କଲମ ବଦଳରେ କୁନି ହାତରେ କାଠ । ସୁବର୍ଣ୍ଣପୁରରୁ ଆସିଲା ସାଂଘାତିକ ଚିତ୍ର । ବିଦ୍ୟାଳୟରେ ପାଠପଢା ବଦଳରେ ମଧ୍ୟାହ୍ନ ଭୋଜନ ପ୍ରସ୍ତୁତି ପାଇଁ କାଠ ବୋହୁଛନ୍ତି କୁନି ଛାତ୍ରଛାତ୍ରୀ ।
କନକ ବ୍ୟୁରୋ : ଆମେ ପାଠ ପଢିବୁ, ବଡ ମଣିଷ ହେବୁ । କଳା ଘୋଡାରେ ଚଢି ମଧୁବାବୁଙ୍କ ସହ ଲଢିବୁ । ଏମିତି କିଛି ପଣ କରି ସ୍କୁଲକୁ ପାଠ ପଢିବା ପାଇଁ ଯାଇଥାନ୍ତି କୁନି କୁନି ଛାତ୍ରଛାତ୍ରୀ । ଆଉ ଛାତ୍ରଛାତ୍ରୀମାନଙ୍କୁ ଶିକ୍ଷାର ଆଲୋକ ମଧ୍ୟକୁ ଟାଣିଆଣିବା ପାଇଁ ସରକାରଙ୍କ ପକ୍ଷରୁ ମଧ୍ୟ ଅନେକ ଯୋଜନା କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ସୁବର୍ଣ୍ଣପୁର ଜିଲ୍ଲାର ଏକ ସ୍କୁଲରୁ ଏମିତି ଏକ ଚିତ୍ର ସାମ୍ନାକୁ ଆସିଛି, ଯାହା ଶିକ୍ଷାବ୍ୟବସ୍ଥା ଉପରେ ଏକ ବଡ ପ୍ରଶ୍ନବାଚୀ ସୃଷ୍ଟି କରିଛି । ଯେଉଁ ବୟସରେ ବିଦ୍ୟାଳୟ ଯାଇ କୁନି ହାତରେ କଲମ ଧରି ପାଠ ପଢିବା କଥା, ସେଠି ହାତରେ କାଠ ବୋହି ସ୍କୁଲକୁ ନେଉଛନ୍ତି କୁନି କୁନି ଛାତ୍ରଛାତ୍ରୀ ।
ବିଦ୍ୟାଳୟରେ ପାଠ ପଢିବା ବଦଳରେ କୁନିକୁନି ଛାତ୍ରଛାତ୍ରୀମାନେ ମଧ୍ୟାହ୍ନ ଭୋଜନ ପ୍ରସ୍ତୁତି ପାଇଁ କାଠ ବୋହୁଛନ୍ତି । ସୁବର୍ଣ୍ଣପୁର ଜିଲ୍ଲାର ବିନିକା ଅଞ୍ଚଳରେ ଏହି ଅଭାବନୀୟ ଘଟଣା ଦେଖିବାକୁ ମିଳିଛି । ଶିକ୍ଷକମାନେ ଛାତ୍ରଛାତ୍ରୀଙ୍କୁ କାଠ ବୋହିବା କାମରେ ନିୟୋଜିତ କରୁଛନ୍ତି ବୋଲି ଅଭିଯୋଗ ହେଉଛି ।
ବିନିକା ବ୍ଲକ ଜୁଲୁଣ୍ଡା ପଞ୍ଚାୟତ କାଲସାଏପାଲି ସରକାରୀ ପ୍ରାଥମିକ ବିଦ୍ୟାଳୟରେ ଶୁକ୍ରବାର ଏହି ଦୃଶ୍ୟ ଦେଖିବାକୁ ମିଲିଛି । ସ୍କୁଲ ସମୟରେ କୁନିକୁନି ଛାତ୍ରଛାତ୍ରୀମାନେ ଯେଉଁ ହାତରେ କଲମ ଧରି ପାଠ ପଢିବା କଥା, ସେମାନେ ସେଇ ହାତରେ ସ୍କୁଲରେ ରୋଷେଇ କରିବା ପାଇଁ ରାସ୍ତରୁ କାଠ ସଂଗ୍ରହ କରୁଥିବା ନେଇ ଅଭିଭାବକ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି ।
ସୋସିଆଲ ମିଡିଆରେ ଭିଡିଓ ଭାଇରାଲ ହେବା ପରେ ବିଦ୍ୟାଳୟର ଭାରପ୍ରାପ୍ତ ପ୍ରଧାନ ଶିକ୍ଷକ ଜୟକୃଷ୍ଣ ଦେହେରୀ କହିଛନ୍ତି ଯେ, ଛାତ୍ରଛାତ୍ରୀମାନେ କାଠ ବୋହିବାର କଥା ବିଷୟରେ ମୁଁ ଜାଣିନାହିଁ । ସ୍କୁଲରେ ମଧ୍ୟାହ୍ନ ଭୋଜନ ପ୍ରସ୍ତୁତ କରୁଥିବା ଜୟନ୍ତୀ କାଲସେ ଛାତ୍ରଛାତୀମାନଙ୍କୁ କହି ଏହିକାମ କରାଇଛନ୍ତି ବୋଲି ସେ କହିଛନ୍ତି । ପ୍ରଧାନ ଶିକ୍ଷକ କହିଛନ୍ତି ଯେ, ମଧ୍ୟାହ୍ନ ଭୋଜନ ପ୍ରସ୍ତୁତି ସମୟରେ ମୁଁ ଅଫିସ କାର୍ଯ୍ୟରେ ବ୍ୟସ୍ତ ଥିଲି । ଅନ୍ୟପକ୍ଷରେ ବିନିକା ଗୋଷ୍ଠୀ ଶିକ୍ଷା ଅଧିକାରୀ ଶଶିଭୂଷଣ ସେଠୀ କହିଛନ୍ତି, ଘଟଣାର ତଦନ୍ତ ହେଲା ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।