କନକ ବ୍ୟୁରୋ: ଇଂଲଣ୍ଡ ବିପକ୍ଷ ଚଳିତ ଚତୁର୍ଥ ଟେଷ୍ଟରେ ଯଶପ୍ରୀତ୍ ବୁମରାହ ପ୍ରଥମ ଥର ପାଇଁ ଏକ ପାଳିରେ ୧୦୦ରୁ ଊର୍ଦ୍ଧ୍ଵ ରନ୍ ବରଣ କରିଛନ୍ତି । ଇଂଲଣ୍ଡ ପ୍ରଥମ ପାଳିରେ ସେ ୩୩ ଓଭର ବୋଲିଂ କରି ୧୧୨ ରନ୍ ବିନିମୟରେ ୨ ୱିକେଟ୍ ଅକ୍ତିଆର କରିଥିଲେ । ଏଭଳି ବୋଲିଂ ପ୍ରଦର୍ଶନ ନେଇ ପୂର୍ବତନ କ୍ରିକେଟର୍ ମହମ୍ମଦ କୈଫ ଦେଇଛନ୍ତି ବଡ଼ ବୟାନ । କୈଫ କହିଛନ୍ତି ଯେ ରୋହିତ ଶର୍ମା, ବିରାଟ କୋହଲି, ଆର୍ ଅଶ୍ବିନଙ୍କ ଭଳି ବୁମରାହ ଅବସର ନେଇଯିବେ । ତାଙ୍କ ଦକ୍ଷତା କି ସାମର୍ଥ୍ୟର ଅଭାବ ନୁହେଁ ଟେଷ୍ଟ୍ ମ୍ୟାଚ୍ ପାଇଁ ଆବଶ୍ୟକ ଶାରୀରିକ ସଂଘର୍ଷ ସେ ଅଧିକ ଦିନ କରି ନପାରନ୍ତି । ମାଞ୍ଚେଷ୍ଟର୍ ଟେଷ୍ଟ୍ ଅବସରରେ ବୁମରାହ ତାଙ୍କ ସ୍ଵାଭାବିକ ଗତି ଘଣ୍ଟାପ୍ରତି ୧୪୦ କିଲୋମିଟର୍‌ଠାରୁ କମ୍ ୧୩୦/୧୩୫ ଗତିରେ ବୋଲିଂ କରୁଥିଲେ । ହେଜିଂଲେ ଓ ଲର୍ଡସ୍‌ରେ ସେ ଭଲ ବୋଲିଂ କରିଥିଲେ ମଧ୍ୟ ଓଲ୍ଡ ଟ୍ରାଫୋର୍ଡ ଗତି ଭିନ୍ନ କାହାଣୀ ଦର୍ଶାଇଛି । ଗୋଟିଏ ଓଭର ବୋଲିଂ କରିବା ପରେ ସେ ଆହତ ସମସ୍ୟା କାରଣରୁ ପଡ଼ିଆ ଛାଡ଼ିଥିଲେ । ଗତିରେ ହ୍ରାସ ଓ ଫର୍ମରେ ସଂଘର୍ଷ କାରଣରୁ ସେ ଟେଷ୍ଟ୍ କ୍ରିକେଟ୍ ଛାଡ଼ିପାରନ୍ତି ବୋଲି କୈଫ ଆଶଙ୍କା କରିଛନ୍ତି । 

Advertisment

ୱିକେଟ୍ ନେବା ନ ନେବା ଭିନ୍ନ କଥା । ଭାରତକୁ ଏବେ ବୁମରାହଙ୍କ ବିନା ଖେଳିବାକୁ ପ୍ରସ୍ତୁତ ହେବାକୁ ପଡ଼ିବ । ମୋ ଆଶଙ୍କା ଭୁଲ୍ ହେଉ, କିନ୍ତୁ ବୁମ୍ ଆଉ ଟେଷ୍ଟ କ୍ରିକେଟ୍‌କୁ ଉପଭୋଗ କରିପାରୁଥିବା ମୁଁ ଅନୁଭବ କରୁନାହିଁ ବୋଲି କୈଫ କହିଛନ୍ତି । ପୂର୍ବରୁ ବୁମରାହ ଗତବର୍ଷ ଏମ୍‌ଜିରେ ଅଷ୍ଟ୍ରେଲିଆ ବିପକ୍ଷରେ ୯୯ ରନ୍ ଲିକ୍ କରି ୪ ୱିକେଟ୍ ନେବା ଏ ପର୍ଯ୍ୟନ୍ତ ତାଙ୍କ ତାଲିକାରେ ଶୀର୍ଷରେ ଥିଲା । କେବଳ ବୁମରାହ ନୁହଁନ୍ତି, ଚଳିତ ଟେଷ୍ଟ୍ରେ ଅନ୍ୟ ୩ ଭାରତୀୟ ବୋଲର ରବୀନ୍ଦ୍ର ଜାଡ଼େଜା, ମହମ୍ମଦ ସିରାଜ , ୱାସିଂଟନ୍ ସୁନ୍ଦର ମଧ୍ୟ ୧୦୦ରୁ ଊର୍ଦ୍ଧ୍ଵ ରନ୍ ବରଣ କରିଛନ୍ତି । ଏହି ଆଲୋଡ଼ା ରେକର୍ଡ ସହିତ ବୁମରାହଙ୍କ ଅବସର ଚର୍ଚ୍ଚା ବି ଉଭା ହୋଇଛି ।