‘ପୁଅରେ ଟିକେ ମହାଦେବଙ୍କ ମନ୍ଦିରକୁ ମତେ ନେଇଯାଆନ୍ତୁନି’ । ‘ଆ ବୋଉ ତତେ ବୁଲେଇନେବି’ । ବୁଢୀ ମା’କୁ କାନ୍ଧରେ ବସାଇ ଶିବଙ୍କ ଦର୍ଶନ କରାଇଲା ସୁନା ପୁଅ ।

983

କନକ ବ୍ୟୁରୋ : ନିତି ପାହାନ୍ତିରେ ବୋଉ ଗୁଣୁଗୁଣୁ ହୋଇ ଶିବ ପଞ୍ଚାକ୍ଷରୀ ମନ୍ତ୍ର ଗାଏ, ଠାକୁର ଆସ୍ଥାନ ପାଖକୁ ନ ଯାଇପାରିଲେ ବି ହାତ ଯୋଡି ମୁଣ୍ଡିଆଟିଏ ମାରିଦିଏ । ମହାଦେବଙ୍କ ପ୍ରତି ନିଜ ୮୫ ବର୍ଷୀୟ ମା’ର ଏହି ଭକ୍ତି ଦେଖି ପୁଅ ନିର ଜେନା କିଛି କୁହନ୍ତିନି ସତ କିନ୍ତୁ ମା’ର ଈଶ୍ୱରଙ୍କ ପ୍ରତି ବିଶ୍ୱାସ ଓ ମହାଦେବଙ୍କ କରୁଣା ତାଙ୍କୁ ବି ଈଶ୍ୱରବିଶ୍ୱାସୀ ସହ ମାତୃ ଭକ୍ତଟିଏ କରିଦେଇଛି । ସେଥିପାଇଁ ତ ମହା ଶିବରାତ୍ରିରେ ଆଜି ବୋଉକୁ ନିଜ କାନ୍ଧରେ ବସାଇ ମହାଦେବଙ୍କ ମନ୍ଦିର ବୁଲାଇଛନ୍ତି ପୁଅ ।

ବାଲେଶ୍ୱର ଜିଲ୍ଲା ଖଇରା ବ୍ଲକ ଗଣ୍ଡିବେଡସ୍ଥିତ ବାବା ଲଙ୍କେଶ୍ବର ପୀଠରେ ଆଜି ଏମିତି ଏକ ଦୃଶ୍ୟ ଦେଖିବାକୁ ମିଳିଛି । ଯେଉଁଠି ମାର ମହାଦେବଙ୍କ ପ୍ରତି ଥିବା ଅଖଣ୍ଡ ବିଶ୍ୱାସକୁ କାୟମ ରଖିବା ପାଇଁ ପୁଅ ହେଳା କରିନାହିଁ । ରୋଗ ପାଇଁ ଶିବ ମନ୍ଦିର ଚାଲିଯାଇପାରୁନଥିବା ନିଜ ବୁଢ଼ୀ ମା’ର ଆଗ୍ରହକୁ ଅଣଦେଖା କରିନାହିଁ ପୁଅ । ମା’ର ଇଚ୍ଛାକୁ ବେଖାତିର ନ କରି ନିଜ କାନ୍ଧରେ ମା’କୁ ବସାଇ ମନ୍ଦିରକୁ ନେଇଯାଇଥିଲେ ନିର । ମନ୍ଦିରର ପାହାଚ ପରେ ପାହାଚକୁ ଅତିକ୍ରମ କରି ମହାଦେବଙ୍କ ଦର୍ଶନ କରାଇଥିଲେ ପୁଅ । ମା’ର ଆଶୀର୍ବାଦ ଯେତେବେଳେ ସାଥିରେ ଥିଲା ସେତେବେଳେ ବାଧା ହୋଇନି, ବରଂ ପ୍ରଚୁର ଆତ୍ମସନ୍ତୋଷ ମିଳିଛି ।

ପୁରାଣ ଯୁଗର ଶ୍ରବଣ କୁମାରଙ୍କ କାହାଣୀ ଆପଣ ଶୁଣିଥିବେ, ଯିଏ କି ନିଜ ଅନ୍ଧ ବାପା-ମା’ଙ୍କୁ ତୀର୍ଥଦର୍ଶନ କରାଇବା ପାଇଁ ଭାରରେ ବୋହି ନେଇଥିଲେ । ବର୍ତ୍ତମାନ ସମୟ ବଦଳିଛି, ଏହା ସହ ସମ୍ପର୍କର ମୂଲ୍ୟବୋଧ ବଦଳିଛି । ବୁଢା ବାପା-ମା’ଙ୍କୁ ଘରୁ ବାହାର କରିଦେବାକୁ ପୁଅ ମଧ୍ୟ ପଛାଉନାହିଁ, ବୁଢା ବାପା-ମା ତୀର୍ଥ ଦର୍ଶନ ପାଇଁ ବାରମ୍ବାର କହୁଥିଲେ ବି କାନରେ ପଡୁନି ସେମାନଙ୍କ ଜୀବନର ଶେଷ ଇଚ୍ଛା । କିନ୍ତୁ ମହାଶିବରାତ୍ରିରେ ନିରଙ୍କ ଏହି ମହାନ କାହାଣୀ ମା ପାଇଁ ସମର୍ପିତ ପୁଅର କାହାଣୀକୁ ମନେପକାଇଦେଇଛି ।

ଅନ୍ତର୍ଜାତୀୟରୁ ଆରମ୍ଭ କରି ଜାତୀୟ ତଥା ରାଜ୍ୟର ୩୧୪ ବ୍ଲକରେ ଘଟୁଥିବା ପ୍ରତିଟି ଘଟଣା ଉପରେ ସମ୍ବାଦ ଓ କନକ ନ୍ୟୁଜ ଆପଣଙ୍କୁ ଦେଉଛି ୨୪ ଘଂଟିଆ ଅପଡେଟ | କରୋନାର ସଂକଟ ସମୟରେ ଆମେ ଲୋଡୁଛୁ ଆପଣଙ୍କ ସହଯୋଗ । ‘ସମ୍ବାଦ’ ଗ୍ରୁପର ଡିଜିଟାଲ ମିଡିଆକୁ ଆର୍ଥିକ ସମର୍ଥନ ଜଣାଇ ଆଂଚଳିକ ସାମ୍ବାଦିକତାକୁ ଶକ୍ତିଶାଳୀ କରନ୍ତୁ |

Comments are closed.