କନକ ବ୍ୟୁରୋ: ଜାତୀୟ ରାଜପଥ ମଝିରେ ଜନନୀ ଯନ୍ତ୍ରଣା । କାଦୁଅରେ ଫସିଗଲା ବାଇକ୍ ଆମ୍ବୁଲାନ୍ସ । ସୁନ୍ଦରଗଡ଼ ଜିଲ୍ଲାର ଖଣି ଅଞ୍ଚଳ କୋଇଡାରୁ ଆସିଛି ସ୍ୱାସ୍ଥ୍ୟସେବାର କରୁଣ କାହାଣୀ । ଆମ୍ୱୁଲାନ୍ସ ବାଇକର ବକ୍ସ ଭିତରେ ଫସି ରହିଲେ ମାଆ ଓ ନବଜାତକ ଶିଶୁ । କୋଇଡା ଖଣି ଅଞ୍ଚଳର ଲାଇଫ୍ ଲାଇନ୍ କୁହାଯାଉଥିବା ୫୨୦ ଜାତୀୟ ରାଜପଥରେ ସ୍ଥିତି ଏବେ ଏମିତି ହେଲାଣି ଯେ ଗାଡ଼ି ଠିକ୍‌ରେ ଯାଇପାରୁନି । ସୂଚନା ଅନୁସାରେ ଗତ ୨୪ତାରିଖ ରକ୍ସି ପୁରୁଣାପାଣିର ପ୍ରସୂତି ମୁଗାନ୍ତି ସିଂ ପ୍ରସବ ପାଇଁ କେବଲାଙ୍ଗ ସ୍ୱାସ୍ଥ୍ୟ କେନ୍ଦ୍ର ଆସିଥିଲେ । ପ୍ରସବ ପରେ ହସ୍ପିଟାଲରୁ ଡିସଚାର୍ଜ କରିଥିଲେ ଡାକ୍ତର ।

Advertisment

କେବଲାଙ୍ଗ ପିଏଚସିର ବାଇକ୍ ଆମ୍ବୁଲାନ୍ସ ନବଜାତକ ଶିଶୁ ଓ ମାଆକୁ ନେଇ ତାଙ୍କ ଗ୍ରାମ ପୁରୁଣାପାଣିକୁ ବାହାରିଥିଲେ । କିଛି ବାଟ ଆସିଲା ପରେ ରକ୍ସି ରେଳ ଫାଟକ ନିକଟସ୍ଥ ୫୨୦ ଜାତୀୟ ରାଜପଥର କାଦୁଅରେ ଫସିଯାଇଥିଲା ଆମ୍ବୁଲାନ୍ସ । ବହୁ ସମୟ ଧରି ଯେତେ ଚେଷ୍ଟା କଲେ କାଦୁଅରୁ ବାଇକ ଆମ୍ୱୁଲାନ୍ସ ବାହାରି ପାରିନଥିଲା । ଏହାଦେଖି ରାସ୍ତାରେ ଯାଉଥିବା ଯାତ୍ରୀବାହୀ ବସ୍, ଛୋଟଗାଡି ଅଟକିଯାଇଥିଲେ । ଯାତ୍ରୀମାନେ କାଦୁଅରେ ପଶି ବାଇକ୍ ଆମ୍ବୁଲାନ୍ସକୁ କାଦୁଅରୁ ବାହାର କରିବା ପରେ ମାଆ ଓ ନବଜାତକ ଶିଶୁକୁ ନେଇ ପୁରୁଣାପାଣି ଗାଁରେ ଛାଡିଥିଲା ବାଇକ୍ ଆମ୍ବୁଲାନ୍ସ ।  

ତେବେ କେବଳ ଆମ୍ବୁଲାନ୍ସ ଏଠାରେ ଫସିନଥିଲା ବରଂ ଗତ କିଛିଦିନ ହେଲାଣି ରାଜ୍ୟର ଅନେକ ଜିଲ୍ଲାରୁ ଆମ୍ବୁଲାନ୍ସର ଏମିତି ଚିତ୍ର ସାମ୍ନାକୁ ଆସୁଛି । ଖୋର୍ଦ୍ଧା ବାଲିପାଟଣାରେ ବି ଆମ୍ବୁଲାନ୍ସ କେମିତି ଡେରି କଲା ସେନେଇ ଖବର ପ୍ରକାଶ ପାଇଥିଲା ।  ଜେସିବିରେ ମୂର୍ଛା ହୋଇ ଶୋଇଥିଲେ ଆହତ ଶ୍ରମିକ । ଶ୍ରମିକଙ୍କୁ ନିଆଯାଉଛି ଡାକ୍ତରଖାନା । ଖୋର୍ଦ୍ଧା ବାଲିପାଟଣା ଅଠାନ୍ତର ନୂଆଗାଁ ନିକଟରେ ଏକ ପାଚେରି ଭୁଶୁଡ଼ି ପଡ଼ିବାରୁ ୩ ଶ୍ରମିକ ଗୁରୁତର ହୋଇପଡିଥିଲେ ।

୧୦୮ ଆମ୍ବୁଲାନ୍ସକୁ ବାରମ୍ବାର ଯୋଗାଯୋଗ କଲେ ବି ପହଞ୍ଚିପାରିନଥିଲା । ଶେଷରେ ସ୍ଥାନୀୟ ଲୋକେ ଦୁଇ ଶ୍ରମିକଙ୍କୁ ଜେସିବି ଓ ଆଉ ଜଣଙ୍କୁ ବାଇକ ସହାୟତାରେ ବାଲିପାଟଣା ମେଡିକାଲକୁ ନେଇଥିଲେ । ଶ୍ରମିକ ଗୁରୁତର ଥିବାରୁ କ୍ୟାପିଟାଲ ହସ୍ପିଟାଲ ନେବାକୁ କହିଥିଲେ ଡାକ୍ତର । ଆହତ ଶ୍ରମିକଙ୍କୁ ସ୍ଥାନାନ୍ତର କରିବା ପାଇଁ ୧୦୮ ଆମ୍ବୁଲାନ୍ସ ବିଳମ୍ବରେ ପହଞ୍ଚିଥିଲା । ଆଉ କ୍ୟାପିଟାଲ ହସ୍ପିଟାଲରେ ପହଞ୍ଚିଲା ବେଳକୁ ସବୁ ସରିଯାଇଥିଲା । ଡାକ୍ତର ଦୁଇ ଶ୍ରମିକଙ୍କୁ ମୃତ ଘୋଷଣା କରିଥିଲେ । ତେବେ ଏଠାରେ କେବଳ ଆମ୍ବୁଲାନ୍ସକୁ ଦୋଷ ଦିଆଯାଉନାହିଁ ବରଂ ରାଜ୍ୟରେ ଥିବା ଜାତୀୟ ଓ ରାଜ୍ୟପଥର ସ୍ଥିତି ଏମିତି ହେଲାଣି ଠିକ୍‌ ସମୟରେ ରୋଗୀଙ୍କ ପାଖରେ ପହଞ୍ଚିପାରୁନି ଆମ୍ବୁଲାନ୍ସ ।