ମହିଳା ସବ୍ ଇନ୍ସପେକ୍ଟରଙ୍କ ମହାନତା । ଅସହାୟ ବୃଦ୍ଧାଙ୍କ ପାଇଁ ପାଲଟିଲେ ସାହାରା
କନକ ବ୍ୟୁରୋ: ଆଜିକାଲି ସମାଜରେ ବୟସ୍କଙ୍କୁ ପରିବାର ଅଣଦେଖା କରୁଥିବାର ଅନେକ ଖବର ଶୁଣିବାକୁ ଦେଖିବାକୁ ମିଳୁଛି । ଫଳରେ ଶରୀରର ଅସହାୟତାକୁ ନେଇ କେଉଁଠି ରାସ୍ତା କଡରେ ତ କେଉଁଠି ପ୍ଲାଟଫର୍ମରେ ପଡିରହୁଛନ୍ତି ଏମାନେ । ହେଲେ ଏପରି କିଛି ହାତ ଗଣତି ଲୋକ ଅଛନ୍ତି ଯେଉଁମାନେ ଏପରି ଅସହାୟଙ୍କ ପାଇଁ ସାହା ହୋଇ ଛିଡା ହେଉଛନ୍ତିି । ଏପରି ମହାନତାର ପରିଚୟ ଦେଇଛନ୍ତି ଇନ୍ଦୋରର ଜଣେ ମହିଳା ସବ ଇନ୍ସପେକ୍ଟର ଅନିଲା ପରାଶର ।
Kanak News is now on WhatsApp
Join and get latest news updates delivered to you via WhatsApp
ଜଣେ ବୃଦ୍ଧା, ଯେ କି ନିଜ ପରିବାର ଲୋକଙ୍କ ଦ୍ୱାରା ପରିତ୍ୟକ୍ତା, ଏକ ପ୍ଲାଟଫର୍ମରେ ଶୀତ ରାତିରେ ଥରୁଥିଲେ । ତାଙ୍କ ଉପରେ ପଡିଥିଲା ଅନିଲାଙ୍କ ନଜର । ତାଙ୍କୁ କମ୍ବଳରେ ଘୋଡାଇ ଦେବା ସହ ସକାଳ ପାହିଲେ ତାଙ୍କର ସବୁ ବ୍ୟବସ୍ଥା କରିଦେବେ ବୋଲି କହି ଆଶ୍ୱାସନା ଦେଇଥିଲେ । ତାଙ୍କ କଥା ଶୁଣି ବୁଢି ମାଉସୀ ଜଣକ କାନ୍ଦି ପକାଇବାରୁ ତାଙ୍କ ଆଖିରୁ ଲୁହ ପୋଛି ଦେଇଥିଲେ ଅନିଲା । ବୃଦ୍ଧାଙ୍କ ପରିବାର ଲୋକଙ୍କୁ ମଧ୍ୟ ଠକିଣା ଜବାବ ଦେବେ ବୋଲି କହିଥିଲେ ।
ଖାଲି ଏହି ବୃଦ୍ଧାଙ୍କୁ ନୁହଁନ୍ତି ପାଟ୍ରୋଲିଙ୍ଗ ସମୟରେ ପ୍ଳାଟଫର୍ମ ବା ଅନ୍ୟ ସ୍ଥାନରେ ଯେଉଁଠି ବି ଲୋକଙ୍କୁ ଶୀତ ରାତିରେ ଅସହାୟ ଅବସ୍ଥାରେ ଦେଖିଲେ ତାଙ୍କୁ କମ୍ବଳ ବିତରଣ କରିଥିଲେ ଅନିଲା ପରାଶର । ତାଙ୍କର ଏହି ବଦାନ୍ୟ ଭିଡିଓ ଏବେ ଭାଇରାଲ ହେବାରେ ଲାଗିଛି । ସାଧାରଣତଃ ପୋଲିସ ଲୋକଙ୍କୁ ଅଯଥା ଅତ୍ୟାଚାର କରୁଥିବା ଲୋକଙ୍କ ମଧ୍ୟରେ ଧାରଣା ଥିବାବେଳେ ଏହି ବିଭାଗରେ ଅନେକ ବାଦାନ୍ୟ ଅଧିକାରୀ ଥାଇ ଲୋକସେବା ପାଇଁ ନିଜକୁ ଉତ୍ସର୍ଗ କରୁଥିବାର ଉଦାହରଣ ସୃଷ୍ଟି କରିଛନ୍ତି ଅନିଲା ପରାଶର ।