‘ମାଆ ଭୁଆସୁଣୀଙ୍କୁ ଭୋଗ ନଦେଲେ ପାହାଡରୁ ଫେରିବା ଭାରି ମୁସ୍କିଲ…’ । ଉଦ୍ଧାର ପରେ ଛାତ୍ର କହିଲେ ସପ୍ତଶଯ୍ୟା ଜଙ୍ଗଲର ଲୋମଟାଙ୍କୁରା କାହାଣୀ । ରହସ୍ୟମୟ ଭୁଆସୁଣୀ ଖାଲ…
କନକ ବ୍ୟୁରୋ: ସପ୍ତଶଯ୍ୟା ଜଙ୍ଗଲର ଲୋମଟାଙ୍କୁରା କାହାଣୀ । ୫ ଛାତ୍ର ବାଟ ଭୁଲିଥିଲେ ନା କିଏ ଅବାଟରେ ଟାଣି ନେଉଥିଲା ? ଉଦ୍ଧାର ପରେ ଯୁବକ କହିଲେ ଅନ୍ଧାରୀ ରାତିର ସତ । ‘ଫୋନ୍ ସ୍ୱିଚ୍ ଅଫ୍ ହୋଇଯାଇଥିଲା, ଧଳାରଙ୍ଗର କଣ ଗୋଟେ ଆଗରେ ଯାଉଥିଲା, ଯୁଆଡେ ଗଲେ ବି ସେହି ଖାଲକୁ କିଏ ଟାଣିଆଣୁଥିଲା । ଯୁବକଙ୍କ ବୟାନ ପରେ ଭୁଆସୁଣୀ ଖାଲର ରହସ୍ୟକୁ ନେଇ ଉଠିଲା ପ୍ରଶ୍ନ । ସପ୍ତଶଯ୍ୟା ଜଙ୍ଗଲର ଡେଡ୍ ପଏଣ୍ଟ କେଉଁଠି ?
Kanak News is now on WhatsApp
Join and get latest news updates delivered to you via WhatsApp
ରବିବାର ରାତିରେ ବାଟଭୁଲିଥିଲେ ଆଉ ଅଧ ରାତିରେ ଜଙ୍ଗଲ ଭିତରୁ ଉଦ୍ଧାର ହୋଇ ସୋମବାର ସକାଳେ ନିଖୋଜ ହେବାର କାରଣ କହିଲେ । ଢେଙ୍କାନାଳ ସପ୍ତଶଯ୍ୟା ପାହାଡ ବୁଲିବାକୁ ଯାଇ ନିଖୋଜ ହୋଇଥିବା ୫ ଜଣ ଛାତ୍ର ଉଦ୍ଧାର ହେବା ଖବର ତ ହେଡଲାଇନ ପାଲଟିଛି ହେଲେ ଉଦ୍ଧାର ହୋଇଥିବା ୫ ଛାତ୍ରଙ୍କ ମଧ୍ୟରୁ ଶୁଭମ ମହାପାତ୍ରଙ୍କ ବୟାନ ଜଙ୍ଗଲୀ କାହାଣୀକୁ ଅଧିକ ରୋଚକ କରିଛି । ଆଉ ସପ୍ତଶଯ୍ୟା ପାହାଡରେ ଥିବା ଭୁଆସୁଣୀ ଖାଲକୁ ନେଇ ରହସ୍ୟ ବଢିଯାଇଛି ତା ସହ ସିନେମା ‘ମଞ୍ଜୁମେଲ୍ ବଏଜ’ର କାହାଣୀ ମନେପଡିଯାଇଛି ।
-ଘନ ଅନ୍ଧାରକୁ, ଘଞ୍ଚ ଜଙ୍ଗଲ
-ଚିତ୍କାର କରି ଡାକୁଥିଲେ, ହେଲେ କେହି ଶୁଣୁ ନଥିଲେ
-ପାହାଡ ଯେତେ ଚଢୁଥିଲେ ପୁଣି ସେହି ଖାଲକୁ ଫେରୁଥିଲେ
କଟକ ଲିଙ୍କରୋଡ ଅଞ୍ଚଳରୁ ବୁଲିବାକୁ ଆସିଥିବା ୫ ଛାତ୍ର ସପ୍ତଶଯ୍ୟାରେ ଥିବା ବିଷ୍ଣୁ ବାବାଙ୍କ ଆଶ୍ରମର ବହୁ ଉପରକୁ ଚଢିଯାଇଥିଲେ । ଆଉ ବର୍ଷା ହେବାରୁ ତଳକୁ ଫେରିପାରିନଥିଲେ । ଫେରୁଫେରୁ ସନ୍ଧ୍ୟା ମାଡି ଆସିବାରୁ ଜଙ୍ଗଲରେ ବାଟ ଭୁଲିଯାଇଥିଲେ । ବାଟବଣା ହେବା ପରେ ଘରକୁ ଫୋନ ସହ ପୋଲିସକୁ ଫୋନ କରିବାକୁ ଉଦ୍ୟମ କରୁଥିଲେ ହେଁ ନେଟୱର୍କ ନଥିବା କାରଣରୁ କାହା ସହ ଯୋଗାଯୋଗ ହୋଇ ପାରୁନଥିଲା । ସେପଟେ ଜଣଙ୍କ ପରେ ଜଣଙ୍କ ଫୋନ୍ ସ୍ୱିଚ୍ ଅଫ୍ ହେଇଯାଉଥିଲା । ଶେଷରେ ଫୋନ୍ ଲାଗିବା ପରେ ଖୋଜାଖୋଜି ଆରମ୍ଭ କରିଥିଲା ପୋଲିସ ଓ ବନ ବିଭାଗ ।
ମାତ୍ର ଉଦ୍ଧାର ପୂର୍ବରୁ କେମିତି ଥିଲା ଅନ୍ଧାରୀ ଜଙ୍ଗଲର ଲୋମଟାଙ୍କୁରା କାହାଣୀ ତାହା କହିଛନ୍ତି ଶୁଭମ । “ଫସିଥିବା ସ୍ଥାନରୁ ସାଙ୍ଗମାନେ ଯେତେ ବାହାରିବାକୁ ଚେଷ୍ଟା କରୁଥିଲେ ସେମାନେ ପୁଣି ସେହି ସମାନ ସ୍ଥାନରେ ପହଞ୍ଚିଯାଉଥିଲେ । ଏମିତି ଲାଗୁଥିଲା ସେମାନଙ୍କୁ ସତେକି କିଏ ସେହି ଖାଲକୁ ଟାଣୁଛି । ଶୁଭମଙ୍କ କହିବା କଥା ମାଆ ଭୁଆସୁଣୀଙ୍କୁ ଭୋଗ ନଦେଲେ ସେଠୁ ଫେରିବା କାଳେ ମୁସ୍କିଲ । ଆଉ ସେମାନେ ସାଥିରେ ଭୋଗ ନେଇ ନଥିଲେ । ଅନ୍ଧାର ରାତିରେ ସେମାନେ ଜଙ୍ଗଲରେ ଏକ ଧଳା ରଙ୍ଗର କଣ ଆଗରେ ଯାଉଥିବା ଅନୁଭବ କରିଥିଲେ । ବିରାଟ ଗୁମ୍ଫା, ବିରାଟ ସାପ ବି ଦେଖିଥିଲେ । ଉଦ୍ଧାର କରିବାକୁ ଯେତେ ଚିକ୍ରାର କରୁଥିଲେ ବି ସେମାନଙ୍କ ସ୍ୱର କାହା ପାଖେ ପହଞ୍ଚି ପାରୁନଥିଲା । ସପ୍ତଶଯ୍ୟାର ସେ ସ୍ଥାନ ସବୁଠୁ ଭୟଙ୍କର ବୋଲି ଅନ୍ଧାରୀ ଜଙ୍ଗଲରୁ ଉଦ୍ଧାର ହୋଇଥିବା ଶୁଭମ କହିଛନ୍ତି ।
ସପ୍ତଶଯ୍ୟାର ଏ କାହାଣୀ ଆପଣଙ୍କୁ ରହସ୍ୟମୟ ଲାଗିପାରେ । ଏହାର ସତ୍ୟତା କଣ ତାହା କେହି ବି ଜାଣି ନାହାନ୍ତି ମାତ୍ର ଏହା ନିଖୋଜ ରାତିର ଶୁଭମଙ୍କ ଅନୁଭୁତି ଉପରେ ଆଧାରିତ । ତେଣୁ କୌଣସି ବି ଜଙ୍ଗଲ କିମ୍ବା ପାହାଡ ବୁଲିବାକୁ ଯିବା ବେଳେ ସତର୍କତା ଅବଲମ୍ବନ କରିବା ସହ ଜଙ୍ଗଲ ବାବଦରେ ଜାଣିକି ଯାଆନ୍ତୁ ।