ମହାରାଷ୍ଟ୍ର ମେଣ୍ଟ ସରକାରରେ ଫାଟ ନେଇ ଚର୍ଚ୍ଚା । ଉଦ୍ଧବ ହିଁ ୫ ବର୍ଷ ମୁଖ୍ୟମନ୍ତ୍ରୀ ରହିବେ ବୋଲି ଲେଖିଲା ଶିବସେନା ମୁଖପତ୍ର ‘ସାମ୍ନା’ ।
ରାଜ୍ୟର କଂଗ୍ରେସ ମୁଖ୍ୟଙ୍କ ଅସନ୍ତୋଷ । କହିଲେ ଏକାକି ବିଧାନସଭା ଲଢ଼ିବ କଂଗ୍ରେସ
କନକ ବ୍ୟୁରୋ: ମହାରାଷ୍ଟ୍ର ମେଣ୍ଟ ସରକାରରେ ସବୁ ଠିକ୍ ଠାକ୍ ଅଛି ତ ? କାହିଁକି ନା ଶିବସେନା-କଂଗ୍ରେସ-ଏନସିପି ମେଣ୍ଟ ମଧ୍ୟରେ ବିବାଦ ଆରମ୍ଭ ହୋଇଛି ବୋଲି ଏବେ ଚର୍ଚ୍ଚା ଚାଲିଛି । ଆଉ ଏହି ଚର୍ଚ୍ଚାର କାରଣ ହେଉଛି ଶିବସେନା ମୁଖପାତ୍ର ସଂଜୟ ରାଉତଙ୍କ ବୟାନ । ସଂଜୟ ରାଉତ ଶିବସେନା ମୁଖପତ୍ର ସାମନାରେ ଲେଖିଛନ୍ତି, ଉଦ୍ଧବ ଠାକରେ ହିଁ ପାଂଚବର୍ଷ ଲାଗି ମହାରାଷ୍ଟ୍ରର ମୁଖ୍ୟମନ୍ତ୍ରୀ ରହିବେ । ମୁଖ୍ୟମନ୍ତ୍ରୀ ପଦ କଂଗ୍ରେସ କିମ୍ବା ଏନସିପି ହାତକୁ ଯିବ ନାହିଁ । ତେବେ ସାମନାରେ ଏହି ଲେଖାପରେ କଂଗ୍ରେସରେ ଅସନ୍ତୋଷ ଦେଖାଦେଇଛି ।
Kanak News is now on WhatsApp
Join and get latest news updates delivered to you via WhatsApp
ମହାରାଷ୍ଟ୍ର କଂଗ୍ରେସର ମୁଖ୍ୟ ନାନା ପଟୋଲେ କହିଛନ୍ତି ଯେ, ଆଗାମୀ ସ୍ଥାନୀୟ ନିର୍ବାଚନ ଗୁଡ଼ିକ କଂଗ୍ରେସ ଏକାକି ଲଢ଼ିବ । ଏପରିକି ବିଧାନସଭା ନିର୍ବାଚନ ଏକାକି ଲଢ଼ିବା କଥା ମଧ୍ୟ ପଟୋଲେ କହିବାକୁ ଭୁଲି ନାହାନ୍ତି । ଅବଶ୍ୟ ବିବାଦ ସାମ୍ନାକୁ ଆସିବା ପରେ ଶିବସେନା, କଂଗ୍ରେସ ଓ ଏନସିପି ନେତାମାନେ କଥାକୁ ଅଣଦେଖା କରିବାକୁ ଚେଷ୍ଟା କରିଛନ୍ତି । ଏପରିକି ମେଂଟରେ ସବୁକିଛି ଠିକଠାକ ଅଛି ବୋଲି ତିନି ଦର ନେତା କହିଛନ୍ତି ।
ଏହି ବିବାଦ ଏପରି ଏକ ସମୟରେ ସାମ୍ନାକୁ ଆସିଛି, ଯେତେବେଳେ ପ୍ରଧାନମନ୍ତ୍ରୀ ମୋଦିଙ୍କୁ ସଂଜୟ ରାଉତ ପ୍ରଶଂସା କରିବାକୁ ନେଇ ଚର୍ଚ୍ଚା ଆରମ୍ଭ ହୋଇଥିଲା । ମୋଦୀ ବିଜେପିର ଓ ଦେଶର ସବୁଠୁ ବଡ଼ ନେତା ବୋଲି ରାଉତ କହିଥିଲେ । ଏହାସହ ଦୁଇଦିନ ତଳେ ପ୍ରଧାନମନ୍ତ୍ରୀ ମୋଦୀଙ୍କୁ ସାକ୍ଷାତ କରିଥିଲେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ ।