କନକ ବ୍ୟୁରୋ : ତୋଫାନ ‘ଆଇଡା’ ପ୍ରକୋପରେ ଗୁରୁବାର ଦିନ ନ୍ୟୁୟର୍କ ଓ ନ୍ୟୁଜର୍ସିରେ ପ୍ରବଳ ବୃଷ୍ଟିପାତ ହୋଇଛି । ଫଳରେ ଆକସ୍ମିକ ଭାବେ ବନ୍ୟା ପରିସ୍ଥିତି ସୃଷ୍ଟି ହୋଇଛି । ଏଭଳି ପରିସ୍ଥିତିକୁ ନଜରରେ ରଖି ନୁୟର୍କ ଗଭର୍ଣ୍ଣର ଉଭୟ ନ୍ୟୁୟର୍କ ଓ ନ୍ୟୁଜର୍ସିରେ ଜରୁରୀ ପରିସ୍ଥିତି ଘୋଷଣା କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ନୁୟର୍କ ଗଭର୍ଣ୍ଣର ଜେନେରାଲ କ୍ୟାଥି ହୋକୁଲ ଟ୍ୱିଟ କରି କହିଛନ୍ତି କି ତୋଫାନରେ ପ୍ରଭାବିତ ନ୍ୟୁୟର୍କବାସୀଙ୍କ ସହାୟକ ହେବା ପାଇଁ ରାଜ୍ୟରେ ଜରୁରୀ ପରିସ୍ଥିତି ଘୋଷଣା କରାଯାଇଛି ।
କହିରଖୁ କି ରବିବାର ଦିନ ତୋଫାନ ‘ଆଇଡା’ ଚତୁର୍ଥ ବର୍ଗର ‘ହରିକେନ’ ଭାବେ ଦକ୍ଷିଣାଞ୍ଚଳ ଯୁକ୍ତରାଷ୍ଟ୍ର ଆମେରିକା ଦେଇ ପ୍ରବାହିତ ହେବା ବେଳେ ଚକ୍ରବାତ ଓ ବନ୍ୟା ସୃଷ୍ଟି କରିଥିଲା । ଏହାକୁ ନେଇ ପାଣିପାଗ ବିଭାଗ ନ୍ୟୁୟର୍କ ସହରରେ ଆକସ୍ମିକ ବନ୍ୟା ହେବ ବୋଲି ସୂଚନା ଦେବାର କିଛି ସମୟ ମଧ୍ୟରେ ଗଭର୍ଣ୍ଣର ଜରୁରୀ ପରିସ୍ଥିତି ଘୋଷଣା କରିଥିଲେ । ସୂଚନା ଥାଉକି ଏଭଳି ସତର୍କ ସୂଚନା ଜାରି ହେବା ନ୍ୟୁୟର୍କରେ ପ୍ରଥମ ଘଟଣା ।
ସେପଟେ ଆକସ୍ମିକ ବୃଷ୍ଟିପାତ ଫଳରେ ସୁଡ଼ଙ୍ଗ ମଧ୍ୟକୁ ପ୍ରବଳ ଜଳରାଶି ପ୍ରବେଶ କରିବାରୁ ନ୍ୟୁୟର୍କ ସହରର ସମସ୍ତ ଭୂତଳ ରେଳ ଚଳାଚଳ ବନ୍ଦ କରିଦିଆଯାଇଥିଲା । ଏହାପରେ ସହରରେ ବିମାନ ଚଳାଚଳ ମଧ୍ୟ ବନ୍ଦ କରାଯାଇଥିଲା । ଆଞ୍ଚଳିକ ଗଣମାଧ୍ୟମର ରିପୋର୍ଟ ମୁତାବକ ମାତ୍ର ଗୋଟିଏ ଘଂଟା ମଧ୍ୟରେ ସେଣ୍ଟ୍ରାଲ ପାର୍କରେ ୩ ଇଞ୍ଚରୁ ଅଧିକ ବର୍ଷା ହୋଇଥିଲା । ଏହାସହ ତୋଫାନ ‘ଆଇଡା’ ଯୋଗୁଁ ସମୁଦାୟ ୭ ଜଣ ପ୍ରାଣ ହରାଇଥିବା କୁହାଯାଇଛି ।