ବର୍ଷା ଧୋଇଦେଲା ଚାଷୀର ବର୍ଷକ ପରିଶ୍ରମ ! ସବୁ ଜିଲ୍ଲାପାଳଙ୍କୁ ଏସଆରସିଙ୍କ ଚିଠି , ୨୫ ସୁଦ୍ଧା ବର୍ଷା କ୍ଷୟକ୍ଷତି ଆକଳନ ନିର୍ଦ୍ଦେଶ
କନକ ବ୍ୟୁରୋ: ଲଗାଣ ବର୍ଷାରେ କ୍ଷୟକ୍ଷତି ଆକଳନ କରିବାକୁ ସବୁ ଜିଲ୍ଲାକୁ ନିର୍ଦ୍ଦେଶ । ଦୀର୍ଘ ୩ ଦିନ ଧରି ଲଗାଣ ବର୍ଷା ଫଳରେ କ୍ଷତି ହୋଇଥିବା ଧାନ ଜମି ସଂପର୍କରେ ଆକଳନ କରିବାକୁ ତତ୍ପରତା ପ୍ରକାଶ କରିଛନ୍ତି ରାଜ୍ୟ ସରକାର । ଏ ନେଇ ସ୍ୱତନ୍ତ୍ର ରିଲିଫ କମିଶନର ବିଷ୍ଣୁପଦ ସେଠୀ ସବୁ ଜିଲ୍ଲାପାଳଙ୍କୁ ଏକ ଜରୁରୀ ଚିଠି ଲେଖିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏଥିରେ କୁହାଯାଇଛି, ବଙ୍ଗୋପସାଗରରେ ଅବପାତ କାରଣରୁ ରାଜ୍ୟର ଅଧିକାଂଶ ଜିଲ୍ଲାରେ ୧୫ରୁ ୧୭ ତାରିଖ ଯାଏ ବର୍ଷା ହୋଇଛି । ଏଭଳି ଅଦିନିଆ ବର୍ଷା ଖରିଫ ଫସଲରେ ଯଥେଷ୍ଟ କ୍ଷତି ପହଂଚାଇଛି । ଗତ ୧୬ ତାରିଖଦିନ ଭିଡିଓ କନଫରେନ୍ସିଂରେ କ୍ଷୟକ୍ଷତିର ହିସାବ ୭ ଦିନ ଭିତରେ ଦେବା ପାଇଁ ଏସଆରସିଙ୍କୁ ନିର୍ଦ୍ଦେଶ ଦେଇଥିଲେ । ୩୩ ପ୍ରତିଶତରୁ ଅଧିକ କ୍ଷତି ହୋଇଥିବା ଜମିର ହିସାବ ଦେବାକୁ କହିଥିଲେ ମୁଖ୍ୟମନ୍ତ୍ରୀ । ଶ୍ରୀ ସେଠୀ ଦର୍ଶାଇଛନ୍ତି ଯେ, ଚଳିତବର୍ଷ ଚାଷୀ ମରୁଡି ଓ ପୋକ ଆକ୍ରମଣରେ ଗଭୀର ପ୍ରଭାବିତ ହୋଇଛି । ହେଲେ ବର୍ତ୍ତମାନ ଯେଉଁ ଅଦିନିଆ ବର୍ଷା ହେଲା ସେଥିରେ ୩୩ ପ୍ରତିଶତରୁ ଅଧିକ ପାଇଁ କ୍ଷତିଗ୍ରସ୍ତ ଚାଷୀ ଏସଡିଆରଏଫ୍ ଅନୁସାରେ ଇନ୍ ପୁଟ୍ ସବସିଡି ପାଇବାକୁ ହକଦାର । ଏଣୁ କେଉଁ କେଉଁ ଗାଁର ଜମି ଓ ନିର୍ଦିଷ୍ଟ କେତେ ଚାଷୀ ଅଦିନିଆ ବର୍ଷା ଯୋଗୁଁ ୩୩ ପ୍ରତିଶତରୁ ଅଧିକ କ୍ଷତି ସହିଛନ୍ତି, ତାର ତାଲିକା ଆସନ୍ତା ୨୫ ତାରିଖ ସୁଦ୍ଧା ଜିଲ୍ଲାପାଳ ନିଶ୍ଚିତ ଦେବା ଦରକାର ।
ଉଲ୍ଲେଖଯୋଗ୍ୟ, ଅଦିନିଆ ବର୍ଷା ପରିମାଣରେ ପୁରୀ, ଗଞ୍ଜାମ, ଗଜପତି ଠାରୁ ଆରମ୍ଭ କରି କେନ୍ଦ୍ରାପଡା, ଜଗତସିଂହପୁର ଯାଏ ଉପକୂଳବର୍ତ୍ତୀ ପାଖାପାଖି ୧୬ଟି ଜିଲ୍ଲାରେ ଫସଲ ବ୍ୟାପକ ନଷ୍ଟ ହୋଇଛି । ବାଲୁଗାଁରେ ପାଣିରେ ଭିଜୁଛି ହେକ୍ଟର ହେକ୍ଟର ଫସଲ । ଯାଜପୁରରେ ମଧ୍ୟ ସମାନ ଅବସ୍ଥା । ଏସବୁ ଘଟଣା ଚାଷୀର ଆର୍ଥିକ ସ୍ଥିତିକୁ ଦୋହଲାଇ ଦେଇଛି ।