ସାବାଡ୍ ହେବେ ରୋଡ୍ ରୋମିଓ…ଝିଅଙ୍କୁ ହଇରାଣ କଲେ ପୁଲିସ୍ ପଠାଇବ ନାଲିକାର୍ଡ…ସ୍ୱତନ୍ତ୍ର ଆଇନ ବଳରେ ବର୍ଷେ ପାଇଁ ଯୁବକଙ୍କୁ କରାଯିବ ତଡିପାର
ମହିଳା ସଶକ୍ତିକରଣକୁ କମିଶନରେଟ୍ ପୁଲିସର ଗୁରୁତ୍ୱ
କନକ ବ୍ୟୁରୋ: ପାନେ ପାଇବେ ରୋଡ୍ ରୋମିଓ । ଏଣିକି ମହିଳାଙ୍କୁ କମେଂଟ କିମ୍ବା ହଇରାଣ ହରକତ କଲେ ଆଉ ନିସ୍ତାର ପାଇବେନି ରୋଡ୍ ରୋମିଓ । ଏପରିକି ଅଭିଯୋଗରେ ସତ୍ୟତା ଥିଲେ ଉକ୍ତ ଯୁବକଙ୍କୁ ବର୍ଷେ ପାଇଁ କରାଯିବ ତଡିପାର । ଆଜି କମିଶନରେଟ୍ ପୁଲିସର ୧୨ତମ ପ୍ରତିଷ୍ଠା ଦିବସ ଅବସରରେ ମହିଳାଙ୍କ ସୁରକ୍ଷାକୁ ଅଧିକ ଗୁରୁତ୍ୱ ଦେଇ ଏଭଳି ଏକ କଠୋର ନିଷ୍ପତି ଶୁଣାଇଛନ୍ତି ପୋଲିସ୍ କମିଶନର ସୁଧାଂଶୁ ଷଡଙ୍ଗୀ ।
Kanak News is now on WhatsApp
Join and get latest news updates delivered to you via WhatsApp
ଏଥିପାଇଁ କମିଶନରେଟ୍ ପୁଲିସ୍ ପକ୍ଷରୁ ସାଧାରଣ ମହିଳାଙ୍କୁ ନେଇ ଏକ ସ୍ୱତନ୍ତ୍ର ପୋଲିସ ଅଫିସର ବା ଏସପିଓ ଭାବେ ନିଯୁକ୍ତି ଦିଆଯାଇଛି । ଯେଉଁଥିରେ ପାଖାପାଖି ୨୪୬ ଜଣ ମହିଳା ସାମିଲ ହୋଇଛନ୍ତି । ତେବେ ବଡ କଥା ହେଲା କି, ଏମାନେ ପୋଲିସକୁ ସବୁପ୍ରକାରର ସୂଚନା ଦେବେ । ଏପରିକି ସେମାନେ ଚାହିଁଲେ ଅଭିଯୁକ୍ତଙ୍କୁ ଗିରଫ ମଧ୍ୟ କରିପାରିବେ । ଏଥିପାଇଁ ଏମାନଙ୍କୁ ସାମିୟକ ଭାବେ ୩ ମାସ ପାଇଁ ନିଯୁକ୍ତି ଦିଆଯାଇଛି । କାହାକୁ ସୁରକ୍ଷା ଦରକାର, କେଉଁଠି ମହିଳାଙ୍କ ଉପରେ ଅତ୍ୟାଚାର ହେଉଛି ଏସବୁ ଦିଗରେ କଡା ନଜର ରଖିବେ ଏହି ଏସପିଓର ସଦସ୍ୟମାନେ ।
ସେହିଭଳି ଯଦି କୌଣସି ଯୁବକ ଝିଅମାନଙ୍କୁ କମେଂଟ ବା ହଇରାଣ ହରକତ କରୁଥିବାର ନଜର ଆସନ୍ତି ତେବେ ତାକୁ ଏକ ନାଲିକାର୍ଡ ନୋଟିସ କରାଯିବା ସହ ଉକ୍ତ ଯୁବକର ଅଭିଭାବକ କିମ୍ବା ଓକିଲ ଏବାବଦରେ ଉତର ରଖିବାକୁ ନିର୍ଦ୍ଦେଶ ଦିଆଯିବ । ଆଉ ଯଦି ସେମାନଙ୍କ ଉତର ସନ୍ତୋଷଜନକ ନହୁଏ ତେବେ ଉକ୍ତ ଯୁବକ ଜଣକ ଯେଉଁ ଜାଗାରେ ମହିଳାଙ୍କୁ ହଇରାଣ ବା କମେଂଟ ମାରୁଥିଲେ ସେଠାରୁ ତାଙ୍କୁ ସ୍ୱତନ୍ତ୍ର ଆଇନ ବଳରେ ବର୍ଷେ ଯାଏଁ ନ ଆସିବାକୁ ନିର୍ଦ୍ଦେଶ ଦିଆଯିବ ବା ବର୍ଷେ ପାଇଁ ଉକ୍ତ ସ୍ଥାନରୁ ତଡିପାର କରାଯିବ ବୋଲି କହିଛନ୍ତି ପୋଲିସ୍ କମିଶନର ସୁଧାଂଶୁ ଷଡଙ୍ଗୀ ।