କ୍ରିକେଟକୁ ବାଏ ବାଏ କଲେ ୟର୍କର କିଙ୍ଗ ମାଲିଙ୍ଗା । ପ୍ରଂଶସକଙ୍କ ପାଇଁ କହିଲେ କିଛି ଏମିତି କଥା… ।
କନକ ବ୍ୟୁରୋ : କ୍ରିକେଟକୁ ବାଏ ବାଏ କଲେ ୟର୍କର କିଙ୍ଗ୍ ଲାସିଥ ମାଲିଙ୍ଗା । ଟି-୨୦ କ୍ରିକେଟରୁ ସନ୍ନ୍ୟାସ ନେବା ସହ ଅର୍ନ୍ତଜାତୀୟ କ୍ରିକେଟକୁ ଅଲବିଦା କହିଛନ୍ତି ଶ୍ରୀଲଙ୍କାର ଘାତକ ବୋଲର ମାଲିଙ୍ଗା । ଏନେଇ ନିଜ ଟ୍ୱିଟର ପେଜରେ ସୂଚନା ଦେଇଛନ୍ତି ମାଲିଙ୍ଗା । ଚଳିତବର୍ଷ ମୁମ୍ବାଇ ଇଣ୍ଡିଆନ୍ସ ଦଳରୁ ରିଲିଜ କରିବା ପରେ ଫ୍ରାଞ୍ଚାଇଜ୍ କ୍ରିକେଟରୁ ଅବସର ନେଇଥିଲେ ମାଲିଙ୍ଗା । ଆଉ ଟି-୨୦ କ୍ରିକେଟରୁ ଅବସର ନେବା ସହ ପୂରା କ୍ରିକେଟ କ୍ୟାରିୟରରେ ପୂର୍ଣ୍ଣଚ୍ଛେଦ ପକାଇଛନ୍ତି ମାଲିଙ୍ଗା ।
Kanak News is now on WhatsApp
Join and get latest news updates delivered to you via WhatsApp
୨୦୦୪ ମସିହାରେ ଶ୍ରୀଲଙ୍କା ପକ୍ଷରୁ କ୍ରିକେଟ କ୍ୟାରିୟର ଆରମ୍ଭ କରିଥିବା ମାଲିଙ୍ଗା ନିଜର ୟର୍କର ପାଇଁ ବେଶ ପରିଚିତ । ମାଲିଙ୍ଗାଙ୍କ ୟର୍କର ବ୍ୟାଟସମ୍ୟାନଙ୍କ ମନରେ ଆଉଟ ହେବାର ଭୟ ସୃଷ୍ଟି କରୁଥିଲା । ଆଉ ଏହି ୟର୍କରକୁ ସାଥୀ କରି ଏକଦା ଶ୍ରୀଲଙ୍କାର ଶ୍ରେଷ୍ଠ ତଥା ଘାତକ ବୋଲର ଭାବେ ଜଣାଶୁଣା ଥିଲେ ମାଲିଙ୍ଗା । ଏହାଛଡା ଆଇପିଏଲ ଓ ବିଗ୍ ବାସ ଲିଗରେ ମଧ୍ୟ ମାଲିଙ୍ଗାଙ୍କ ପ୍ରଦର୍ଶନ ବେଶ ଭଲ ରହିଥିଲା । ମୁମ୍ବାଇ ପକ୍ଷରୁ ଲଗାତାର ଖେଳି ଆସୁଥିବା ମାଲିଙ୍ଗାଙ୍କୁ ଚଳିତବର୍ଷ ଦଳ ରିଲିଜ କରି ଦେଇଥିଲା । ଆଉ ଏହାପରେ ପୁଣିଥରେ କ୍ରିକେଟ ପଡିଆକୁ ଫେରିବା ମାଲିଙ୍ଗାଙ୍କ ପାଇଁ ସହଜ ହୋଇନଥିଲା ।
Hanging up my #T20 shoes and #retiring from all forms of cricket! Thankful to all those who supported me in my journey, and looking forward to sharing my experience with young cricketers in the years to come.https://t.co/JgGWhETRwm #LasithMalinga #Ninety9
— Lasith Malinga (@ninety9sl) September 14, 2021
ନିଜ ବୋଲିଂ ଶୈଳୀ ପାଇଁ ପ୍ରତିଟି କ୍ରିକେଟପ୍ରେମୀଙ୍କ ପାଖରେ ପରିଚିତ ହୋଇଥିଲେ ମାଲିଙ୍ଗା । ଖାସକରି ଟି-୨୦ ଫର୍ମାଟରେ ମାଲିଙ୍ଗାଙ୍କ ଜବରଦସ୍ତ କ୍ରେଜ ରହିଥିଲା । ମାଲିଙ୍ଗା ନିଜ କ୍ରିକେଟ କ୍ୟାରିୟରରେ ମୋଟ ୨୯୫ଟି ଟି-୨୦ ମ୍ୟାଚ୍ ଖେଳି ମାଲିଙ୍ଗା ୩୯୦ଟି ୱିକେଟ ହାସଲ କରିଥିଲେ । ସେହିଭଳି ୨୧ ବର୍ଷର ଅର୍ନ୍ତଜାତୀୟ କ୍ରିକେଟ କ୍ୟାରିୟରରେ ଶ୍ରୀଲଙ୍କା ପାଇଁ ୩୦ଟି ଟେଷ୍ଟ, ୨୨୬ଟି ଦିନିକିଆ ଓ ୮୪ଟି ଟି-୨୦ ମ୍ୟାଚ୍ ଖେଳି ଯଥାକ୍ରମେ ୧୦୧, ୩୩୮ ଓ ୧୦୭ଟି ୱିକେଟ ହାସଲ କରିଛନ୍ତି ମାଲିଙ୍ଗା । ଏପରିକି ମାଲିଙ୍ଗାଙ୍କ ନାଁରେ ସର୍ବାଧିକ ୫ଟି ହ୍ରାଟିକ ୱିକେଟ ନେବାର ରେକର୍ଡ ରହିଛି । ସେହିଭଳି ଆଇପିଏଲରେ ମଧ୍ୟ ୧୭୦ଟି ୱିକେଟ ନେଇଛନ୍ତି ମାଲିଙ୍ଗା । ଶ୍ରୀଲଙ୍କାକୁ ଟି-୨୦ ବିଶ୍ୱକପ ବିଜେତା କରିବା ପଛରେ ମଧ୍ୟ ମାଲିଙ୍ଗାଙ୍କ ବଡ ଅବଦାନ ରହିଛି ।
ଏହାପୂର୍ବରୁ ୨୦୧୧ରେ ଟେଷ୍ଟ କ୍ରିକେଟରୁ ଓ ୨୦୧୯ରେ ଦିନିକିଆ କ୍ରିକେଟରୁ ଅବସର ନେଇ ସାରିଛନ୍ତି ମାଲିଙ୍ଗା । ଟ୍ୱିଟ୍ କରି ମାଲିଙ୍ଗା କହିଛନ୍ତି, ମୋ ବୋଲିଂ ଜୋତାକୁ ଟି-୨୦ କ୍ରିକେଟରୁ ଆରାମ ଦେଉଛି ଏବଂ ସମସ୍ତ ପ୍ରକାର କ୍ରିକେଟ ଫର୍ମାଟରୁ ଅବସର ନେଉଛି । କ୍ରିକେଟ କ୍ୟାରିୟରରେ ମୋତେ ସମର୍ଥନ କରିଥିବା ଏବଂ ଭଲପାଇବା ଦେଇଥିବା ସମସ୍ତ ବ୍ୟକ୍ତିଙ୍କୁ ଧନ୍ୟବାଦ । ଏଣିକି ମୋ ଅନୁଭୂତି ଯୁବ ଖେଳାଳିଙ୍କ ସହ ସେୟାର କରିବି । କ୍ରିକେଟରୁ ସିନା ମୋ ଜୋତା ଆରାମ କରିଛି କିନ୍ତୁ କ୍ରିକେଟ ପ୍ରତି ଥିବା ଭଲପାଇବା ମୋତେ କେବେ ଆରାମ ନେବାକୁ କହିବ ନାହିଁ ।