ୍ୟମ୍ ସ୍ୱାମୀ ଗୃହମନ୍ତ୍ରୀ ଅମିତ୍ ଶାହାଙ୍କ ପରେ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ କଟାକ୍ଷ କରିଛନ୍ତି । ଏଥର ସେ ଚୀନ ପ୍ରସଙ୍ଗରେ ନିଜ ସରକାରଙ୍କୁ ଘେରିଛନ୍ତି । ସୁବ୍ରମଣ୍ୟମ୍ ସ୍ୱାମୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଆମେରିକା ଗସ୍ତକୁ ନେଇ ଏକ ଟ୍ୱିଟ୍ କରିଛନ୍ତି । ଏହି ଟ୍ୱିଟ୍ ମାଧ୍ୟମରେ ସେ କହିଛନ୍ତି କି, ଚୀନ ଲଗାତର ଭାବେ ଭାରତ ବିରୋଧରେ କଠୋର ହେଉଛି । ଏହା ପରେ ବି ଆମେରିକା ଚୀନ ବିରୋଧରେ ପଦୁଟିଏ କହିବାକୁ ସାହାସ କରୁନାହିଁ । ଏହି କାରଣରୁ ପ୍ରଧାନମନ୍ତ୍ରୀଙ୍କ ଖାଲି ହାତରେ ଆମେରିକାରୁ ଫେରିବାକୁ ପଡିବ ।
ସବୁବେଳେ ନିଜର ବିବଦୀୟ ବୟାନକୁ ନେଇ ବିଜେପି ନେତା ସୁବ୍ରମଣ୍ୟମ୍ ସ୍ୱାମୀ ଚର୍ଚ୍ଚାରେ ଥାନ୍ତି । ଏବେ ସେ ତାଙ୍କ ଟ୍ୱିଟରେ ଇକୋନୋମିଷ୍ଟ ମାଗାଜିନର ସାମ୍ନା ପେଜକୁ ଛାପିଛନ୍ତି । ଏହି ଫଟୋରେ ଆମେରିକାର ରାଷ୍ଟ୍ରପତି ଜୋ ବାଇଡେନଙ୍କୁ ବାଘ ସହିତ ଦେଖିବାକୁ ମିଳିଛି । ଏହାସହ ସେ ଲେଖିଛନ୍ତି କି ଚୀନ ଲଦାଖର ୪୦୨୬ ବର୍ଗକିଲୋମିଟର ଦଖଲ କରିସାରିଛି । ଏତେବଡ ସମ୍ବେଦନଶୀଳ ପ୍ରସଙ୍ଗରେ ବାଇଡେନ ଚୀନ ବିରୋଧରେ ପଦୁଟିଏ ମଧ୍ୟ କହିନାହାଁନ୍ତି । ହେଲେ ପ୍ରଧାନମନ୍ତ୍ରୀ ଯେଭଳି ଭାବେ ଆମେରିକା ପ୍ରଶଂସାରେ ଶତମୁଖ ହୋଇଛନ୍ତି ସେହି କାରଣରୁ ମୋଦୀଙ୍କୁ ଖାଲି ହାତରେ ଦିଲ୍ଲୀ ଫେରିବାକୁ ପଡିବ ବୋଲି ସେ କହିଛନ୍ତି ।
Modi is returning to Delhi empty handed in strategic gains. No mention by US of Chinese aggression against India despite 4026 sq kms of Ladakh gobbled by China. The Economist in a tongue in cheek front page picture, represents taming of Modi tiger by BIden. So don’t be fooled.
— Subramanian Swamy (@Swamy39) June 22, 2023
ସୂଚନା ଥାଉକି ପ୍ରଧାନମନ୍ତ୍ରୀ ମୋଦୀ ୩ଦିନିଆ ଆମେରିକା ଗସ୍ତରେ ଅଛନ୍ତି । ଗସ୍ତର ପ୍ରଥମ ଦିନରେ ସେ ଜାତିସଂଘ କାର୍ଯ୍ୟାଳୟରେ ଆୟୋଜିତ ଯୋଗ ଦିବସରେ ସାମିଲ ହୋଇଥିଲେ । ଏହାପରେ ସେ ଆମେରିକାର ରାଷ୍ଟ୍ରପତି ବାଇଡେନଙ୍କ ସହ ଭେଟ କରିଥିଲେ । ସେପଟେ କିଛିଦିନ ପୂର୍ବରୁ ସୁବ୍ରମଣ୍ୟମ୍ ସ୍ୱାମୀ ଗୃହମନ୍ତ୍ରୀ ଅମିତ ଶାହାଙ୍କୁ ଟାର୍ଗେଟ କରିଥିଲେ । ଏନେଇ ସେ ଏକ ଟ୍ୱିଟରେ ଲେଖିଥିଲେ କି ମଣିପୁରରେ ରାଷ୍ଟ୍ରପତି ଶାସନ ଲାଗୁ କରିବା ଦରକାର ।