କୋରାପୁଟ ଗୁପ୍ତେଶ୍ୱର ପୀଠରୁ ଚୋରି। ଠାକୁରଙ୍କ ହୁଣ୍ଡି ଭାଙ୍ଗି ଲକ୍ଷାଧିକ ଟଙ୍କା ଲୁଟ୍

କନକ ବ୍ୟୁରୋ: ଦକ୍ଷିଣ ଓଡିଶାର ପ୍ରସିଦ୍ଧ ଗୁପ୍ତେଶ୍ୱର ଶୈବପୀଠରୁ ଚୋରୀ । କୋରାପୁଟ ଜିଲ୍ଲାର ପ୍ରସିଦ୍ଧ ଗୁପ୍ତେଶ୍ୱର ପୀଠରୁ ବାରମ୍ବାର ଚୋରୀ ହେଉଛି । କେତେବେଳେ ଭକ୍ତଙ୍କ ମୋବାଇଲ୍ ଓ ଟଙ୍କା ଚୋରୀ ହେଉଛି ତ କେତେବେଳେ ଠାକୁରଙ୍କ ଦାନ ଅର୍ଥ । ଗତକାଲି ରାତିରେ ଗୁପ୍ତେଶ୍ୱରଙ୍କ ଦାନ ହୁଣ୍ଡି ତାଲା ଭାଙ୍ଗି ଲକ୍ଷାଧିକ ଟଙ୍କା ଲୁଟି ନେଇଛନ୍ତି ଦୁର୍ବୃତ୍ତ । ଆଜି ସକାଳୁ ଦାନ ହୁଣ୍ଡି ଭଙ୍ଗା ହୋଇଥିବା ଦେଖି ଦେବୋତ୍ତର ବିଭାଗ ଓ ରାମଗିରି ଫାଣ୍ଡିକୁ ଜଣାଇଥିଲେ ପୂଜକ । ପୁଲିସ ଘଟଣାର ତଦନ୍ତ ଜାରି ରଖିଛି ।

ତେବେ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଗୁପ୍ତେଶ୍ୱର ପୀଠରୁ ବାରମ୍ବାର ଚୋରୀ ହେଉଛି । ଠାକୁରଙ୍କ ଦର୍ଶନ ପାଇଁ ଆସୁଥିବା ଭକ୍ତଙ୍କ ମୋବାଇଲ ଓ ଟଙ୍କା ଲୁଟି ନେଉଛନ୍ତି ଲୁଟେରା । କିଛି ଦିନ ତଳେ କାଉଡିଆଙ୍କ ମୋବାଇଲ ଲୁଟ୍ ହୋଇଥିଲା । ପୀଠରେ ବାରମ୍ବାର ଚୋରୀ ହେଉଥିବାରୁ ଏହାର ସୁରକ୍ଷା ବଢାଇବା ପାଇଁ ଦାବି ହେଉଛି ।