କନକ ବ୍ୟୁରୋ: ଆଉ ଦିନ କେଇଟା ପରେ ଦେଶ ପାଳିବ ୭୯ତମ ସ୍ବାଧୀନତା ଦିବସ । ବିକଶିତ ଭାରତ ଗଠନ ପାଇଁ ବଡ଼ ବଡ଼ ଖସଡ଼ା ପ୍ରସ୍ତୁତ କରି ସାରିଲେଣି କେନ୍ଦ୍ର ସରକାର । ଓଡ଼ିଶା ସରକାର ବି ଏ କ୍ଷେତ୍ରରେ ଆଗୁଆ ପଦକ୍ଷେପ ନେଇ ଓଡ଼ିଶା ଭିଜନ୍‌-୩୬ ଓ ୪୭ ପାଇଁ ଯୋଜନା ପ୍ରସ୍ତୁତ କରିଛନ୍ତି । ଓଡ଼ିଶା ୨୦୩୬ରେ ତା’ର ଜନ୍ମ ଶତବାର୍ଷିକୀ ପାଳନ କରିବାକୁ ଯାଉଛି । ହେଲେ ଏହାରି ଭିତରେ ଏକ ଖବର ସମସ୍ତଙ୍କୁ ଚିନ୍ତା କରିବାକୁ ବାଧ୍ୟ କରିଛି । ରତ୍ନଗର୍ଭା କେନ୍ଦୁଝର ଜିଲ୍ଲାର ତେଲକୋଇ ବ୍ଲକ୍‌ରେ ଗୋଟିଏ ରାଜସ୍ବ ଗାଁର ୭୦ ପରିବାର ପର୍ଯ୍ୟାୟକ୍ରମେ ଗାଁ ଛାଡ଼ିଦେଇଛନ୍ତି । ଏମାନେ ବନ୍ୟଜନ୍ତୁ କିମ୍ବା ଅନ୍ୟ କୌଣସି ବାହ୍ୟଶକ୍ତି ଭୟରେ ନୁହେଁ, ବରଂ ସରକାରଙ୍କ ମୌଳିକ ସୁବିଧା ନପାଇ ଗାଁ ଛାଡ଼ିଥିବା କହିଛନ୍ତି ।

Advertisment

ଚର୍ଚ୍ଚାରେ ଥିବା ଏହି ଗାଁ ହେଉଛି କେନ୍ଦୁଝରର ଉପାନ୍ତ ତେଲକୋଇ ତହସିଲ ଶିବନାରାୟଣପୁର ଗୋଡ଼ା ପଞ୍ଚାୟତର ତମାଙ୍ଗ । ସରକାରଙ୍କ ରାଜସ୍ଵ ତାଲିକାଭୁକ୍ତ ଏହି ପୁରୁଣା ଗାଁଟି ବର୍ତ୍ତମାନ ପରିବାରଶୂନ୍ୟ । ଏଠାକାର ଲୋକେ ମୂଳ ଗାଁରୁ ଉଠିଆସି ତିନୋଟି ସ୍ଥାନରେ ବସତି କରି ରହୁଛନ୍ତି । ଆଶ୍ଚର୍ଯ୍ୟର କଥା, ସରକାରୀ କାଗଜପତ୍ରରେ ଏବେ ବି ଗାଁଟିର ରାଜସ୍ଵ ମାନ୍ୟତା ରହିଛି । କେହି ଏଠାରେ ବସବାସ କରୁନଥିବା ବେଳେ ପୁରୁଣା ଘରଦ୍ବାର ଭାଙ୍ଗିରୁଜି ଗଲାଣି । ଗାଁର ସିନ୍ଧୁ ପଧାନ କହିଛନ୍ତି, କାହିଁ କେଉଁ କାଳରୁ ଏଠାରେ ଲୋକେ ରହୁଥିଲେ । ୬୮ଟି ପାଉଡ଼ି ଭୂୟାଁ ଜନଜାତି ଓ ୨ଟି ଗଉଡ଼(ଗୋପାଳ) ପରିବାର ଥିଲେ ।

ଲୋକେ ପାହାଡ଼ରେ ଧାନ, ମକା, ଗୁଳୁଚି, ମାଣ୍ଡିଆ, ମୁଗ, ବିରି, କୋଳଥ, ହରଡ଼ ଆଦି ଚାଷ କରୁଥିଲେ । ଛେଳି, ମେଣ୍ଢା, ମଇଁଷି, ଗାଈ ପାଳନ ସାଙ୍ଗକୁ ଜଙ୍ଗଲଜାତ ଦ୍ରବ୍ୟ ସଂଗ୍ରହ କରି ଜୀବିକା ନିର୍ବାହ କରୁଥିଲେ । ୧୯୭୨ରେ ଏଠାରେ ଏକ ପ୍ରାଥମିକ ବିଦ୍ୟାଳୟ ଖୋଲାଯାଇଥିଲା । ଶିକ୍ଷକଙ୍କ ପାଦ ବର୍ଷରେ ଥରେ ଅଧେ ପଡୁଥିଲା । ଲୋକଙ୍କୁ କୌଣସି ସରକାରୀ ସୁବିଧା ମିଳୁନଥିଲା । ପରବର୍ତ୍ତୀ ସମୟରେ ପାନୀୟଜଳ, ରାସ୍ତାଘାଟ, ସ୍ଵାସ୍ଥ୍ୟ ସମସ୍ୟା ଉତ୍କଟ ରୂପ ନେଲା । ଫଳରେ ୩୦ରୁ ୩୫ ବର୍ଷ ପୂର୍ବରୁ ଲୋକେ ଗାଁ ଛାଡ଼ିବା ଆରମ୍ଭ କଲେ ।

ପାହାଡ଼ ଉପରୁ ଖସି ଗୁଣ୍ଡୁରୁ, କାଞ୍ଜିଆଝରଣ ଓ ନୂଆତମାଙ୍ଗ ବସ୍ତି ସ୍ଥାପନ କରି ରହିଲେ । ଗୁଣ୍ଡୁରୁରେ ୩୮ ପରିବାର, କାଞ୍ଜିଆଝରଣରେ ୨୦ ଓ ନୂଆତମାଙ୍ଗରେ ୧୨ଟି ପରିବାର ରହୁଛନ୍ତି । ପ୍ରଥମେ ଗାଁର ପଠାଣି ଦେହୁରୀ, ରଙ୍ଗେଶ୍ଵର ଦେହୁରୀ, ସାଧବ ଦେହୁରୀ, ପାଣ୍ଡବ ଦେହୁରୀ ପରିବାର ସହିତ ଗୁଣ୍ଡୁରୁକୁ ଚାଲି ଆସିଥିଲେ । ପରେ ଅମିନ ଦେହୁରୀ, ଶୁକୁଟା ପଧାନ, କମ୍ପାନି ପ୍ରଧାନ ପରିବାର ସହ କାଞ୍ଜିଆଝରଣକୁ ଆସିଲେ । ସିନ୍ଧୁ ପଧାନ, ଭକ୍ତ ପଧାନ, ସଦନ ଦେହୁରୀ, ହାଡ଼ିବନ୍ଧୁ ଦେହୁରୀ ପ୍ରମୁଖ ନୂଆତମାଙ୍ଗ ଚାଲିଆସିଲେ । ଗତ ରଜ ବେଳେ ଶେଷ ପରିବାର ଭାବେ ହୁଣ୍ଡୁଳ ପଧାନ ନିଜର ୧୩ ଜଣ ଘର ଲୋକଙ୍କୁ ଧରି ଭିଟାମାଟି ଛାଡ଼ିଲେ । ରାସନ ସାମଗ୍ରୀ, ପକ୍କାଘର, ଶିକ୍ଷା, ସ୍ବାସ୍ଥ୍ୟ, ମୋବାଇଲ ସେବା ଲୋକଙ୍କୁ କିଛି ମିଳୁନଥିଲା । ରାସ୍ତା ନଥିବାରୁ ଚାଉଳ ଓ ରାସନ ସାମଗ୍ରୀ ଧରି ପାହାଡ଼ ଚଢ଼ିବା ଏମାନଙ୍କ ପାଇଁ କଷ୍ଟ ହେଉଥିଲା ।

ଶିବନାରାୟଣପୁରଗୋଡ଼ା ପଞ୍ଚାୟତ ସଦର ମହକୁମାରୁ ପାହାଡ଼ିଆ ରାସ୍ତାରେ ୧୫ କିମି ଓ ତେଲକୋଇ ବ୍ଲକ୍ ମହକୁମାରୁ ୨୭ । କିମି ଦୂରରେ ରହିଛି ଏହି ଗାଁ । ଏ ଦିଗରେ ଆବଶ୍ୟକ ପଦକ୍ଷେପ ଗ୍ରହଣ କରାଯିବ ବୋଲି କହିଛନ୍ତି ଭାରପ୍ରାପ୍ତ ତହସିଲଦାର ଗୋପବନ୍ଧୁ ନାୟକ । କେନ୍ଦୁଝର ଜିଲ୍ଲାର ଦୁର୍ଗମ ଅଞ୍ଚଳରେ ଏଭଳି ଅନେକ ରାଜସ୍ୱ ଗ୍ରାମ ଜନଶୂନ୍ୟ ହୋଇପଡ଼ିଲାଣି । ସରକାର ଏ ନେଇ ତଥ୍ୟ ସଂଗ୍ରହ କରି ପଦକ୍ଷେପ ନେବାକୁ ଦାବି ହୋଇଛି । ଦେଖିବା କେବେ ସରକାର ଏହି ଗାଁଲୋକଙ୍କ ମନକଥା ବୁଝିପାରୁଛନ୍ତି ।