ଦେଶରେ କାହିଁକି ବଢ଼ୁଛି କରୋନା ଆକ୍ରାନ୍ତଙ୍କ ମୃତ୍ୟୁ ସଂଖ୍ୟା? ବଡ଼ ଖୁଲାସା କଲେ ଦିଲ୍ଲୀ ଏମ୍ସର ନିର୍ଦ୍ଦେଶକ ରଣଦୀପ ଗୁଲେରିଆ ।
କନକ ବ୍ୟୁରୋ: ମହାମାରୀ କରୋନା ସଂକ୍ରମଣରେ ଭାରତରେ ଏପର୍ଯ୍ୟନ୍ତ ୭୦୦ରୁ ଅଧିକ ମୃତ୍ୟୁ ହେଲାଣି । କେନ୍ଦ୍ର ସରକାରଙ୍କ ତଥ୍ୟ ଅନୁସାରେ କରୋନା ଆକ୍ରାନ୍ତଙ୍କୁ ଯୋଗାଇ ଦିଆଯାଉଥିବା ଚିକିତ୍ସା ସେବାରେ ଗତ ଗୋଟିଏ ମାସ ଭିତରେ ସାଢେ ୩ ଗୁଣା ବୃଦ୍ଧି ହୋଇଛି । ତଥାପି ମୃତ୍ୟୁ ସଂଖ୍ୟା ବଢିବାର କାରଣ ନେଇ ଏକ ଗୁରୁତ୍ୱପୂର୍ଣ୍ଣ ଦିଗ ଆଡକୁ ଇସାରା କରିଛନ୍ତି ଏମ୍ସର ନିର୍ଦ୍ଦେଶକ ରଣଦୀପ ଗୁଲେରିଆ । ତାଙ୍କ କହିବା ହେଲା ଉଭୟ ଆକ୍ରାନ୍ତ ଓ ତାଙ୍କ ପରିବାର ସଦସ୍ୟଙ୍କ ଭିତରେ କରୋନାକୁ ନେଇ ରହିଥିବା ଭ୍ରାନ୍ତ ଧାରଣା ଏଥିପାଇଁ ଦାୟୀ । ରୋଗୀ ବିଳମ୍ବରେ ହସ୍ପିଟାଲ ଆସୁଥିବାରୁ ସେମାନଙ୍କ ସ୍ୱାସ୍ଥ୍ୟବସ୍ଥା ଜଟିଳ ହୋଇପଡୁଛି । ଶ୍ୱାସକ୍ରିୟା ଜନିତ ଗମ୍ଭୀର ସମସ୍ୟା କାରଣରୁ ଅନେକ ସମୟରେ ଆକ୍ରାନ୍ତଙ୍କ ମୃତ୍ୟୁ ହେଉଛି ।
Kanak News is now on WhatsApp
Join and get latest news updates delivered to you via WhatsApp
ଡାକ୍ତର ଗୁଲେରିଆଙ୍କ କହିବା ହେଲା କରୋନା ଆକ୍ରାନ୍ତଙ୍କ ମଧ୍ୟରୁ ୮୦ ପ୍ରତିଶତ କେବଳ ସାମାନ୍ୟ ସ୍ୱାସ୍ଥ୍ୟ ସେବାରେ ଠିକ ହୋଇପାରିବେ । ତେବେ କେବଳ ୨୦ ପ୍ରତିଶତଙ୍କୁ ଅଧିକ ଯତ୍ନର ଆବଶ୍ୟକ ରହିଥିବାବେଳେ, ମାତ୍ର ୫ ପ୍ରତିଶତ ହିଁ ଭେଂଟିଲେଟର ଆବଶ୍ୟକ କରିଥାନ୍ତି । ତେଣୁ ୯୦ରୁ ୯୫ ପ୍ରତିଶତ କରୋନା ଆକ୍ରାନ୍ତ ଚିକିତ୍ସା ପରେ ଠିକ ହୋଇପାରୁଥିବାବେଳେ ଏହାକୁ ନେଇ ରହିଥିବା ଭ୍ରାନ୍ତ ଧାରଣା ଯୋଗୁଁ ହିଁ ମୃତ୍ୟୁ ସଂଖ୍ୟା ବଢିବାରେ ଲାଗିଛି । ସଂକ୍ରମିତ ନିଜର ପରୀକ୍ଷା କରିଇବା ସହ ଚିକିତ୍ସାରେ ବିଳମ୍ବ ନକଲେ ଏହାକୁ କମାଯାଇ ପାରିବ ବୋଲି ସେ କହିଛନ୍ତି ।
କରୋନା ମୁକାବିଲା ପାଇଁ ସରକାରଙ୍କ ପ୍ରସ୍ତୁତି ବାବଦରେ ସେ ସୂଚନା ଦେଇ କହିଛନ୍ତି ଯେ, ଆକ୍ରାନ୍ତଙ୍କ ଚିକିତ୍ସା ସେବା ଗତ ମାସେ ମଧ୍ୟରେ ସାଢେ ୩ ଗୁଣା ହୋଇପାରିଛି ।
– ବର୍ତ୍ତମାନ ଦେଶରେ ୩,୭୭୩ଟି ସ୍ୱତନ୍ତ୍ର କୋଭିଡ ହସ୍ପିଟାଲ ରହଛି
– ଏଠାରେ ଗମ୍ଭୀର ଆକ୍ରାନ୍ତଙ୍କ ପାଇଁ ୧ ଲକ୍ଷ ୯୦ ହଜାର ବେଡ ରହିଛି
– ଗୁରୁତର ରୋଗୀଙ୍କ ପାଇଁ ୨୪,୬୪୪ ଆଇସିୟୁ ବେଡ ରଖାଯାଇଛି
– ଜଟିଳ ସ୍ୱାସ୍ଥ୍ୟ ସମସ୍ୟା ପାଇଁ ୧୨,୩୭୧ ଭେଟିଂଲେଟର ପ୍ରସ୍ତୁତ ରହିଛି
– ସେହିପରି ପ୍ରାଥମିକ ଚିକିତ୍ସା ପାଇଁ ୧ ଲକ୍ଷ ୬୦ ହଜାର ବେଡ ରହିଛି