କନକ ବ୍ୟୁରୋ : ବଢ଼ିଲା ଟିମ ଇଣ୍ଡିଆ ଷ୍ଟାର କ୍ରିକେଟର ବିରାଟ କୋହଲିଙ୍କ ଅଡ଼ୁଆ । ବେଙ୍ଗାଲୁରୁ ଦଳାଚକଟା ମାମଲାରେ କୋହଲିଙ୍କ ବିରୋଧରେ ଥାନାରେ ଅଭିଯୋଗ । ବରିଷ୍ଠ ସାମାଜିକ କର୍ମୀ ଏଚଏମ ଭେଙ୍କଟେଶ ଏହି ଅଭିଯୋଗ କରିଛନ୍ତି । ଅଭିଯୋଗ ପାଇବା ପରେ ପୁଲିସ ବିଭାଗ ପକ୍ଷରୁ ସ୍ପଷ୍ଟୀକରଣ ଜାରି ହୋଇଛି । ଭେଙ୍କଟେଶଙ୍କ ଅଭିଯୋଗ କ୍ରମେ କବନ ପାର୍କ ଥାନାରେ ମାମଲା ରୁଜୁ ହୋଇସାରିଛି ଏବଂ ଘଟଣାର ତଦନ୍ତ ଚାଲିଛି । ଏହି ଘଟଣାରୁ ସ୍ପଷ୍ଟ ହେଉଛି ଯେ ବିରାଟ କୋହଲିଙ୍କ ବିରୋଧରେ ଅଭିଯୋଗକୁ ପୁଲିସ ଗମ୍ଭୀରତାର ସହ ନେଇ ଏହାକୁ ତଦନ୍ତର ଅଂଶବିଶେଷ ଭାବେ ସାମିଲ କରିଛି । ବର୍ତ୍ତମାନ ଏହି ଅଭିଯୋଗର ସବିଶେଷ ତଥ୍ୟ ପ୍ରକାଶ କରାଯାଇନାହିଁ । 

Advertisment

ତଦନ୍ତ ଆଗକୁ ବଢୁଥିବାରୁ ସବିଶେଷ ତଥ୍ୟକୁ ଅପେକ୍ଷା କରାଯାଇଛି । ତେବେ ପୁଲିସ କହିଛି, ଏହାର ନିରପେକ୍ଷ ଯାଞ୍ଚ କରାଯିବ । ସେପଟେ ଗତ ୪ତାରିଖରେ ଏମ୍ ଚିନ୍ନାସ୍ୱାମୀ ଷ୍ଟାଡିୟମ ବାହାରେ ଆରସିବି ବିଜୟ ପରେଡ୍ ବେଳେ ଆହତ ହୋଇଥିବା କଲେଜ ଛାତ୍ର ସି. ବେଣୁଙ୍କ ଅଭିଯୋଗ ଆଧାରରେ କବନ୍ ପାର୍କ ଥାନାରେ ତୃତୀୟ ଏଫ୍ଆଇଆର୍ ରୁଜୁ ହୋଇଛି । ଏଫ୍ଆଇଆର୍ ଅନୁସାରେ, ୬ ନମ୍ବର ଗେଟ୍‌ରେ ପ୍ରବଳ ଭିଡ଼ ଯୋଗୁଁ ଦଳାଚକଟା ଭଳି ପରିସ୍ଥିତି ସୃଷ୍ଟି ହେବା ସମୟରେ ବ୍ୟାରିକେଡ୍ ଖସି ପଡ଼ିବାରୁ ଅଭିଯୋଗକାରୀଙ୍କ ଗୋଡ଼ରେ ଗୁରୁତର ଆଘାତ ଲାଗିଥିଲା । ଆରସିବି, ଇଭେଣ୍ଟ ଆୟୋଜକ ଡିଏନ୍ଏ ଓ କେଏସସିଏ ଭିଡ଼ ନିୟନ୍ତ୍ରଣ କରିବାରେ ବିଫଳ ହେବା ସହ ପର୍ଯ୍ୟାପ୍ତ ସୁରକ୍ଷା ବ୍ୟବସ୍ଥା ହୋଇନଥିବା ବେଣୁ ଅଭିଯୋଗ କରିଛନ୍ତି । ସୂଚନା ଅନୁସାରେ, ବେଙ୍ଗାଲୁରୁର ଏମ୍ ଚିନ୍ନାସ୍ୱାମୀ ଷ୍ଟାଡିୟମ ବାହାରେ ଦଳାଚକଟାରେ ୧୧ ଜଣଙ୍କ ମୃତ୍ୟୁ ହୋଇଥିବା ବେଳେ ଅନେକ ଆହତ ହୋଇଛନ୍ତି । ଏହି ମାମଲାରେ ପୂର୍ବରୁ ଅନେକ ଲୋକଙ୍କୁ ଗିରଫ କରାଯାଇ ସାରିଛି ।