ଜଣେ ଦିବ୍ୟାଙ୍ଗଙ୍କ ଜୀବନ କାହାଣୀ । ଅନ୍ଧାର ଭିତରେ ଜୀବନକୁ ଯନ୍ତ୍ରଣା ଡରାଇଛି ହେଲେ ଡରି ନାହାନ୍ତି ମଧୁ । ବାଉଁଶ ବାଡିର ସାହାରାରେ ଚାଲିଲେଣି ୨୨ ବର୍ଷର ଜୀବନ ପଥ ।
କନକ ବ୍ୟୁରୋ : ଜୀବନ ଯୁଦ୍ଧରେ ହାରିନାହାନ୍ତି ମଧୁ ନାଏକ । ଆଖିରୁ ଜ୍ୟୋତି ଲିଭିଥିଲେ ମଧ୍ୟ ମନର ଶକ୍ତି ଦେଖାଉଛି ବାଟ । ଦୀର୍ଘ ୨୨ ବର୍ଷ ହେଲା ଆଖି ଚାଲିଯାଇଥିଲେ ବି ସେ କାହା ଉପରେ ନିର୍ଭର କରିନାହାନ୍ତି । ଏପରିକି ସରକାରୀ ସହାୟତା ପାଇଁ ଭରଷା କରିନାହାନ୍ତି ମଧୁ ନାୟକ । ନିଜର ଦୈନନ୍ଦିନ କାମ ସୂଚାରୁ ରୂପେ କରିବା ସହ ଅନ୍ୟମାନଙ୍କ ପାଇଁ ଉଦାହରଣ ସାଜିଛନ୍ତି ସମ୍ବଲପୁର ଜିଲ୍ଲା କୁଚିଣ୍ଡା ଧୁଡିପାଲି ପଂଚାୟତ ରଜାମୁଣ୍ଡା ଗାଁର ମଧୁ ନାଏକ ।
Kanak News is now on WhatsApp
Join and get latest news updates delivered to you via WhatsApp
କାନ୍ଧରେ ପାଣି ଭାର ନେଇ ବାଟ ଚାଲୁଥିବା ଏହି ବ୍ୟକ୍ତି ଜାଣି ନାହାନ୍ତି ଆଗରେ ଖାଲ ଅଛି କି ଢିପ । ଅନ୍ଧାର ଅଛି କି ଆଲୋକ । କିନ୍ତୁ ସେ ସ୍ଥିର ନିଶ୍ଚିତ, ପାଣି ଭାରକୁ ଠିକଣା ଯାଗାରେ ପହଂଚାଇବେ । ପାଣି ଭାର ଧରିଥିବା ବ୍ୟକ୍ତି ଜଣକ ହେଉଛନ୍ତି ସମ୍ବଲପୁର ଜିଲ୍ଲା କୁଚିଣ୍ଡା ରଜାମୁଣ୍ଡା ଗାଁର ମଧୁ ନାଏକ । ୨୨ ବର୍ଷ ତଳୁ ତାଙ୍କ ଆଖିର ଜ୍ୟୋତିକୁ ସେ ହରାଇସାରିଛନ୍ତି । କିନ୍ତୁ ଜୀବନ ଯିଇଁବାର ଯୁଦ୍ଧରେ ସେ ହାରିନାହାଁନ୍ତି ।
ଅନ୍ଧାର ଭିତରେ ୨୨ ବର୍ଷ । ତଥାପି ହୋଇନାହାନ୍ତି ଅଲୋଡା । ଏହା ହେଉଛି ଜଣେ ଦିବ୍ୟାଙ୍ଗଙ୍କ ସଂଘର୍ଷର କାହାଣୀ । ଦାରିଦ୍ରତା ଭିତରେ ଯୁଝି ହେଉଥିବା ଏହି ମଣିଷ କେବେ ସରକାରୀ ସହାୟତାକୁ ଅପେକ୍ଷା କରିନାହାନ୍ତି । ଦୃଷ୍ଟି ଶକ୍ତି ଚାଲିଯିବା ପରେ ମୁଲ ମଜୁରୀ ସିନା ମିଳୁନି କିନ୍ତୁ ନିଜ କାମକୁ ସୂଚାରୁ ରୂପେ ତୁଲାଇ ପାରୁଛନ୍ତି ମଧୁ ନାଏକ । ଅଭାବୀ ପରିବାରର ଭୋକ ମେଂଟାଇବା ପାଇଁ ମଧୁଙ୍କ ସ୍ତ୍ରୀ ପରଘରେ ପାଇଟି କରୁଥିବା ବେଳେ ପୁଅ ଅନ୍ୟ ପାଖରେ ଡ଼୍ରାଇଭର ଭାବେ କାମ କରୁଛନ୍ତି । ସବୁଠାରୁ ଦୁଃଖର କଥା ପୁଅ ଜନ୍ମ ହେବା ଆଗରୁ ଆଖିର ଜ୍ୟୋତି ହରାଇ ସାରିଥିଲେ ମଧୁ । ବାପାଙ୍କ ବୋଝକୁ ପୁଅ ମୁଣ୍ଡରେ ବୋହୁଛି ହେଲେ ସେହି ପୁଅକୁ ଦେଖିନାହାନ୍ତି ଦିବ୍ୟାଙ୍ଗ ବାପା ।