ମୁଖ୍ୟମନ୍ତ୍ରୀଙ୍କ ବିରୁଦ୍ଧରେ ଲଢନ୍ତୁ ଧର୍ମେନ୍ଦ୍ର । ଟିକେଟ କଟିବା ପରେ ସୋସିଆଲ ମିଡିଆରେ ସୁବାସଙ୍କ ଶାଣିତ ସ୍ୱର ।
୨୦୧୯ ପାଇଁ ଦଳ ନିର୍ଦ୍ଦେଶ ଦେଲେ ସେ ଲଢିବାକୁ ପ୍ରସ୍ତୁତ ଥିବା ବାରମ୍ବାର ପୂର୍ବରୁ ଗଣମାଧ୍ୟମକୁ କହିଥିଲେ । କିନ୍ତୁ ଏଯାଏଁ ଧର୍ମେନ୍ଦ୍ର ନିଜ ପାଇଁ ଆସନଟିଏ ରଖିନାହାନ୍ତି । ଆଉ ଏହି ଦୁର୍ବଳତମ ଦିଗକୁ ଟାର୍ଗେଟ କରି ସୁବାସ ଚୈହ୍ୱାନ ନିଜ ମନରେ ଥିବା କ୍ରୋଧକୁ ପରିପ୍ରକାଶ କରିଥିବା ଅନୁମାନ କରାଯାଉଛି ।
ଶେଷରେ ସୁବାସ ଚୈହ୍ୱାନ ସେଇକଥା କହି ଦେଇଛନ୍ତି, ଯାହା ରାଜ୍ୟ ବିଜେପି ସଂଗଠନରେ ପ୍ରକାଶ କରିବା ପାଇଁ କେହି ସ୍ୱପ୍ନରେ ସୁଦ୍ଧା ଚିନ୍ତା କରିପାରନ୍ତି ନାହିଁ । ଓଡିଶାରେ ଦଳର ଚେହେରା ଧର୍ମେନ୍ଦ୍ର ପ୍ରଧାନଙ୍କ ବିରୁଦ୍ଧରେ ଖୋଲାଖୋଲି ମତ ରଖିଛନ୍ତି, ଏପରିକି କେନ୍ଦ୍ରମନ୍ତ୍ରୀଙ୍କୁ ଆହ୍ୱାନ ଦେଇଛନ୍ତି, ୨୦୧୯ରେ ମୁଖ୍ୟମନ୍ତ୍ରୀଙ୍କ ବିରୁଦ୍ଧରେ ବିଜେପୁରରୁ ନିର୍ବାଚନ ଲଢିବାକୁ ।
Kanak News is now on WhatsApp
Join and get latest news updates delivered to you via WhatsApp
୨୦୧୪ରେ କେନ୍ଦ୍ରମନ୍ତ୍ରୀ ଭାବେ ଦାୟିତ୍ୱ ଗ୍ରହଣ କରିବା ଦିନରୁ ରାଜ୍ୟରେ ସଂଗଠନ ଉପରେ ନିଜର ଅଧିକାର ସାବ୍ୟସ୍ତ କରି ଆସୁଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଯଦିଓ ସଭାପତି ଚଉକିରେ ବସନ୍ତ ପଣ୍ଡା ବସିଛନ୍ତି, ହେଲେ ସେ କେବଳ ନାମକୁ ମାତ୍ର । ଏକଥା କାହାକୁ ଅଛପା ନାହିଁ ଯେ, ରାଜ୍ୟ ବିଜେପିରେ ଧର୍ମେନ୍ଦ୍ର ପ୍ରଧାନଙ୍କ ବିନା ଅନୁମତିରେ ପତ୍ର ବି ହଲେନି । ମାତ୍ର ଟିକେଟ ଚୟନ ଓ ପ୍ରାର୍ଥୀ ତାଲିକା ଘୋଷଣାର ପରବର୍ତ୍ତୀ ପର୍ଯ୍ୟାୟରେ କେନ୍ଦ୍ରମନ୍ତ୍ରୀଙ୍କ ବିରୁଦ୍ଧେରେ ଧୀରେ ଧୀରେ ଅସନ୍ତୋଷ ଦାନା ବାନ୍ଧୁଛି ।
୨୦୧୯ ପାଇଁ ବରଗଡରୁ ସାଂସଦ ପ୍ରାର୍ଥୀ ହେବାକୁ ଆଶା ରଖିଥିଲେ ବରିଷ୍ଠ ନେତା ସୁବାସ ଚୈହ୍ୱାନ । ଆଶା ରଖିବା ମଧ୍ୟ ସ୍ୱାଭାବିକ, କାରଣ ୨୦୧୪ରେ ସେ ୧୧ ହଜାର ଭୋଟରେ ପରାସ୍ତ ହୋଇଥିଲେ । ହେଲେ ବିଜେପି ତାଙ୍କୁ ଟିକେଟ ଦେଲାନାହିଁ । ତାଙ୍କ ସ୍ଥାନରେ ସୁରେଶ ପୁଜାରୀଙ୍କୁ ବରଗଡ ଲୋକସଭା ନିର୍ବାଚନ ମଣ୍ଡଳୀ ପାଇଁ ପ୍ରାର୍ଥୀ କରିଦେଲା ଦଳ । ଯାହା ପୂରା ସମୀକରଣକୁ ବିଗାଡିଦେଲା । ଅସନ୍ତୁଷ୍ଟ ହେଲେ ସୁବାସ, ଆଉ ତାଙ୍କୁ ରାଜ୍ୟ ଉପସଭାପତି କରି ଦଳ ମାନଭଂଜନ କରିବାକୁ ଚେଷ୍ଟା କଲା । ହେଲେ ଏଥିରେ ସୁଫଳ ମିଳିଲା ନାହିଁ ।
ମୁଁ ରାଷ୍ଟ୍ରୀୟ ସ୍ୱୟଂସେବକ ସଂଘର ପ୍ରଚାରକ ଭାବରେ ଦୀର୍ଘ ୩୦ ବର୍ଷ ଧରି ରାଷ୍ଟ୍ରସେବା କରିବାର ସୁଯୋଗ ପାଇଛି । ପରେ ବିଜେପିରେ ଯୋଗଦାନ କରି ୨୦୧୪ର ଲୋକସଭା ନିର୍ବାଚନ ଲଢ଼ି ଓଡ଼ିଶାର ବିଜେପି ପ୍ରାର୍ଥୀ ମାନଙ୍କ ଭିତରେ ସର୍ବାଧିକ ୩,୭୨,୦୦୦ ଭୋଟ ଦେଇ ଲୋକେ ସମର୍ଥନ କଲେ । ମୁଁ ନିର୍ବାଚନ ହାରିଲା ପରେ ମଧ୍ୟ ଲଗାତାର ୫ବର୍ଷ ପରିଶ୍ରମ କରି ବରଗଡ଼ ଲୋକସଭା ନିର୍ବାଚନ ମଣ୍ଡଳୀର ଜନତାଙ୍କର ସୁଖ ଦୁଃଖର ସାଥୀ ହେଲି । ବିଜେପିକୁ ଅକୁଣ୍ଠ ସମର୍ଥନ ଦେବାପାଇଁ ବରଗଡ଼ ଲୋକସଭା ବାସୀ ଏଥର ପ୍ରସ୍ତୁତ ହେଉଥିବା ବେଳେ ମୋର ବରଗଡ଼ ଲୋକସଭା ଟିକଟ କାଟି ଦିଆଗଲା ।
ସୁବାସ ଚୈାହାନ, ବିଜେପି ନେତା
ସୁବାସ ଚୈାହାନଙ୍କ ଏହି ପ୍ରତିକ୍ରିୟା ସ୍ପଷ୍ଟ ପ୍ରମାଣିତ କରୁଛି, ତାଙ୍କ ଟିକେଟ କଟିବାକୁ ସେ ସହଜରେ ଗ୍ରହଣ କରିବାକୁ ପ୍ରସ୍ତୁତ ନୁହଁନ୍ତି । ଏପରିକି ତାଙ୍କ କର୍ମୀଙ୍କୁ ଧମକ ଚମକ ଦେଉଥିବା ଭଳି ସାଂଘାତିକ ଅଭିଯୋଗ ଆଣିଛନ୍ତି ଏହି ବରିଷ୍ଠ ନେତା । ଆଉ ନିଜ ଫେସବୁକ ପୋଷ୍ଟର ଶେଷ ଆଡକୁ ଯେଉଁ କିଛି ଉକ୍ତି ସେ ରଖିଛନ୍ତି, ତାହା ରାଜ୍ୟ ବିଜେପିରେ କମ୍ପନ ସୃଷ୍ଟି କରିବ ବୋଲି ଅନୁମାନ କରାଯାଉଛି ।
ଜନସାଧାରଣଙ୍କ ଭିତରେ ଏହାର ତୀବ୍ର ପ୍ରତିକ୍ରିୟା ତଥା ସମାଲୋଚନା ହେଲା । ପାର୍ଟିର ବରିଷ୍ଠ ନେତାମାନେ ମୋର କାର୍ଯ୍ୟକର୍ତ୍ତା ତଥା ଜନତାଙ୍କୁ ଧମକ ଚମକ ଦେଲେ । ଯାହାବି ହେଉ ପାର୍ଟି ଚାପର ବଶବର୍ତ୍ତୀ ହୋଇ ମତେ ପ୍ରଦେଶର ଉପସଭାପତି ଦାୟିତ୍ୱ ଦେଲା ଏବଂ ବିଜେପୁର ବିଧାନସଭା ନିର୍ବାଚନ ଲଢ଼ିବା ପାଇଁ ନିର୍ଦ୍ଦେଶ ଦେଲା । କିନ୍ତୁ ବିଜେପୁରରେ ରାଜ୍ୟର ମୁଖ୍ୟମନ୍ତ୍ରୀ ଲଢ଼ୁଥିବା କାରଣରୁ ଧର୍ମେନ୍ଦ୍ର ବାବୁଙ୍କ ଭଳି ଜଣେ ବିତ୍ତଶାଳୀ,ଶକ୍ତିଶାଳୀ ଲୋକ ନିର୍ବାଚନ ଲଢ଼ିବା ପାଇଁ ପ୍ରସ୍ତାବ ଦେଇଥିଲି ।
ସୁବାସ ଚୈାହାନ, ବିଜେପି ନେତା
ଅର୍ଥାତ୍ ବରଗଡରୁ ଟିକେଟ କାଟି ବିଜେପୁରରୁ ସୁବାସ ଚୈାହାନଙ୍କୁ ଲଢାଇବାକୁ ଅଙ୍କ କଷିଥିଲା ବିଜେପି । ହେଲେ ଏଥିରେ ରାଜି ହେବା ଭଳି ଲାଗୁ ନାହାନ୍ତି ସୁବାସ । ସଫା ସଫା ଶୁଣାଇ ଦେଇଛନ୍ତି, ଧର୍ମେନ୍ଦ୍ର ପ୍ରଧାନ ମୁଖ୍ୟମନ୍ତ୍ରୀଙ୍କ ବିରୁଦ୍ଧରେ ନିର୍ବାଚନ ଲଢନ୍ତୁ । ଏହା ବିଜେପି ଭିତରେ ଜଳୁଥିବା ବିଦ୍ରୋହର ଗୋଟିଏ ଅଂଶ, ଯାହା ଧର୍ମେନ୍ଦ୍ରଙ୍କ କର୍ତ୍ତୃତ୍ୱ ଉପରେ ପ୍ରଶ୍ନବାଚୀ ସୃଷ୍ଟି କରିଛି ।
ବିଜେପୁରରେ ରାଜ୍ୟର ମୁଖ୍ୟମନ୍ତ୍ରୀ ନିର୍ବାଚନ ଲଢୁଥିବାରୁ ତାଙ୍କ ବିରୁଦ୍ଧରେ ଧର୍ମେନ୍ଦ୍ର ପ୍ରଧାନଙ୍କ ଭଳି ବିତ୍ତଶାଳୀ ଓ ଶକ୍ତିଶାଳୀ ଲୋକ ନିର୍ବାଚନ ଲଢିବାକୁ ସେ ପ୍ରସ୍ତାବ ଦେଇଥିବା ସୁବାସ ନିଜ ଫେସବୁକ ପୋଷ୍ଟରେ ଉଲ୍ଲେଖ କରିଛନ୍ତି । ଧର୍ମେନ୍ଦ୍ର ଏବେ ମଧ୍ୟପ୍ରଦେଶରୁ ରାଜ୍ୟସଭା ସାଂସଦ ଥିବା ବେଳେ ୨୦୧୯ରେ ନିର୍ବାଚନ ଲଢିବେ ନାହିଁ ବୋଲି ଏକପ୍ରକାରର ସୂଚନା ମିଳିଛି । କାରଣ ବର୍ତ୍ତମାନ ପର୍ଯ୍ୟନ୍ତ ଜାରି ହୋଇଥିବା ତାଲିକାରେ ଧର୍ମେନ୍ଦ୍ରଙ୍କ ନାଁ ନାହିଁ ।
୨୦୧୯ରେ ଅନେକ କେନ୍ଦ୍ରମନ୍ତ୍ରୀ ନିର୍ବାଚନ ମୈଦାନକୁ ଓହ୍ଲାଇଥିବା ବେଳେ ଓଡିଶାରୁ କେନ୍ଦ୍ରମନ୍ତ୍ରୀ ଥିବା ଜୁଏଲ ଓରାମ ସୁନ୍ଦରଗଡରୁ ନିର୍ବାଚନ ଲଢିବେ । ହେଲେ ଧର୍ମେନ୍ଦ୍ର ପ୍ରଧାନଙ୍କ ନାଁ କିନ୍ତୁ ଏଯାଏଁ ତାଲିକାରେ ସାମିଲ ହୋଇନାହିଁ । ୨୦୦୦ ରୁ ୨୦୦୯ ମଧ୍ୟରେ ବିଜେଡି-ବିଜେପି ମେଂଟ ବେଳେ ଥରେ ବିଧାୟକ ଓ ଥରେ ସାଂସଦ ଭାବେ ନିର୍ବାଚିତ ହୋଇଥିଲେ ଧର୍ମେନ୍ଦ୍ର । ହେଲେ ୨୦୦୯ରେ ମେଂଟ ଭାଙ୍ଗିବା ପରେ ସେ ପାଲଲହଡାରୁ ଲଢିଥିବା ବେଳେ ବିଜେଡିର ରବି ପାଣିଙ୍କ ଠାରୁ ପରାସ୍ତ ହୋଇଥିଲେ । ୨୦୧୪ରେ ଧର୍ମେନ୍ଦ୍ର ନିର୍ବାଚନ ଲଢିନଥିଲେ, ଏହି ସମୟ ବେଳକୁ ବିହାରରୁ ରାଜ୍ୟସଭା ସାଂସଦ ଥିଲେ ଧର୍ମେନ୍ଦ୍ର ।
ବଡ କଥା ହେଉଛି, ୨୦୧୯ ପାଇଁ ଦଳ ନିର୍ଦ୍ଦେଶ ଦେଲେ ସେ ଲଢିବାକୁ ପ୍ରସ୍ତୁତ ଥିବା ବାରମ୍ବାର ପୂର୍ବରୁ ଗଣମାଧ୍ୟମକୁ କହିଥିଲେ । କିନ୍ତୁ ଏଯାଏଁ ଧର୍ମେନ୍ଦ୍ର ନିଜ ପାଇଁ ଆସନଟିଏ ରଖିନାହାନ୍ତି । ଆଉ ଏହି ଦୁର୍ବଳତମ ଦିଗକୁ ଟାର୍ଗେଟ କରି ସୁବାସ ଚୈହ୍ୱାନ ନିଜ ମନରେ ଥିବା କ୍ରୋଧକୁ ପରିପ୍ରକାଶ କରିଥିବା ଅନୁମାନ କରାଯାଉଛି ।
ରାଜ୍ୟରେ ନିଜକୁ ବିକଳ୍ପ ଭାବେ ଉପସ୍ଥାପନ କରୁଥିବା ବିଜେପିର ଚେହେରା ସାଜିଛନ୍ତି ଧର୍ମେନ୍ଦ୍ର ପ୍ରଧାନ । ବୋଧହୁଏ ଖାସ ସେଥିପାଇଁ, ନବୀନଙ୍କ ବିରୁଦ୍ଧରେ ଲଢିବାକୁ ସୁବାସ ଖୋଲାଖୋଲି ଭାବେ ଧର୍ମେନ୍ଦ୍ରଙ୍କୁ ଆହ୍ୱାନ ଦେଇଛନ୍ତି । ହୁଏତ ଏହାର ଆଧାରରେ କାହାର ଗ୍ରହଣୀୟତା ଅଛି ଆଉ କିଏ ବିକଳ୍ପ ସାଜିପାରିବ ତାହା ପ୍ରମାଣିତ ହୋଇପାରିବ ବୋଲି ପରୋକ୍ଷରେ ଇଙ୍ଗିତ କରିବାକୁ ପଛାଇନାହାନ୍ତି ସୁବାସ ।