କନକ ବ୍ୟୁରୋ: ଗାଡ଼ି ଚାଳକଙ୍କ ପାଇଁ ବଡ଼ ଖବର । କାରଣ ବଦଳୁଥିବା ନିୟମ ଅନୁୟାୟୀ ୧ ତାରିଖରୁ ଏହି ସବୁ ଗାଡ଼ିକୁ ମିଳିବନି ପେଟ୍ରୋଲ । ନିୟମ ଅନୁସାରେ, ଯେଉଁ ଗାଡିର ଅବଧି ସରିଯାଇଥିବ ଅର୍ଥାତ୍‌ ଗାଡ଼ି ରାସ୍ତାରେ ଚାଲିବାର କଣ୍ଡିସନ୍‌ରେ ନଥିବ ସେହି ଗାଡ଼ି ପେଟ୍ରୋଲ ପମ୍ପକୁ ଗଲେ ବି ତେଲ ଦିଆଯିବ ନାହିଁ । ଖାସ୍‌ ସେହି ଗାଡ଼ି ପାଇଁ ପେଟ୍ରୋଲ ପମ୍ପରେ ସିସିଟିଭି ଲଗାଯିବ ।  

Advertisment

ପୁଣି ବଦଳିଲା ପେଟ୍ରୋଲ ପମ୍ପର ନିୟମ
କ୍ୟାମେରା ରଖିବ ନଜର
ଏଣିକି ଏହି ଗାଡ଼ି ଗୁଡ଼ିକୁ ମିଳିବନି ପେଟ୍ରୋଲ
ପୁରୁଣା ଗାଡ଼ି ପାଇଁ ବଢୁଛି ପ୍ରଦୂଷଣ
ଗାଡ଼ି ଦେଖିବା ମାତ୍ରେ ମିଳିବନି ପେଟ୍ରୋଲ

ଦେଶରେ ଏବେ ଅନେକ ପୁରୁଣା ଗାଡ଼ି ଚାଲୁଛି । ଯାହାଦ୍ବାରା ପ୍ରଦୂଷଣ ମାତ୍ରା ବି ଭୟଙ୍କର ବଢିବାରେ ଲାଗିଛି । କେମିତି ପ୍ରଦୂଷଣ ମାତ୍ରାକୁ କମାଇ ହେବ ସେନେଇ ସରକାର ଚିନ୍ତା କରୁଛନ୍ତି । ସେଇଥି ଲାଗି ତ ପୁରୁଣା ଗାଡିକୁ ପେଟ୍ରୋଲ ନଦେବାକୁ ନିର୍ଦ୍ଦେଶନାମା ଜାରି ହୋଇଛି । ଅବଶ୍ୟ ଏହା ପୂରା ଦେଶରେ ନୁହେଁ ବରଂ ପ୍ରଥମ ପର୍ଯ୍ୟାୟରେ ଦିଲ୍ଲୀରେ ଲାଗୁ ହେବାକୁ ଯାଉଛି ଏହି ନିୟମ କିନ୍ତୁ ପୂରା ଦେଶରେ ଚର୍ଚ୍ଚା ବଢିଛି । 

ଲାଗିବ ଅଟୋମେଟିକ୍‌ ନମ୍ବର ପ୍ଲେଟ୍‌ କ୍ୟାମେରା
ପୁରୁଣା ଗାଡ଼ି ଆସିବା ମାତ୍ରେ ଦେବ ଫଟୋ

ପେଟ୍ରୋଲ ପମ୍ପରେ ଏଣିକି ଅଟୋମେଟିକ୍‌ ନମ୍ବର ପ୍ଲେଟ୍‌ ପରଖିପାରୁଥିବା କ୍ୟାମେରା ଲଗାଯିବ । ଯାହାଦ୍ବାରା ପମ୍ପକୁ ପୁରୁଣା ଗାଡ଼ି ଆସିବା ମାତ୍ରେ ଫଟୋ ଉଠିବ । ଏଠାରେ ସ୍ପଷ୍ଟ ଭାବରେ କହିରଖୁଛୁ କି, ୨୦୧୮ ମସିହାରେ ସୁପ୍ରିମକୋର୍ଟ ୧୦ ବର୍ଷର ପୁରୁଣା ଡିଜେଲ୍‌ ଗାଡ଼ି ଓ ୧୫ ବର୍ଷର ପୁରୁଣା ପେଟ୍ରୋଲ ଗାଡ଼ି ରାସ୍ତାରେ ଚଳାଚଳ ଉପରେ ପ୍ରତିବନ୍ଧକ ଲଗାଇଥିଲେ । ଖାଲି ଏତିକି ନୁହେଁ ବରଂ ନ୍ୟାସନାଲ୍‌ ଗ୍ରୀନ ଟ୍ରିବ୍ୟୁନାଲ୍‌ ବି ଏମିତି ଗାଡ଼ିକୁ ସର୍ବସାଧାରଣ ସ୍ଥାନରେ ପାର୍କିଂ ଉପରେ ବି କଟକଣା ଲଗାଇଥିଲେ । ସୂଚନା ଅନୁସାରେ, ଏଣ୍ଡ ଅଫ୍‌ ଲାଇଫ୍‌ ସିଷ୍ଟମ ଏପରି ବାହନ ଗୁଡ଼ିକୁ ଟାର୍ଗେଟ୍‌ କରିବା ପରେ ଚିହ୍ନଟ ବି କରିଥାଏ । ତେଣୁ ଆସନ୍ତା ଜୁଲାଇ ୧ ତାରିଖରୁ ଏପରି ଗାଡ଼ି ଗୁଡ଼ିକ ଉପରେ ତୀକ୍ଷ୍ଣ ନଜର ରଖାଯିବ । 

କିଛି ପେଟ୍ରୋଲ ପମ୍ପରେ ଏଯାଏ ଲାଗିନି କ୍ୟାମେରା

ନୂଆ ନିୟମ ଜାରି ହେବା ପରେ ବି ଏ ପର୍ଯ୍ୟନ୍ତ ରାଜଧାନୀ ଦିଲ୍ଲୀରେ ସମସ୍ତ ପେଟ୍ରୋଲ ପମ୍ପରେ କ୍ୟାମେରା ଲାଗିନି । ରିପୋର୍ଟ ଅନୁସାରେ, ଆହୁରି ୧୦ ରୁ ୧୫ ପେଟ୍ରୋଲ ପମ୍ପରେ କ୍ୟାମେରା ଲାଗିପାରିନି । ଜାତୀୟ ଗଣମାଧ୍ୟମରୁ ମିଳିଥିବା ସୂଚନା ଅନୁସାରେ, ଦିଲ୍ଲୀରେ ୪୦୦ରୁ ଊର୍ଦ୍ଧ୍ବ ପେଟ୍ରୋଲ ପମ୍ପ ଥିବା ବେଳେ ୧୬୦ ରୁ ଅଧିକ ସିଏନଜି ପମ୍ପ ରହିଛି । ତେଣୁ ସମସ୍ତ ପମ୍ପକୁ କ୍ୟାମେରା ଲଗାଇବାକୁ ନିର୍ଦ୍ଦେଶ ଦିଆଯାଇଛି । ତେଣୁ ପୂରା ଦିଲ୍ଲୀର ସମସ୍ତ ପେଟ୍ରୋଲ ପମ୍ପରେ କ୍ୟାମେରା ଲାଗିବା ପରେ ପୁରୁଣା ଗାଡ଼ିକୁ ଚିହ୍ନଟ କରିବା ସହଜ ହେବ ବୋଲି କୁହାଯାଉଛି । 

ଯଦି ପମ୍ପରେ ପହଞ୍ଚେ ପୁରୁଣା ଗାଡ଼ି

ନୂଆ ନିୟମ ହେବା ପରେ ଯଦି ପେଟ୍ରୋଲ ପମ୍ପରେ ପୁରୁଣା ଗାଡ଼ି ପହଞ୍ଚେ ତାହେଲେ ୧୯୮୯ ମୋଟର ଯାନ ଆଇନ ଅନୁସାରେ କାର୍ଯ୍ୟାନୁଷ୍ଠାନ ବି ହେବ । ତେଣୁ ଯେଉଁ ମାଲିକମାନେ ପୁରୁଣା ଗାଡ଼ି ରଖିଛନ୍ତି ସେମାନେ ସତର୍କ ରୁହନ୍ତୁ ନହେଲେ ଅଯଥାରେ ତଣ୍ଡ ଗଣିବେ ।