ବାଲେଶ୍ୱର କୁଳଡିଆ ଅଭୟାରଣ୍ୟରୁ ଜଣେ ଶିକାରୀ ଗିରଫ । ଦେଶୀ ବନ୍ଧୁକ ସହ ମୃତ ସମ୍ବର ଜବତ । ବନ ବିଭାଗର ଚଢାଉ ବେଳେ ୨ ଶିକାରୀ ଫେରାର ।
କନକ ବ୍ୟୁରୋ: ବାଲେଶ୍ୱର ଜିଲ୍ଲା କୁଳଡିହା ଅଭୟାରଣ୍ୟର ଜଙ୍ଗଲ ଜଳୁଥିବା ବେଳେ ଜନବସତି ମୁହାଁ ହେଉଛନ୍ତି ଜଙ୍ଗଲୀ ଜନ୍ତୁ । ଏପରି ସମୟରେ ବନ୍ୟଜନ୍ତୁଙ୍କୁ ଶିକାର କରୁଛନ୍ତି ଶିକାରୀ । କୁଳଡିହା ଅଭୟାରଣ୍ୟର ଜଡାଚୁଆ ଅଂଚଳରୁ ଜଣେ ଶିକାରୀକୁ ଗିରଫ କରିଛି ବନ ବିଭାଗ । ଗିରଫ ଶିକାରୀ ଠାରୁ ଏକ ଦେଶୀ ବନ୍ଧୁକ ଗୁଳି ସହ ଓ ଏକ ମୃତ ସମ୍ବର ଜବତ କରାଯାଇଛି । ଏନେଇ ଏକ ମାମଲା ରୁଜୁ କରି ଗିରଫ ଶିକାରୀକୁ କୋର୍ଟ ଚାଲାଣ କରିଛି ବନ ବିଭାଗ ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ ଅଭୟାରଣ୍ୟକୁ କିଛି ଶିକାରୀ ଶିକାର ପାଇଁ ଯାଇଥିବା ଖବର ପାଇ ବନବିଭାଗ କର୍ମଚାରୀ ଚଢାଉ କରିଥିଲେ । ଚଢାଉ ବେଳେ ଦୁଇ ଶିକାରୀ ଖସିଯାଇଥିବା ବେଳେ ଜଣେ ଶିକାରୀ ଧରାପଡିଥିଲା । ଏବେ ତାକୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି ।
ସେହିପରି ଖୋର୍ଦ୍ଧା ବୋଲଗଡ଼ ଅଂଚଳରୁ ବାଘ ଛାଲ ଜବତ ହୋଇଛି । ଏହି ଘଟଣାରେ ଦୁଇ ଅଭିଯୁକ୍ତ ସୁଧିର ବେହେରା ଓ ସୁବାସ ବେହେରାଙ୍କୁ ଗିରଫ କରିଛି ନୟଗଡ଼ ଏସଟିଏଫ । ବାଘଛାଲ ସମେତ ଶିକାରରେ ବ୍ୟବହୃତ ସମସ୍ତ ସାମଗ୍ରୀ ଜବତ ହୋଇଛି । ଜବତ ବାଘ ଛାଲର ଅଧିକ ତଦନ୍ତ ନେଇ ରାସାୟନିକ ପରୀକ୍ଷା ପାଇଁ ଡ଼େରାଡ଼ୁନ୍ରେ ଥିବା ୱାଇଲ୍ଡ ଲାଇଫ ଇନଷ୍ଟିଚ୍ୟୁସନ ଅଫ୍ ଇଣ୍ଡିଆକୁ ପଠାଯିବ ।
ଏହାରି ଭିତରେ ଏସଟିଏଫ୍ ୧୨ଟି ବାଘ ଛାଲ, ୬ଟି ହାତୀ ଦାନ୍ତ, ୨ଟି ହରିଣ ଛାଲ, ୨ଟି ଜୀବନ୍ତ ବଜ୍ରକାପ୍ତାର ପର୍ଦ୍ଦାଫାଶ କରିଛି । ୧୩ଟି ମାମଲା ରୁଜୁ କରିଛି ଏବଂ ୨୪ଜଣଙ୍କୁ ଗିରଫ କରିଛି । ବନ୍ୟଜନ୍ତୁ ଶିକାର ରୋକିବା ପାଇଁ ହେଲପ ଲାଇନ୍ ନମ୍ବର ଜାରି କରିଛି ଏସଟିଏଫ । ନମ୍ବରଟି ହେଲା ୯୪୩୯୨୬୩୬୪୬ । ଏହି ନମ୍ବରରେ ଫୋନ କରି ତଥ୍ୟ ଦେଲେ ନାମ ଗୋପନ ରଖିବା ସହ ପରୁସ୍କୃତ କରାଯିବ ବୋଲି କୁହାଯାଇଛି ।