ଉତ୍କଳ ବିଶ୍ବବିଦ୍ୟାଳୟରେ ପୁଣି ଛାତ୍ର ଅଶାନ୍ତି । ଲାଇବ୍ରେରୀ କାର୍ଡ ମିଳୁନଥିବା ଏବଂ ହଷ୍ଟେଲ ସମସ୍ଯା ନେଇ କର୍ତ୍ତୃପକ୍ଷଙ୍କୁ ଘେରିଲେ ଛାତ୍ରଛାତ୍ରୀ ।

କନକ ବ୍ୟୁରୋ: ବାଣୀବିହାରରେ ପୁଣି ଥରେ ଛାତ୍ର ଅଶାନ୍ତି ଦେଖାଯାଇଛି। ଉତ୍ତେଜିତ ଛାତ୍ରଛାତ୍ରୀମାନେ ବିଶ୍ବବିଦ୍ୟାଳୟ ପରିସରରେ ଥିବା ପିଜି କାଉନସିଲ କାର୍ଯ୍ୟାଳୟରେ ତାଲା ପକାଇ ଦେଇଥିଲେ । ଛାତ୍ରଛାତ୍ରୀମାନଙ୍କୁ ଆବଶ୍ୟକ ସୁବିଧା ମିଳୁ ନଥିବାରୁ ସେମାନେ ବାଧ୍ୟ ହୋଇ ଶେଷରେ ଆନ୍ଦୋଳନ କରିଥିଲେ। ଏଥି ସହିତ ସେମାନେ ଚେତାବନୀ ଦେଇଛନ୍ତି ଯେ, ସମସ୍ୟାର ସମାଧାନ ନ ହେବା ପର୍ଯ୍ୟନ୍ତ ଆନ୍ଦୋଳନ ଜାରି ରଖିବେ।

ଅଭିଯୋଗ ଅନୁସାରେ ପିଜି ସେଲଫାଇନାସିଂ ଛାତ୍ରଛାତ୍ରୀଙ୍କୁ ବିଶ୍ବବିଦ୍ୟାଳୟର ସମସ୍ତ ସୁବିଧା ମିଳୁନାହିଁ । ଛାତ୍ରଛାତ୍ରୀମାନଙ୍କୁ ଲାଇବ୍ରେରୀ କାର୍ଡ ଦିଆଯାଉନଥିବାରୁ ସେମାନେ କ’ଣ ବିଶ୍ବବିଦ୍ୟାଳୟର ସାବତ ପୁଅ ବୋଲି ପ୍ରଶ୍ନ କରିଛନ୍ତି। ଏହାସହ ସେମାନଙ୍କୁ ହଷ୍ଟେଲ ମିଳୁନଥିବା ଅଭିଯୋଗ କଲେ ବିଶ୍ବବିଦ୍ୟାଳୟର ପିଜି କାଉନସିଲ ଚେୟାରମ୍ୟାନ୍ କିଛି ବୁଝୁ ନାହାନ୍ତି । ତେଣୁ ସମସ୍ୟାର ସମାଧାନ ନ ହେବା ପର୍ଯ୍ୟନ୍ତ ଧାରଣା ଜାରି ର‌ହିବ ବୋଲି ଛାତ୍ରଛାତ୍ରୀମାନେ ଦାବି କରିଛନ୍ତି ।

ଅନ୍ୟପଟେ ଏହାକୁ ନେଇ  ପ୍ରତିକ୍ରିୟା ରଖିଛନ୍ତି ପିଜି କାଉନସିଲ ଚେୟାରମ୍ୟାନ୍ ପ୍ରଫେସର ବସନ୍ତ ମଲ୍ଲିକ। ସେ କହିଛନ୍ତି, ସମସ୍ୟା ଅଛି ଏବଂ କିଛି ସମାଧାନ ପାଇଁ ଆମେ ଆଲୋଚନା କରୁଛୁ । ଦୁଇ ତିନିଦିନ ଭିତରେ ପିଲାଙ୍କୁ ଲାଇବ୍ରେରୀ କାର୍ଡ ଓ ହଷ୍ଟେଲ ପ୍ରଦାନ କରାଯିବ ।