ହାତ ଖୋଲିଦେଲେ ସରକାର ! ବଜେଟରେ ସବୁ ବର୍ଗର ଲୋକଙ୍କ ପାଇଁ ଆଣିଲେ ନୂଆ ଯୋଜନା
କନକ ବ୍ୟୁରୋ : ଆଜି ବିଧାନସଭାରେ ୨୦୧୭-୧୮ ଆର୍ଥିକ ବର୍ଷର ରାଜ୍ୟ ବଜେଟ୍ ଉପସ୍ଥାପନ କରିଛନ୍ତି ଅର୍ଥମନ୍ତ୍ରୀ ପ୍ରଦୀପ ଅମାତ । ଚଳିତବର୍ଷରେ ମୋଟ୍ ପରିମାଣ ରହିଛି ୧ ଲକ୍ଷ ୬ ହଜାର ୯୧୧ କୋଟି । ବଜେଟରେ ସବୁ ବର୍ଗର ଲୋକଙ୍କୁ ନଜରରେ ରଖି ବଜେଟ୍ ଉପସ୍ଥାପନ କରାଯାଇଛି । କୃଷି, ଜଳଚେସନ, ଶିକ୍ଷା, ଦକ୍ଷତା ବିକାଶ, ସ୍ୱାସ୍ଥ୍ୟ, ଗମନାଗମନ, ସହରାଂଚଳ ବିକାଶ, ଶିଶୁ କଲ୍ୟାଣ ଏବଂ ଛାତ୍ରଙ୍କୁ ବିଶେଷ ଧ୍ୟାନ ଦିଆଯାଇଛି । ଏହି ସବୁ ଦିଗ ପାଇଁ ବହୁ ନୂଆ ଯୋଜନା ସବୁ ଆଣିଛନ୍ତି ରାଜ୍ୟ ସରକାର ।
Kanak News is now on WhatsApp
Join and get latest news updates delivered to you via WhatsApp
ସେହିପରି ରାଜ୍ୟରେ ଅଭିବୃଦ୍ଧି ହାର ଜାତୀୟ ତୁଳନାରେ ବେଶ ଅଧିକ ଥିବା ସୂଚନା ଦେଇଛନ୍ତି ଅର୍ଥମନ୍ତ୍ରୀ ପ୍ରଦୀପ ଅମାତ । ବିମୁଦ୍ରାକରଣ ପରେ ରାଜ୍ୟରେ ପ୍ରତିକୁଳ ପ୍ରଭାବ ପଡିଥିବା ମଧ୍ୟ ବଜେଟ୍ ଅଭିଭାଷଣ ବେଳେ ସୂଚନା ଦେଇଛନ୍ତି ଅର୍ଥମନ୍ତ୍ରୀ । କୃଷି କ୍ଷେତ୍ରରେ ଦ୍ରୁତ ଅଭିବୃଦ୍ଧି ହୋଇଥିବା ମନ୍ତ୍ରୀ ଗୃହରେ ସୂଚନା ଦେଇଛନ୍ତି । ୫ଥରରୁ ୪ ଥର ରାଜ୍ୟ କୃଷି କର୍ମଣ ପୁରସ୍କାର ପାଇଥିବା ସେ ସୂଚନା ଦେଇଛନ୍ତି । ସେହିପରି ଶିକ୍ଷା ଓ ଛାତ୍ରଙ୍କ ଦକ୍ଷତା ବିକାଶ ଉପରେ ଏହି ବଜେଟରେ ବିଶେଷ ଧ୍ୟାନ ଦିଆଯାଇଛି ।
ପଂଚାୟତ ନିର୍ବାଚନରେ ଝଟକା ଖାଇବା ପରେ, ହାତ ଖୋଲି ଦେଇଛନ୍ତି ନବୀନ ସରକାର । ବଜେଟରେ ନୂଆ ଯୋଜନାର ପସରା । ରାଜକୋଷ ଖୋଲି ଦେଲେ ଅର୍ଥମନ୍ତ୍ରୀ । ନୂଆ ଭୋଟ୍ ବ୍ୟାଙ୍କ ତିଆରି କରିବା ପାଇଁ ଚଳିତବର୍ଷରେ ଆସିଛି ଅନେକ ନୂଆ ଯୋଜନା । ଗାଁ ପରେ ଏବେ ସହରାଂଚଳ ଉପରେ ବିଜେଡି ଶାସନର ନଜର ।
ପୁରୀ ସହରର ସାମଗ୍ରିକ ବିକାଶ ପାଇଁ ରାଜ୍ୟ ସରକାର ଆଣିଛନ୍ତି ନୂଆ ଯୋଜନା ଅବଢ଼ା । ଏଥିପାଇଁ ବ୍ୟୟବରାଦ ରହିଛି ଶହେ କୋଟି ଟଙ୍କା । ପୁରୀ ସହରକୁ ବିଶ୍ୱସ୍ତରୀୟ ଐତିହ ସମ୍ପନ ନଗରୀରେ ପରିଣତ କରିବା ହେଉଛି ଏହି ଯୋଜନାର ଉର୍ଦ୍ଦେଶ୍ୟ । ଯେଉଁଥରେ ପୁରୀକୁ ଆସୁଥିବା ଭକ୍ତ ଏବଂ ବିଦେଶାଗତ ପର୍ଯ୍ୟଟକ ଏହା ଦ୍ୱାରା ଉପକୃତ ହେବେ । ସେହିପରି ବିଜେପି ପରେ ଏବେ ଶାସକ ବିଜେଡିକୁ ମନେ ପଡ଼ିଛି ବକ୍ସିଜଗବନ୍ଧୁଙ୍କ ନାଁ । ପାଇକ ବିପ୍ଲବର ଏହି ସୁତ୍ରଧରଙ୍କ ନାଁରେ ବକ୍ସି ଜଗବନ୍ଧୁ ନିଶ୍ଚିତ ଜଳ ଯୋଗାଣ-ବସୁଧା ଯୋଜନା ଆଣିଛନ୍ତି ସରକାର । ଏଥିପାଇଁ ଏକ ହଜାର ୬୫ କୋଟି ଟଙ୍କାର ବ୍ୟୟବରାଦ ହୋଇଛି ।
ସହରାଚଂଳ ଏବଂ ଗ୍ରାମାଚଂଳରେ ଜଳ ଯୋଗାଣ ଦିଗରେ ଏହି ଯୋଜନା କାର୍ଯ୍ୟକରିବ । ସହରାଚଂଳ ଏବଂ ଗ୍ରାମାଚଂଳ ପାଇଁ ଅଲଗା ଅଲଗା ଭାବରେ ଏହା କାମ କରିବ । ସହରାଂଚଳ ପାଇଁ ୩୧୫ କୋଟି ଏବଂ ଗ୍ରାମାଚଂଳ ପାଇଁ ୭୫୦ କୋଟି ବୟବରାଦ କରାଯାଇଛି । ମାଳତୀଦେବୀ ପ୍ରାକ୍ ବିଦ୍ୟାଳୟ ପରିଧାନ ଯୋଜନା ନାଁରେ ଏକ ନୂଆଁ ଯୋଜନା ଆଣିଛନ୍ତି ସରକାର । ଏଥି ପାଇଁ ୩୪ କୋଟି ବ୍ୟୟବରାଦ କରାଯାଇଛି । ଯେଉଁଥିରେ କୁନି କୁନି ପିଲାଙ୍କ ପାଇଁ ପରିଧାନ ବ୍ୟବସ୍ଥା କରାଯିବ ।
ସେହିପରି ନଗର ରୁପାନ୍ତରିକରଣ ଉଦ୍ୟମ ପାଇଁ ଉନ୍ନତି ନାଁରେ ଏକ ଯୋଜନା ଆଣିଛନ୍ତି ରାଜ୍ୟ ସରକାର । ଏଥି ପାଇଁ ବ୍ୟୟବରାଦ ରହିଛି ୨୯୮ କୋଟି । ସହରାଚଂଳ ରାସ୍ତା ଏବଂ ନାଗରିକ ସୁବିଧା ପାଇଁ ଏହି ଯୋଜନାରେ କାର୍ଯ୍ୟକ୍ରମ ସବୁ ହାତକୁ ନିଆଯିବ । ମୁଖ୍ୟମନ୍ତ୍ରୀ ମହିଳା ସଶକ୍ତିକରଣ ଯୋଜନା ଏବଂ ମୁଖ୍ୟମନ୍ତ୍ରୀ ସ୍ୱାସ୍ଥ୍ୟ ସେବା ମିଶନ ନାଁରେ ଦୁଇଟି ନୂଆ ଯୋଜନା ଆଣିଛନ୍ତି ରାଜ୍ୟ ସରକାର । ଏଥିପାଇଁ ଯଥାକ୍ରମେ ୯୦ କୋଟି ଏବଂ ୫ କୋଟି ରଖାଯାଇଛି । ସେହିପରି ବରିଷ୍ଠ ବୁଣାକାର ସହାୟତା ଯୋଜନା ଆଣିଛନ୍ତି ସରକାର । ଏଥିପାଇଁ ୫ କୋଟି ଟଙ୍କା ବ୍ୟୟବରାଦ କରାଯାଇଛି । ଏଥି ଯୋଜନାରେ ୬୦ରୁ ୮୦ ବର୍ଷ ବୟସ୍କ ବୁଣାକାରଙ୍କ ପାଇଁ ୫ଶହ ଏବ୦ ୭ଶହ ଟଙ୍କା ଭତା ଯୋଗାଇ ଦିଆଯିବ ।
ବିଚ୍ଛିନ୍ନାଚଂଳ ଗାଁକୁ ସଂଯୋଗିକରଣ ଯୋଜନା ନାଁରେ ଏକ ନୂଆ ଯୋଜନା ପାଇଁ ୫୦ କୋଟି ଟଙ୍କା ବ୍ୟୟବରାଦ କରାଯାଇଛି । ଏହି ଯୋଜନାରେ ୧୭ଟି ମାଓ ପ୍ରଭାବିତ ଜିଲ୍ଲାର ୧୪୨ଟି ଗାଁକୁ ସଂଯୋଗ କରିବା ପାଇଁ ପଦକ୍ଷେପ ଗ୍ରହଣ କରାଯିବ । ସେହିପରି ରାଜ୍ୟ ମୁକ୍ତ ବିଦ୍ୟାଳୟ ପ୍ରତିଷ୍ଠାନ ପାଇଁ ୫ କୋଟି ଟଙ୍କା ବ୍ୟୟବରାଦ କରାଯାଇଛି । ଏଥିରେ ସାଧାରଣ ଯୁବକ ଯୁବତୀ ଯେଉଁମାନେ ପାଠପଢ଼ାରୁ ବଂଚିତ ହୋଇଛନ୍ତି ସେମାନଙ୍କ ପାଠପଢ଼ା ଦିଗରେ ଏହି ପ୍ରତିଷ୍ଠାନ କାର୍ଯ୍ୟ କରିବ ।