କନକ ବ୍ୟୁରୋ : ଦିନ ଦୁଇଟା ପରେ ପାଟକୁରା ନିର୍ବାଚନ । ଆସନ୍ତା ୨୦ ତାରିଖରେ ପାଟକୁରା ବିଧାନସଭା ଆସନ ପାଇଁ ମତଦାନ ହେବ । ଆଉ ଏହାକୁ ଦୃଷ୍ଟିରେ ରଖି ପାଟକୁରା ଭୋଟରଙ୍କ ପାଇଁ ୨୦ ତାରିଖକୁ ଛୁଟି ଘୋଷଣା କରିଛନ୍ତି ସରକାର । ଆସନ୍ତା ୨୦ ଅଥାର୍ତ ଶନିବାର ଦିନ ପାଟକୁରାର ସବୁ ଶିଳ୍ପସଂସ୍ଥା, ଦୋକାନ ଓ ବ୍ୟବସାୟିକ ପ୍ରତିଷ୍ଠାନ ଛୁଟି ରହିବ। ନିର୍ବାଚନ ଦିନଟିକୁ ସବୈତନିକ ଛୁଟି ଦିବସ ଭାବେ ଗ୍ରହଣ କରାଯିବ।
Kanak News is now on WhatsApp
Join and get latest news updates delivered to you via WhatsApp
ଏହାପୂର୍ବରୁ ଆଜି ପାଟକୁରା ମୁକାବିଲାର ପ୍ରଚାର ମୈଦାନକୁ ଓହ୍ଲାଇଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ । ଡେରାବିଶ୍ ଏବଂ ଗରଦପୁର ବ୍ଲକରେ ଆଜି ପ୍ରଚାର କରିଛନ୍ତି ନବୀନ । କେବଳ ପ୍ରଚାର କରି ନାହିଁନ୍ତି, ବରଂ ପାଟକୁରା ଉପରେ ନଜର ରଖିବାକୁ ଦଳୀୟ ବିଧାୟକ ଓ ନେତାଙ୍କୁ ତାଗିଦ୍ କରିଛନ୍ତି ଦଳୀୟ ସୁପ୍ରିମୋ । ନିର୍ବାଚନକୁ ମଝିରେ ଆଉ ଦୁଇ ଦିନ ବାକି ଥିବା ବେଳେ ଅନ୍ତିମ ପର୍ଯ୍ୟାୟରେ ବିଜେଡି ପ୍ରାର୍ଥୀଙ୍କ ପାଇଁ ଭୋଟ୍ ମାଗିଛନ୍ତି ନବୀନ ପଟ୍ଟନାୟକ ।
ସେହିଭଳି ବିଜେପି ପ୍ରାର୍ଥୀ ବିଜୟ ମହାପାତ୍ରଙ୍କ ପାଇଁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ପ୍ରତାପ ଷଡଙ୍ଗୀଙ୍କ ସମେତ ସାଂସଦ ଅପରାଜିତା ଷଡଙ୍ଗୀ, ବିଜେପି ମୁଖପାତ୍ର ସମ୍ବିତ ପାତ୍ର, ବିଜେପି ଉପସଭାପତି ବୈଜୟନ୍ତ ପଣ୍ଡା ମଧ୍ୟ ପ୍ରଚାର ମୈଦାନକୁ ଓହ୍ଲାଇଛନ୍ତି । ଏହାପୂର୍ବରୁ ବିଜେଡି ବିଧାୟକ ପ୍ରାର୍ଥୀ ବେଦ ପ୍ରକାଶ ଅଗ୍ରୱାଲଙ୍କ ଦେହାନ୍ତ ପରେ ପାଟକୁରା ନିର୍ବାଚନକୁ ଘୁଞ୍ଚାଇ ଦିଆଯାଇଥିଲା । ଆଉ ଏହାକୁ ଆହୁରି ବିଳମ୍ବ କରିଥିଲା ବାତ୍ୟା ଫୋନି । ଆଉ ସାଧାରଣ ନିର୍ବାଚନ ଶେଷ ହେବା ପରେ ଆସନ୍ତା ୨୦ ତାରିଖରେ ପାଟକୁରାରେ ମତଦାନ କରିବା ତାରିଖ ଘୋଷଣା କରିଥିଲେ ନିର୍ବାଚନ କମିଶନ । ୨୦ ତାରିଖରେ ନିର୍ବାଚନ ହେବା ସହ ୨୪ ତାରିଖରେ ଭୋଟ ଗଣତି ହେବ । ଏସବୁ ଭିତରେ ପାଟକୁରାରେ କିଏ ବାଜିମାତ କରିବ ତାହା ଉପରେ ସମସ୍ତଙ୍କର ନଜର ରହିଛି ।