କନକ ବ୍ୟୁରୋ: ପ୍ରଥମେ ଇଂଲଣ୍ଡ ଖେଳାଳି ସ୍ଲେଜିଂ ଓ ସମୟ ଅପଚୟ କରି ବିବାଦ ଥମିନଥିବାବେଳେ ଏବେ ଓଲ୍ଡ ଟ୍ରାଫୋର୍ଡ ଟେଣ୍ଟ୍‌କୁ ନେଇ ଆଉ ଏକ କ୍ରିକେଟ୍ ନିଆଁ କୁହୁଳିବାରେ ଲାଗିଛି । ପରାଜୟ ମୁହଁରୁ ଫେରି ଭାରତ ଲଢ଼ୁଆ ଡ୍ର’ କରିବା ପରେ ଇଂଲଣ୍ଡର ଏକ ହୀନ ଆଭିମୁଖ୍ୟ ଚର୍ଚ୍ଚାକୁ ଆସିଛି । ଯାହାକୁ ନେଇ ଖୋଦ୍ ଇଂଲଣ୍ଡ ଖେଳାଳିଙ୍କ ଉପରେ ଖପ୍ପା ହୋଇଯାଇଛନ୍ତି ପୂର୍ବତନ ଇଂଲଣ୍ଡ ଖେଳାଳି । ଓଲ୍ଡ ଟ୍ରାଫୋର୍ଡ ଟେଷ୍ଟ ପରାଜୟର ଦ୍ବାରଦେଶରୁ ଫେରି ଭାରତ ସୁରକ୍ଷିତ ହେବା ଦିଗରେ ଅଗ୍ରସର ହେବା ଦେଖି ଇଂଲଣ୍ଡ ଅଧିନାୟକ ବେନ୍ ଷ୍ଟୋକ୍ସ ରବିବାର ଭାରତକୁ ଆଗୁଆ ଡ୍ର’ ଅଫର୍ ଦେଇଥିଲେ । ଯାହାକୁ ରବୀନ୍ଦ୍ର ଜାଡେଜା ରୋକ୍‌ଠୋକ୍ ମନା କରି ଦେଇଥିଲେ । ପଡ଼ିଆ ଭିତରେ ଏଭଳି ଆଚରଣ ଅନେକଙ୍କୁ ଚକିତ କରିଥିଲା । ପୂର୍ବତନ ଇଂଲଣ୍ଡ ବ୍ୟାଟ୍ସମ୍ୟାନ୍‌ ଜିଓଫ ବୟକଟ୍ ଭାରତୀୟଙ୍କୁ ସମର୍ଥନ କରିବା ପରେ ବିବାଦ ଆହୁରି ବଢ଼ିଛି ।

Advertisment

ରବୀନ୍ଦ୍ର ଜାଡେଜା ଓ ୱାସିଂଟନ୍‌ ସୁନ୍ଦର ଯାହା କଲେ ମୁଁ ବ୍ୟାଟିଂ କରୁଥିଲେ ବି ସେଇଆ କରିଥାନ୍ତି ବୋଲି ବୟକଟ୍ ସ୍ପଷ୍ଟ ଭାବେ କହିଛନ୍ତି । ଇଂଲଣ୍ଡ ଏହି ପ୍ରସଙ୍ଗରେ ଭାରତକୁ ଦାୟୀ କରିବାର କିଛି କାରଣ ନାହିଁ । ଏତେ ପରିଶ୍ରମ କରି ଦଳକୁ ବଞ୍ଚାଇବା ପରେ ଶତକ ସୁଯୋଗ ଛାଡ଼ି ଚାଲିଯିବାକୁ କହିବା ଉଚିତ ନଥିଲା । ଇଂଲଣ୍ଡ ନିଜକୁ ସୁହାଉ ନାହିଁ ବୋଲି ଡ୍ର' ଅଫର୍ ଦେଇ ଖେଳ ବନ୍ଦ କରିବାକୁ କହିବା ଗ୍ରହଣୀୟ ନଥିଲା । ଜାଡେଜା ଓ ସୁନ୍ଦରଙ୍କୁ କେବଳ ବ୍ରେନ୍ ଷ୍ଟ୍ରୋକ୍ସ ନୁହେଁ ହ୍ୟାରି ବୁକ୍, ବେନ୍ ଡକେଟ୍, ଜ୍ୟାକ୍ କ୍ରଲି, ଜୋଫ୍ରା ଆର୍ଚର ପ୍ରମୁଖ ନିରୁତ୍ସାହିତ କରୁଥିବା ଷ୍ଟମ୍ପ୍ ମାଇକ୍ରୋଫୋନ୍‌ରୁ ଜଣାପଡୁଥିଲା । ଆଧୁନିକ କ୍ରିକେଟରଙ୍କ ଏଭଳି କୁହାଳିଆ ପଣକୁ ସେ ନାପସନ୍ଦ କରିଛନ୍ତି । ମୁଁ ଖେଳୁଥିବା ବେଳେ କିନ୍ତୁ ଏଭଳି ହେଉ ନଥିଲା । ଭାରତ ନିଶ୍ଚିତ ଓଲ୍ଡ ଟ୍ରାଫୋର୍ଡ ‘ଡ୍ର’କୁ ବିଜୟ ବିବେଚନା କରି ଓଭାଲ୍‌ରେ ଭଲ ଖେଳିବ ବୋଲି ବୟକଟ୍ ପ୍ରକାଶ କରିଛନ୍ତି ।

ଖାଲି ଏତିକି ନୁହେଁ ବୟକଟ୍ କହିଛନ୍ତି, ବିଜୟରୁ ନୁହେଁ ପରାଜୟରୁ ଅଧିକ କିଛି ଶିଖି ହୁଏ । ଇଂଲଣ୍ଡ ଭୁଲିଯିବା ଉଚିତ ନୁହେଁ ଯେ ବୋଲିଂ ଦୁର୍ବଳତା ପାଇଁ ସେମାନେ ଭାରତକୁ ଦ୍ଵିତୀୟ ପାଳିରେ ଅଲ୍‌ଆଉଟ୍ କରିପାରିଲେ ନାହିଁ । ଖାଲି ଇଂଲଣ୍ଡ ଖେଳାଳି ନୁହେଁ ବରଂ ବେନ୍ ଷ୍ଟୋକ୍ସଙ୍କ ଆଗୁଆ ଡ୍ର' ପ୍ରସ୍ତାବକୁ ଗ୍ରହଣ କରି ନଥିବାରୁ ଦକ୍ଷିଣ ଆଫ୍ରିକା କ୍ରିକେଟର୍ ଡେଲ୍ ଷ୍ଟେନ୍ ମଧ୍ୟ କଡ଼ା ନିନ୍ଦା କରିଛନ୍ତି । ଷ୍ଟେନ୍ କହିଛନ୍ତି, ‘ଥରେ ମ୍ୟାଚ୍ ଡ୍ର’ ହେବା ନିଶ୍ଚିତ ହୋଇଯିବା ପରେ ବ୍ୟକ୍ତିଗତ ମାଇଲ୍‌ଖୁଣ୍ଟ ଦ୍ଵିତୀୟ ଅଗ୍ରାଧିକାର କଥା । ଖେଳ ଭାବନା ଦୃଷ୍ଟିରୁ ଏହା ଠିକ୍ ନୁହେଁ । କେହି ଏହା ଅନୁଭବ କରୁନାହାନ୍ତି । ବ୍ୟାଟର୍‌ ମାନେ ୧୦୦ ପାଇଁ ଖେଳୁ ନଥିଲେ, ଟିମ୍ ଓ ଦେଶ ପାଇଁ ଖେଳୁଥିଲେ । ଲକ୍ଷ୍ୟ ସ୍ଥଳରେ ପହଞ୍ଚିବା ପରେ ଖେଳିବାର କିଛି ମାନେ ନାହିଁ' ବୋଲି ଷ୍ଟେନ୍ ମତ ପ୍ରକାଶ କରିଛନ୍ତି ।