ଦୁର୍ନୀତି ହୁଏ ଏମିତି… ସାମନାକୁ ଆସିଲା ଠିକାଦାରିର ଗଳାବାଟ । ଛୋଟ ଛୋଟ ଭାଗରେ ବିଭକ୍ତ କରି ନିର୍ଦ୍ଦିଷ୍ଟ ଠିକାଦାରଙ୍କୁ ବାଣ୍ଟି ଦିଆଯାଉଛି କୋଟି କୋଟି ଟଙ୍କାର କାମ ।
କନକ ବ୍ୟୁରୋ: ଦୁର୍ନୀତି କେମିତି ହୁଏ? ନିୟମର ଗଳାବାଟ ଦେଇ କେମିତି ନେତା, ଅଫିସର ଓ ଠିକାଦାର ମାଲାମାଲ ହୁଅନ୍ତି, ଆରଟିଆଇ ରିପୋର୍ଟରୁ ତା’ର ଏକ ବଡ଼ ପ୍ରମାଣ ମିଳିଛି । ତେବେ ଦୁର୍ନୀତିର ଏହି ପୂରା କାହାଣୀ ଜାଣିବା ପାଇଁ ଭୁବନେଶ୍ୱରରେ ଥିବା ଷ୍ଟେଟ୍ ମ୍ୟୁଜିୟମ ବା ରାଜ୍ୟ ସଂଗ୍ରହାଳୟର ନବୀକରଣ କାମର ପୂରା ପ୍ରକ୍ରିୟାକୁ ଜାଣନ୍ତୁ..
Kanak News is now on WhatsApp
Join and get latest news updates delivered to you via WhatsApp
୨୦୨୦-୨୧ରେ ପୂର୍ତ୍ତ ବିଭାଗ କରିଛି ପ୍ରାୟ ୭ କୋଟିର କାମ । ଭୁବନେଶ୍ୱର ରୋଡ୍ସ ଆଣ୍ଡ ବିଲ୍ଡିଂ ଡିଭିଜନ-୧ର ନିର୍ବାହୀ ଯନ୍ତ୍ରୀ ୬ ଜଣ ଠିକାଦାରଙ୍କୁ ବାଣ୍ଟି ଦେଇଛନ୍ତି ପୂରା କାମ । ଏଥିପାଇଁ ଟେଣ୍ଡର ଡକା ଯାଇନାହିଁ । କାରଣ ୭ କୋଟିର କାମକୁ ୫ଲକ୍ଷ ଟଙ୍କାରୁ କମ୍ ଛୋଟ ଛୋଟ କାମରେ ବିଭକ୍ତ କରି ଏପରି ଚଞ୍ଚକତା କରାଯାଇଛି ।
ତେବେ ରାଜ୍ୟ ସଂଗ୍ରହାଳୟ ନବୀକରଣ କାମର ସିଂହଭାଗ ବଣ୍ଟା ଯାଇଛି ୪ ଜଣ ଠିକାଦାରଙ୍କୁ । ଏମାନେ ହେଲେ ସୁଶାନ୍ତ ପଣ୍ଡା, ବିଶ୍ୱ ପ୍ରକାଶ ମୁଦୁଲି, ମିହିର ପାତ୍ର ଓ ସନ୍ତୋଷିନୀ ପଣ୍ଡା । ସମସ୍ତଙ୍କୁ ମିଳିଛି କୋଟିଏ ଟଙ୍କାରୁ ଅଧିକ କାମ । ହେଲେ ୫ ଲକ୍ଷ ଟଙ୍କାରୁ କମ୍ ପରିମାଣର ଛୋଟ ଛୋଟ ଭାଗରେ ବିଭକ୍ତ କରି ସେମାନଙ୍କ ହାତକୁ ଟେକି ଦିଆଯାଇଛି । ରାଜ୍ୟ ସଂଗ୍ରହାଳୟର ନବୀକରଣ ପାଇଁ ମିହିର ପାତ୍ରଙ୍କୁ ୩୦ଟି, ସନ୍ତୋଷିନୀ ପଣ୍ଡାଙ୍କୁ ୨୭ଟି, ସୁଶାନ୍ତ ପଣ୍ଡାଙ୍କୁ ୧୮ଟିି ଓ ବିଶ୍ୱପ୍ରକାଶ ମୁଦୁଲିଙ୍କୁ ମିଳିଛି ୧୫ଟି କାମ ।
ଆଇଟିଆଇରୁ ମିଳିଥିବା ତଥ୍ୟରେ, କିପରି ଟେଣ୍ଡରକୁ ଆଡେଇ ଯିବା ପାଇଁ ଗଳାବାଟ ବାହାର କରି ୫ ଲକ୍ଷ ଟଙ୍କାରୁ କମ୍ କାମ ଦେଖାଇ ଠିକା ଦିଆଯାଇଛି ତା ସ୍ପଷ୍ଟ ଭାବେ ଜଣାପଡିଛି । ସରକାରୀ ସ୍ତରରେ ଚାଲିଥିବା ଏହି ଦୁର୍ନୀତି କେବଳ ଗୋଟିଏ କାମରେ ରହିନାହିଁ, ପୂରା ବ୍ୟବସ୍ଥାକୁ ଗ୍ରାସ କରିଯାଇଛି । ଯାହା ସଙ୍କେତ ଦେଉଛି, ସ୍ୱଚ୍ଛତାର ସହ ହେଉନାହିଁ ସରକାରୀ କାମ ।
ସୂଚନା ଅଧିକାର ଆଇନରୁ ମିଳିଥିବା ତଥ୍ୟ ଅନୁସାରେ ଭୁବନେଶ୍ୱରର କେବଳ ଗୋଟିଏ ଡିଭିଜନରେ ଗତ ୬ ବର୍ଷରେ ୨୦ ହଜାରରୁ ଅଧିକ କାମ ଠିକାଦାରଙ୍କୁ ବିନା ଟେଣ୍ଡରରେ ଦିଆଯାଇଛି । ଆଉ ଏହି ସବୁ କାମର ପରିମାଣକୁ ଜାଣିଣୁଣି ୫ ଲକ୍ଷ ଟଙ୍କାରୁ କମ୍ ରଖାଯାଇଛି । ବଡ଼ କାମ ହେଉଛି, ହେଲେ ଟେଣ୍ଡର କରାଯାଉନାହିଁ । ଛୋଟ ଛୋଟ କାମରେ ବିଭକ୍ତ କରି ନେତା-ଅଫିସର ଓ ଠିକାଦାରଙ୍କୁ ହାତ ଚିକ୍କଣ ହେଉଛି ।