ପାର୍ବଣ ପାଇଁ କଡା କଟକଣା : ଆଜି ରାତିରୁ ଟୁଇନସିଟିରେ ନାଇଟ୍ କର୍ଫ୍ୟୁ; ୨୦ ତାରିଖ ଯାଏଁ ରହିବ ବଳବତର
ଉଲ୍ଲଙ୍ଘନକାରୀଙ୍କୁ ପୋଲିସ କମିଶନରଙ୍କ କଡା ଚେତାବନୀ
କନକ ବ୍ୟୁରୋ : ପାର୍ବଣ ପାଇଁ ଟୁଇନସିଟିରେ ଆଜିଠାରୁ ଆହୁରି କଡାକଡି ହେବ ନାଇଟ୍ କଫ୍ୟୁ । ପୂଜାକୁ ଶାନ୍ତିଶୃଙ୍ଖଳା ଓ ସୁରକ୍ଷିତ ଢଙ୍ଗରେ ଶେଷ କରିବାପାଇଁ ରାତି ୮ଟାରୁ ସକାଳ ୫ଟା ପର୍ଯ୍ୟନ୍ତ ଏହି କଟକଣା ରହିବ । ପୂଜାରେ ସହରକୁ ଜଗିବା ପାଇଁ ୧୦୦ଜଣ ଅଧିକାରୀଙ୍କ ନେତୃତ୍ବରେ ୩୨ ପ୍ଲାଟୁନ୍ ଫୋର୍ସ ମୁତୟନ କରାଯାଇଛି । ଏହାଭିତରେ ୧୧୦ରେ ୪୧ଜଣଙ୍କୁ ଧରି ଜେଲ୍ ପଠାଯାଇଥିବା ବେଳେ ଆଉ ୨୦୩ ଙ୍କୁ ଧରିବା ପାଇଁ ତାଲିକା ପ୍ରସ୍ତୁତ କରାଯାଇଛି । ମଦୁଆଙ୍କୁ ଧରିବାକୁ ସ୍ବତନ୍ତ୍ର ସ୍କ୍ବାଡ୍ ପ୍ରସ୍ତୁତ କରାଯାଇଛି । ପୂଜାରେ ବିଶୃଙ୍ଖଳା ସୃଷ୍ଟିକାରୀଙ୍କ ପ୍ରତି କଠୋର ପଦକ୍ଷେପ ନିଆଯିବ ବୋଲି ପୁଲିସ କମିସନର୍ ସୌମେନ୍ଦ୍ର ପ୍ରିୟଦର୍ଶୀ ଚେତାବନୀ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଦୁର୍ଗାପୂଜା ସମୟରେ ରାତି ୮ଟାରୁ ସକାଳ ୫ଟା ଯାଏ କର୍ଫ୍ୟୁ କଟକଣା ରହିବ ବୋଲି ସରକାରଙ୍କ ପକ୍ଷରୁ ପୂର୍ବରୁ ଘୋଷଣା କରାଯାଇଥିଲା । ଏହାକୁ କାର୍ଯ୍ୟକାରୀ କରାଯିବା ପୂର୍ବରୁ ଆଜି ପୁଲିସ କମିସନର୍ ସୌମେନ୍ଦ୍ର ପ୍ରିୟଦର୍ଶୀ ଏକ ସାମ୍ବାଦିକ ସମ୍ମିଳନୀ କରି ବିଶୃଙ୍ଖଳା ସୃଷ୍ଟିକାରୀଙ୍କୁ ଦୃଢ଼ହସ୍ତରେ ଦମନ କରାଯିବ ବୋଲି ଚେତାବନୀ ଦେଇଛନ୍ତି । ଏହାଭିତରେ ପୂଜା ଆରମ୍ଭ ହେବା ପୂର୍ବରୁ ପୁଲିସ ପକ୍ଷରୁ ୧୧୦ରେ ୪୧ଜଣଙ୍କୁ ଗିରଫ କରି ଜେଲ୍ ପଠାଯାଇଥିବା ବେଳେ ଆଉ ୨୦୩ଜଣଙ୍କୁ ଧରିବା ପାଇଁ ତାଲିକା ପ୍ରସ୍ତୁତ କରାଯାଇଛି । ପୂଜା ସମୟରେ ବେଆଇନ ମଦ କାରବାର ଉପରେ ରୋକ୍ ଲଗାଇବାକୁ ଏକ ସ୍ୱତନ୍ତ୍ର ଟିମ ତିଆରି ହୋଇଛି ।
ସୁରକ୍ଷା ଓ ଆଇନଶୃଙ୍ଖଳା ଦାୟିତ୍ବରେ ୧୦୦ ଜଣ ଅଫିସରଙ୍କ ନେତୃତ୍ବରେ ୩୨ ପ୍ଲାଟୁନ ଫୋର୍ସ ନିୟୋଜିତ ହୋଇଛନ୍ତି । ନାଇଟ୍ କର୍ଫ୍ୟୁକୁ କଡ଼ାକଡ଼ି ପାଳନ କରିବା ପାଇଁ ରାତିରେ ସ୍ପେସାଲ ସ୍କ୍ବାଡ୍ ନିୟୋଜିତ କରାଯିବା ସହ ସାଦା ପୋଷାକ ପାଟ୍ରୋଲିଂ ବ୍ୟବସ୍ଥା କରାଯାଇଛି। ସ୍ପେସାଲ୍ ସ୍କାଡ୍ ପିସିଆର୍ ବଦଳରେ ବାଇକ୍ ପାଟ୍ରୋଲିଂ କରିବେ ଓ ମଦୁଆଙ୍କୁ ଧରିବାରେ ସହଯୋଗ କରିବେ । ଜୋର ଜବରଦସ୍ତ ଚାନ୍ଦା ଆଦାୟ କଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ଓ ଆବଶ୍ୟକ ହେଲେ ଗିରଫ କରାଯିବ ବୋଲ କମିସନର୍ କହିଛନ୍ତି । ସେହିପରି ପୂଜା ସମୟରେ ନାଇଟ କର୍ଫ୍ୟୁକୁ କଡ଼ାକଡ଼ି ପାଳନ କରାଯିବା ସହ ସରକାରଙ୍କ କୋଭିଡ୍ ନିୟମକୁ ମଧ୍ୟ ସଂପୂର୍ଣ୍ଣ ପାଳନ କରାଯିବ ବୋଲି କଟକ ଡିସିପି ପ୍ରତୀକ ସିଂହ କହିଛନ୍ତି ।