ସୁଧୁରୁ ନାହାନ୍ତି ଦିଗ୍‌ବେଶ୍‌ ସିଂ ରାଠି; ବାରମ୍ବାର ଦୋହରାଉଛନ୍ତି ଭୁଲ, ଏବେ ଗଣିବେ ଟଙ୍କା

କନକ ବ୍ୟୁରୋ : ପୁଣି ଥରେ ଚର୍ଚ୍ଚାରେ ଦିଗ୍‌ବେଶ୍‌ ସିଂ ରାଠି । ଆଇପିଏଲ୍‌ ୨୦୨୫ରେ ନିଜର ନିଆରା ସେଲିବ୍ରେସନ ଓ ବିବାଦକୁ ନେଇ ଚର୍ଚ୍ଚାରେ ରହିଆସିଥିବା ଦିଗ୍‌ବେଶ୍‌ ପୁଣି ଥରେ ବିବାଦରେ । ବାରମ୍ବାର ଆଇପିଏଲ୍‌ରେ ଫାଇନ ଗଣିବା ପରେ ବି ଟିକେ ବି ସୁଧୁରି ନାହାନ୍ତି ଏହି ଖେଳାଳି । ବ୍ୟାଟ୍ସମ୍ୟାନଙ୍କୁ ଚିଡ଼ାଇବାକୁ ପଛାଉ ନାହାନ୍ତି ଦିଗ୍‌ବେଶ୍‌ । ଦିଲ୍ଲୀ ପ୍ରିମିୟର ଲିଗ୍‌ରେ ତାଙ୍କ ବ୍ୟବହାରକୁ ନେଇ ସେ ପୁଣି ଥରେ ଚର୍ଚ୍ଚାର ବିଷୟ ପାଲଟିଛନ୍ତି ।

ଆଇପିଏଲ୍‌ ପରେ ଏବେ ଡିପିଏଲ୍‌..ସବୁଠି ଚର୍ଚ୍ଚାରେ ଗୋଟିଏ ନାଁ । ଦିଗ୍‌ବେଶ୍‌ ସିଂ ରାଠି । ବ୍ୟାଟ୍ସମ୍ୟାନଙ୍କୁ ଟିଗୁଲାଇବା ଏକ ପ୍ରକାର ଅଭ୍ୟାସ ତାଙ୍କର । ଦିଲ୍ଲୀ ପ୍ରିମିୟର ଲିଗ୍‌ରେ ସାମ୍ନାସାମ୍ନି ହୋଇଛନ୍ତି ଦିଗ୍‌ବେଶ୍‌ ଓ ନୀତିଶ ରାଣା । ସାଉଥ ଦିଲ୍ଲୀ ସୁପରଷ୍ଟାର୍ଜ ପକ୍ଷରୁ ଖେଳୁଥିବା ଦିଗ୍‌ବେଶ୍ ସିଂ ରାଠି ଓ ୱେଷ୍ଟ ଦିଲ୍ଲୀ ଲାୟନ୍ସ କ୍ୟାପ୍ଟେନ୍‌ ନୀତିଶ ରାଣାଙ୍କ ମଧ୍ୟରେ ଖେଳ ମଝିରେ ପାଟିଟୁଣ୍ତ ହୋଇଥିବାର ଦେଖିବାକୁ ମିଳିଥିଲା । ଏଥିପାଇଁ ଉଭୟଙ୍କୁ ଫାଇନ ଗଣିବାକୁ ପଡ଼ିଛି । ଦିଗ୍‌ବେଶ୍‌ଙ୍କ ମ୍ୟାଚ୍‌ ଫି ର ୮୦ ପ୍ରତିଶତ ଟଙ୍କା କଟିଥିବା ବେଳେ ନୀତିଶ ରାଣାଙ୍କର ୫୦ ପ୍ରତିଶତ ଫି କଟାଯାଇଛି ।

ନୀତିଶ ବ୍ୟାଟିଂ ବେଳେ ଦିଗବେଶ୍‌ ବୋଲିଂ ଆକ୍ସନ କରି ମଧ୍ୟ ବଲ୍‌ ପକାଇନଥିଲେ । ଯାହାକୁ ନେଇ ନୀତିଶ ରାଣା ଚିଡ଼ିଯାଇଥିଲେ । ତା ପର ବଲ୍‌ରେ ଦିଗ୍‌ବେଶଙ୍କ ବଲ୍‌କୁ ନ ଖେଳି ଛାଡ଼ି ଦେଇଥିଲେ ନୀତିଶ । ଏମିତିକି ତା ପର ବଲ୍‌ରେ ସେ ଦିଗ୍‌ବେଶ୍‌ଙ୍କୁ ରିଭର୍ସରେ ଏକ ବଡ଼ ଛକା ମାରିଥିଲେ । ଏହାପରେ ଉଭୟଙ୍କ ମଧ୍ୟରେ ଜୋର୍‌ରେ ପାଟିଟୁଣ୍ତ ହୋଇଥିଲା । ହାତାହାତି ପରିସ୍ଥିତି ମଧ୍ୟ ସୃଷ୍ଟି ହୋଇଥିଲା । ଉଭୟ ଦଳର ଖେଳାଳି ଉଭୟଙ୍କୁ ଅଟକାଇଥିଲେ ।

ଆଇପିଏଲ୍‌ରେ ମଧ୍ୟ ଦିଗ୍‌ବେଶ୍‌ଙ୍କ ଏଭଳି ଆଚରଣ ପାଇଁ ତାଙ୍କୁ ଅନେକ ବାର ଫାଇନ ଗଣିବାକୁ ପଡ଼ିଥିଲା । ଏହାପରେ ବି ସେ ସୁଧୁରି ନଥିବା ଦିଲ୍ଲୀ ପ୍ରିମିୟର ଲିଗ୍‌ରେ ସ୍ପଷ୍ଟ ହୋଇଛି । ଦିଗ୍‌ବେଶ୍ ଗତ ଆଇପିଏଲରେ ୯ ଲକ୍ଷ ୩୭ ହଜାର ଟଙ୍କା ଫାଇନ୍ ଗଣିଥିଲେ । ତାଙ୍କର ଏଭଳି ଆଚରଣ ତାଙ୍କ ଆଗାମୀ କ୍ୟାରିୟର ଉପରେ ଖରାପ ପ୍ରଭାବ ପକାଇପାରେ ବୋଲି କ୍ରିକେଟ ବିଶେଷଜ୍ଞ କହିଛନ୍ତି ।