IPLକୁ ବାଏ ବାଏ କଲେ ରସେଲ୍; କେକେଆର ଦେଲା ପାୱାରଫୁଲ୍ ପୋଷ୍ଟ

କନକ ବ୍ୟୁରୋ: ଆଗାମୀ ୨୦୨୬ ଆଇପିଏଲ୍ ନିଲାମୀ ପୂର୍ବରୁ ୱେଷ୍ଟଇଣ୍ଡିଜର ବିସ୍ଫୋରକ ଅଲରାଉଣ୍ଡର ଆନ୍ଦ୍ରେ ରସେଲ ଆଇପିଏଲକୁ ବାଏ ବାଏ କରିଛନ୍ତି । ରସେଲଙ୍କୁ କୋଲକାତା ନାଇଟ୍ ରାଇଡର୍ସ ରିଟେନ ନରଖି ଛାଡ଼ି ଦେଇଥିଲା ଏବଂ ଆଗାମୀ ଅକ୍ସନରେ ରସେଲଙ୍କ ଉପରେ ବଡ଼ ବିଡ୍ ଲାଗିବ ବୋଲି ଚର୍ଚ୍ଚା ବି ହେଉଥିଲା । କିନ୍ତୁ ସବୁ ଚର୍ଚ୍ଚାର ଅନ୍ତ ଘଟାଇ ଫାଟଫଟ କ୍ରିକେଟର ମହାସମର ପୂର୍ବରୁ ଏହି ଷ୍ଟାର ଅଲରାଉଣ୍ଡର ଟୁର୍ଣ୍ଣାମେଣ୍ଟରୁ ସନ୍ନ୍ୟାସ ନେଇଛନ୍ତି ।

ଅଧିକ ପଢ଼ନ୍ତୁ : ଧୋନିଙ୍କ ଘରେ କୋହଲିଙ୍କ ଦମଦାର ଶତକ

ଆଗାମୀ IPL ସିଜିନ୍ ପାଇଁ ମିନି-ନିଲାମୀ ଆସନ୍ତା ୧୬ ତାରିଖରେ ଆବୁଧାବିରେ ଅନୁଷ୍ଠିତ ହେବାକୁ ଥିବାବେଳେ ଅଚାନକ ରସେଲ ଆଇପିଏଲକୁ ବାଏ ବାଏ କହିବା କେକେଆର ଫ୍ୟାନ୍ସକୁ ଝଟକା ଦେଇଛି । କାରଣ ୨୦୧୪ରୁ କେକେଆର ଫ୍ରାଞ୍ଚାଇଜର ସବୁଠାରୁ ଟ୍ରମ୍ପକାର୍ଡ ଖେଳାଳି ଭାବେ ରହି ଆସିଛନ୍ତି ରସେଲ୍ । ଫଟାଫଟ୍ କ୍ରିକେଟ ଜଗତରେ ‘ରସେଲ୍ ଦ ମସଲ୍’ ନାଁରେ ପରିଚିତ ଅନ୍ଦ୍ରେ ରସେଲ୍ କେକେଆରକୁ ଚାମ୍ପିୟନ କରାଇବାରେ ବଡ଼ ଭୂମିକା ନିଭାଇଥିଲେ ।

ବଡ଼କଥା ହେଉଛି ୩୭ ବର୍ଷୀୟ ରସେଲ ଆଇପିଏଲରେ ଖେଳାଳି ଭାବେ ନୁହେଁ ଆଉ ଏକ ନୂଆ ଭୂମିକାରେ ଡ୍ରେସିଂ ରୁମରେ ନଜର ଆସିବେ । ସେ କେକେଆରର ପ୍ରଶିକ୍ଷକ ଗ୍ରୁପରେ ଯୋଗଦେବେ । ଏବଂ ତାଙ୍କୁ ପାୱାର କୋଚ୍ ନିଯୁକ୍ତ କରାଯାଇଛି । ଏପଟେ ଆଇପିଏଲକୁ ଅଲବିଦା କହିଥିବା ରସେଲ ଅନ୍ୟ ଲିଗରେ ଖେଳିବା ଜାରି ରଖିବେ ବୋଲି ସ୍ପଷ୍ଟ କରିଛନ୍ତି । ରସେଲ ଇନଷ୍ଟାଗ୍ରାମରେ ଲେଖିଛନ୍ତି, "ମୁଁ ଆଇପିଏଲରୁ ଅବସର ନେଉଛି । ଆଇପିଏଲରେ ମୋର ସୁନ୍ଦର ଏବଂ ସ୍ବର୍ଣ୍ଣିମ ସ୍ମୃତି ରହିଛି । ୧୨ ବର୍ଷର ସ୍ମୃତି ଏବଂ କେକେଆର ପରିବାରର ବହୁତ ଭଲପାଇବା ମୁଁ ପାଇଛି । ମୁଁ ଆଗକୁ ବିଶ୍ୱର ଅନ୍ୟ ଲିଗରେ ଚଉକା-ଛକା ମାରିବି ଏବଂ ୱିକେଟ୍ ନେଇବି । ସବୁଠାରୁ ଭଲ କଥା ହେଉଛି ଯେ ମୁଁ କେକେଆର ପରିବାରକୁ ଛାଡୁନାହିଁ । ଆଗାମୀ ଆଇପିଏଲରେ ମୋତେ ଏକ ନୂତନ ଭୂମିକାରେ ଆପଣମାନେ ଦେଖିବ । ୨୦୨୬ରେ କେକେଆର ସପୋର୍ଟ ଷ୍ଟାଫର ପାୱାର କୋଚ୍ ଭାବରେ ।

ବଡ଼କଥା ହେଉଛି ରସେଲ୍ ୨୦୧୨ ପରଠାରୁ କୌଣସି IPL ସିଜିନ୍ ହରାଇ ନାହାନ୍ତି । ପ୍ରଥମ ଦୁଇଟି ସିଜିନ୍‌ରେ ଦିଲ୍ଲୀ ଫ୍ରାଞ୍ଚାଇଜିର ପ୍ରତିନିଧିତ୍ୱ କରିବା ପରେ ସେ ୨୦୧୪ ପରଠାରୁ KKR ସହିତ ଅଛନ୍ତି । ବ୍ୟାଟ୍ ଏବଂ ବଲ ଉଭୟରେ ମ୍ୟାଚ୍‌ର ମୋଡ଼ ବଦଳାଇବାରେ ସକ୍ଷମ ରସେଲ୍ ୧୪୦ଟି ମ୍ୟାଚ୍‌ରେ ୧୭୪.୧୮ ଷ୍ଟ୍ରାଇକ୍ ରେଟ୍‌ରେ ୨୬୫୧ ରନ୍ କରିଛନ୍ତି ଏବଂ ୧୨୩ଟି ୱିକେଟ୍ ନେଇଛନ୍ତି ।