ମାନବିକତା ଦେଖାଇଲେ ଓଡିଆ ଅଭିନେତା ସବ୍ୟସାଚୀ : ଅଭିନେତାଙ୍କ ହସ୍ତକ୍ଷେପର ୧୬ ଦିନ ପରେ ଦୁବାଇରୁ ଫେରିଲା ଓଡିଆଙ୍କ ମରଶରୀର ; ଶ୍ରମିକ ଭାବେ କାମ କରିବାକୁ ଯାଇ ପ୍ରାଣ ହରାଇଥିଲେ ଖଲ୍ଲିକୋଟର ବଳରାମ
କନକ ବ୍ୟୁରୋ : ମାନବିକାତା ଦେଖାଇଲେ ଓଡିଆ ଅଭିନେତା ସବ୍ୟସାଚୀ । ୧୬ ଦିନ ପରେ ଦୁବାଇରୁ ଫେରିଲା ଓଡିଆଙ୍କ ମରଶରୀର । ଗଂଜାମ ଜିଲ୍ଲା ଖଲ୍ଲିକୋଟ ସ୍ଥିତ ଖୋଜାପଲ୍ଲୀ ଗାଁର ବଳରାମ ପ୍ରଧାନ ଦେଢ ବର୍ଷ ହେବ ଦୁବାଇରେ କାମ କରୁଥିଲେ । ଗତ ଜୁନ୍ ୨୯ ତାରିଖରେ ବଳରାମ ସଂଧ୍ୟାରେ ଘର ସହିତ ଫୋନରେ କଥା ହୋଇଥିଲେ । ତେବେ ରାତି ୧୨ଟାରେ ଖବର ଆସିଥିଲା ବଳରାମଙ୍କ ମୃତ୍ୟୁ ହୋଇଯାଇଛି । ଏହାକୁ ନେଇ ଘରେ ଶୋକର ଛାୟା ଖେଳିଯାଇଥିଲା । ଦୁବାଇରୁ କେମିତି ଫେରାଇ ଆଣିବେ ମୃତଦେହ ଚିନ୍ତାରେ ପଡିଥିଲେ ପରିବାର । କାରଣ ପାଖରେ ସେତିକି ଅର୍ଥ ନଥିଲା, କି ମିଳିଥିଲା ପ୍ରଶାସନର ସହ ଯୋଗ । ଏପରି ସମସ୍ୟା ନେଇ ଜାଣିବାକୁ ପାଇଥିଲେ ଓଡିଆ ଅଭିନେତା ସବ୍ୟସାଚୀ ମିଶ୍ର । ବଳରାମଙ୍କ ଭାଇ ଗଣେଶଙ୍କ ସହିତ ସଂପର୍କ କରି ଦୁବାଇରୁ ବଳରାମଙ୍କ ମରଶରୀର ଆଣିବାକୁ ସବ୍ୟସାଚୀ ନିଜେ ଉଦ୍ୟମ କରିଥିଲେ । ବିଦେଶରୁ ସିଧାସଳଖ ବିମାନବନ୍ଦର ଯାଏଁ ମୃତଦେହ ଆଣିବାର କୌଣସି ନିୟମ ନଥିବାରୁ ସେ ଦୁବାଇର କନସୋଲେଟ୍ ଜେନେରାଲ ଅଫ୍ ଇଣ୍ଡିଆ ଓ ଦୁବାଇ ପୋଲିସକୁ ଯୋଗାଯୋଗ କରିଥିଲେ । ପୋଲିସ ପ୍ରଶାସକ ଅନୁପ ସାହୁ ମଧ୍ୟ ଏଥିରେ ସହାୟତା କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଏୟାରଇଣ୍ଡିଆ ଭୁବନେଶ୍ୱରର ବରିଷ୍ଠ ପ୍ରବନ୍ଧକଙ୍କୁ ଇମେଲ୍ କରିବା ପରେ ମାନବିକତା ଦୃଷ୍ଟି କୋଣରୁ ଦୁବାଇରୁ ବଳରାମଙ୍କ ମରଶରୀର ଫେରାଇ ଆଣିବାକୁ ବାଟ ଫିଟିଥିଲା । ସବୁ ବ୍ୟବସ୍ଥା ପରେ ଦୁବାଇ ଓଡିଆ ସମାଜ ସହ ଯୋଗୀ ଏକ ଚାର୍ଟର ବିମାନ ବ୍ୟବସ୍ଥା କରିବାରୁ ମରଶରୀର ବିମାନ ବନ୍ଦରକୁ ଆସିବା ପରେ ଏକ ଆଂବୁଲାନ୍ସ ଜରିଆରେ ବୁଧବାର ରାତିରେ ପହଁଚିଥିଲା ଘରେ ।
ବଳରାମ ଯେଉଁ କମ୍ପାନୀରେ କାମ କରୁଥିଲେ, ସବ୍ୟସାଚୀ ସେହି କମ୍ପାନୀ କର୍ତୃପକ୍ଷଙ୍କ ସହିତ କଥା ହୋଇଛନ୍ତି କିପରି ତାଙ୍କ ପରିବାରକୁ କମ୍ପାନୀ ତରଫରୁ ସହାୟତା ମିଳିପାରିବ । ବଳରାମଙ୍କ ଦୁଇ ପୁଅଙ୍କର ପାଠପଢା ଖର୍ଚ ବହନ କରିବାକୁ ନିଜେ ସବ୍ୟସାଚୀ ପ୍ରତିଶ୍ରୁତି ବି ଦେଇଛନ୍ତି । ସବ୍ୟସାଚୀଙ୍କ ଏପରି ମାନବିକତା ଦେଖି ସବ୍ୟସାଚୀଙ୍କୁ ତାଙ୍କର ଆଉ ଜଣେ ପୁଅ ବୋଲି କହିଛନ୍ତି ମୃତ ବଳରାମଙ୍କ ମାଆ ।