କନକ ବ୍ୟୁରୋ: ଯୋସେଫ୍ ଏଡୱାର୍ଡ ରୁଟ୍ ଅର୍ଥାତ୍ ଜୋ ରୁଟ୍ ଏବେ ଟେଷ୍ଟ୍ ରନ୍ ତାଲିକାରେ ମାଷ୍ଟର୍ ବ୍ଲାଷ୍ଟର୍ ସଚିନ ତେନ୍ଦୁଲକରଙ୍କ ପାଖାପାଖି ପହଞ୍ଚି ଯାଇଛନ୍ତି । ସଚିନ ତାଙ୍କ ୨୦୦ ଟେଷ୍ଟ୍ କ୍ୟାରିୟରରେ ମୋଟ୍ ୧୫,୯୨୧ ରନ୍ ସହ ଶୀର୍ଷରେ ରହିଥିବାବେଳେ ରୁଟ୍ ମାଞ୍ଚେଷ୍ଟର୍ ଟେଷ୍ଟରେ ଶତକୀୟ ପାଳି ସହ ଦ୍ଵିତୀୟ ସ୍ଥାନକୁ ଲମ୍ଫ ମାରିଛନ୍ତି । ରୁଟ୍ ୧୫୭ଟି ଟେଷ୍ଟରୁ ୧୩,୪୦୯ ରନ୍ ସଂଗ୍ରହ କରିସାରିଛନ୍ତି । ରୁଟ୍ ଶୁକ୍ରବାର ତାଙ୍କ ପାଳି ଅବସରରେ ୩ ମହାନ ବ୍ୟାଟର୍ ରାହୁଲ ଦ୍ରାବିଡ଼ (୧୬୪ ଟେଷ୍ଟ, ୧୩,୨୮୮ ରନ୍), ଜ୍ୟାକ୍ କାଲିସ୍ (୧୬୬ ଟେଣ୍ଟ୍‌, ୧୩,୨୮୯ ରନ୍) ଏବଂ ରିକି ପଣ୍ଟିଂ (୧୬୮ ଟେଷ୍ଟ, ୧୩,୩୭୮ ରନ୍)ଙ୍କୁ ପଛରେ ପକାଇଛନ୍ତି । ପ୍ରଥମ ପଦାର୍ପଣ କରିଥିବା ଅଂଶୁଲ କମ୍ବୋଜଙ୍କୁ ଚୌକା ମାରି ଶତକ ପୂର୍ଣ୍ଣ କରିଥିଲେ । ଯାହାକି ରୁଟ୍‌ଙ୍କ ଟେଷ୍ଟ୍ ଜୀବନର ୩୮ତମ ଏବଂ ଭାରତ ବିପକ୍ଷରେ ୧୨ତମ ଶତକ ହୋଇଥିଲା ।

Advertisment

ସବୁଠାରୁ ବଡ଼କଥା ହେଲା ଭାରତ ବିପକ୍ଷରେ ଟେଷ୍ଟ ମ୍ୟାଚରେ ଏତେ ଶତକ ଅନ୍ୟ କୌଣସି ବ୍ୟାଟର୍ ହାସଲ କରିନାହାନ୍ତି । ରୁଟ୍ ଷ୍ଟିଭେନ୍‌ ସ୍ମିଥଙ୍କୁ ପଛରେ ପକାଇ ଏହି ରେକର୍ଡ କରିଛନ୍ତି । ସର୍ବାଧିକ ଟେଷ୍ଟ୍ ଶତକ ତାଲିକାରେ ରୁଟ୍ ମଧ୍ୟ ଶୁକ୍ରବାର ଚତୁର୍ଥ ସ୍ଥାନକୁ ଉଠି କୁମାର ସାଙ୍ଗାକାରଙ୍କ ସହ ଯୁଗ୍ମ ଭାବେ ରହିଛନ୍ତି । ଉଭୟ ୩୮ ଶତକ ମାରିଥିବା ବେଳେ ତାଙ୍କଠାରୁ ଆଗରେ ରହିଛନ୍ତି ସଚିନ ତେନ୍ଦୁଲକର ୫୧ଟି ଶତକ, ଜ୍ୟାକ୍ କାଲିସ୍ ୪୫ଟି ଶତକ ଓ ରିକି ପଣ୍ଟିଂ ୪୧ଟି ଶତକ । କେବଳ ଇଂଲଣ୍ଡରେ ରୁଟ୍ ୨୩ଟି ଶତକ ହାସଲ କରି ଘରୋଇ ମାଟିରେ ଯୁଗ୍ମ ସର୍ବାଧିକ ଭାବେ ରିକି ପଣ୍ଟିଂ, ଜ୍ୟାକ୍ କାଲିସ ଓ ମାହେଲା ଜୟବର୍ଦ୍ଧନେଙ୍କ ସହ ସମକକ୍ଷ ହୋଇ ଶୀର୍ଷରେ ରହିଛନ୍ତି ।