କାନ୍ଥରୁ ଚିତ୍ର ଦେଖି ପାଠପଢିବେ ଆବାସିକ ବିଦ୍ୟାଳୟର କୁନି କୁନି ଛାତ୍ରଛାତ୍ରୀ: ରାୟଗଡାରୁ ଶିକ୍ଷା ବିଭାଗ ଆରମ୍ଭ କରିଛି ବାଲା କାର୍ଯ୍ୟକ୍ରମ

କନକ ବ୍ୟୁରୋ: ଦରକାର ହବନି କଳାପଟା କି ବହି। ଶ୍ରେଣୀଗୃହ ହେବ ଶିକ୍ଷଣ ସାମଗ୍ରୀ। ଶ୍ରେଣୀଗୃହରେ ଅଭିନବ ପଦ୍ଧତିରେ ପିଲା ପାଠ ପଢିବେ। ନିଜ ଅଚଂଳର କଳା ଓ ସଂସ୍କୃତିର ଚିତ୍ର ମାଧ୍ୟମରେ ପାଠପଢା ହେବ। ରାଜ୍ୟରେ ପ୍ରଥମ କରି ରାୟଗଡାରେ ଆରମ୍ଭ ହୋଇଛି ବିଲ୍ଡିଂ ଆଜ୍ ଲର୍ଣ୍ଣି ଏଡ୍ସ ଅର୍ଥାତ୍ ବାଲା କାର୍ଯ୍ୟକ୍ରମ।

ଶ୍ରେଣୀଗୃହର କାନ୍ଥରେ ଅଙ୍କା ଚାଲିଛି ସୁନ୍ଦର ସୁନ୍ଦର ଚିତ୍ର। କିଏ ଆଙ୍କୁଛି ଶଗଡର ଚିତ୍ର ତ କିଏ ଆଙ୍କୁଛି ଗଛ ଉପରେ ବସିଛନ୍ତି ପକ୍ଷୀ। ପଣିକିଆ ଟେବୁଲ, ଲାଞ୍ଜିଆ ସୌରାଙ୍କ ଇଡତାଲ ଚିତ୍ର ସହ ଡଙ୍ଗରିଆଙ୍କ କପଡାଗୁନ୍ଦା ଚିତ୍ର ଆଙ୍କୁଛନ୍ତି ଜନଜାତି ଚିତ୍ରକର। ଆଉ ଏହି ଚିତ୍ର ସାହାଯ୍ୟରେ ପାଠପଢିବେ ପ୍ରାଥମିକ ବିଦ୍ୟାଳୟର ଛାତ୍ରଛାତ୍ରୀ। ଗଣିତ, ଭାଷା ଓ ପରିବେଶ ବିଷୟରେ ପିଲା ଅତିସହଜରେ ଶିକ୍ଷାଲାଭ କରିପାରିବେ। ବିଲ୍ଡିଂ ଆଜ୍ ଲର୍ଣ୍ଣି ଏଡ୍ସ ଅର୍ଥାତ୍ ବାଲା କାର୍ଯ୍ୟକ୍ରମ ଜରିଆରେ ପିଲାଙ୍କୁ ପାଠ ପ୍ରତି ଆକୃଷ୍ଟ କରିବା ପାଇଁ ପ୍ରୟାସ କରୁଛି ଶିକ୍ଷା ବିଭାଗ ।

ମାତୃଭାଷା ଓ ସଂସ୍କୃତି ଭିତିକ ଶିକ୍ଷାଦାନ ଉପରେ ଗୁରୁତ୍ୱ ଦେଇ ଶିକ୍ଷା ବିଭାଗ ପକ୍ଷରୁ ଆବାସିକ ପ୍ରାଥମିକ ବିଦ୍ୟାଳୟରେ ଅଭିନବ ଶିକ୍ଷଣ ପଦ୍ଧତିକୁ ଆପଣାଇବାକୁ ଲକ୍ଷ୍ୟ ରଖାଯାଇଛି। ରାୟଗଡା ଜିଲ୍ଲାରୁ ଏହାର ଶୁଭାରମ୍ଭ ହୋଇଛି। ସଦର ବ୍ଲକ ପିତାମହଲ ଆଶ୍ରମ ବିଦ୍ୟାଳୟକୁ ପାଇଲଟ ପ୍ରୋଜେକ୍ଟ ଭାବେ ନିଆଯାଇଛି। ରାୟଗଡ଼ା ଜିଲ୍ଲାର ୧୦୦ଟି ଆଶ୍ରମ ବିଦ୍ୟାଳୟରେ କାର୍ଯ୍ୟକ୍ଷମ କରାଯିବ । ପର୍ଯ୍ୟାୟକ୍ରମେ ନବରଙ୍ଗପୁର, କେନ୍ଦୁଝର, ମୟୁରଭଞ୍ଜ ଓ ସୁନ୍ଦରଗଡ ଭଳି ଆଦିବାସୀ ବହୁଳ ଜିଲ୍ଲାରେ ୩୩୭ଟି ଆବାସିକ ବିଦ୍ୟାଳୟରେ କରାଯିବ ।

ଏହାଦ୍ୱାରା ଜିଲ୍ଲାର ଜନଜାତି, ସଂସ୍କୃତି ଓ ପରମ୍ପରା ବିଷୟ ଆଧାରରେ ପିଲାଙ୍କ ଗଣିତ, ଭାଷା ଓ ପରିବେଶ ବିଷୟରେ ଶିକ୍ଷଣ ଅଧିକ ସହଜ, ସରଳ ସୁଗମ ହେବ ବୋଲି ଆଶା କରାଯାଉଛି ।