ଭସ୍ମାସୁର ସାଜିବେ ଟ୍ରମ୍ପ ! ନିଜକୁ ନିଜେ କରିବେ ବିନାଶ, ଭାରତ ଲଗାଇବ ପାଲଟା ଶୁଳ୍କ

କନକ ବ୍ୟୁରୋ : ଟ୍ରମ୍ପଙ୍କ ଟାରିଫ୍ ପ୍ଲାନ୍ ସାରା ବିଶ୍ବକୁ ଚିନ୍ତାରେ ପକାଇଛି । ବିଶ୍ୱର ଅନେକ ଦେଶ ଉପରେ ଶୁଳ୍କ ଲାଗୁ କରିଛନ୍ତି ଟ୍ରମ୍ପ । ଭାରତ ଏବଂ ବ୍ରାଜିଲ ଉପରେ ସର୍ବାଧିକ ୫୦% ଶୁଳ୍କ ଲାଗୁ କରାଯାଇଛି । ଟ୍ରମ୍ପ ଭାବୁଛନ୍ତି ତାଙ୍କର ଶୁଳ୍କ ଚାପରେ ସବୁ ଦେଶ ଚେପା ହୋଇଯିବେ, କିନ୍ତୁ ସେ ଜାଣିନାହାନ୍ତି ସେ ଧୀରେଧୀରେ ଭସ୍ମାସୁର ହେବାକୁ ଲାଗିଲେଣି । ନିଜ ଗୋଡ଼ରେ ନିଜେ କୁରାଢ଼ି ମାରିବା ଆରମ୍ଭ କରିଦେଲେଣି । ଏକଥା ଆମେ କହୁନାହୁଁ, କିଛି ବିଶେଷଜ୍ଞ ଏହାକୁ ନେଇ ମତ ରଖିଥିବା ବେଳେ, ନିଜ ଦେଶର ଲୋକେ ଟ୍ରମ୍ପଙ୍କୁ ବିରୋଧ କରିବାକୁ ଲାଗିଲେଣି । 

ଟାରିଫ୍ ଦ୍ୱାରା ଅନ୍ୟ ଦେଶ ନୁହେଁ ଟ୍ରମ୍ପଙ୍କ ଏହି ଟାରିଫର ପ୍ରଭାବ ଆମେରିକାରେ ବି ଦେଖିବାକୁ ମିଳିଛି । ଟ୍ରମ୍ପ ତାଙ୍କ ନିର୍ବାଚନ ପ୍ରଚାରରେ ପ୍ରତିଶ୍ରୁତି ଦେଇଥିଲେ ଯେ ସେ ଗ୍ରୋସରୀ ସାମଗ୍ରୀକୁ ଶସ୍ତା କରିବେ ।  ସେ କହିଥିଲେ ଯେ ଆମେରିକୀୟମାନେ ଖୁବ୍ ଶୀଘ୍ର ସହଜରେ ଗ୍ରୋସରୀ ସାମଗ୍ରୀ କିଣିପାରିବେ, କିନ୍ତୁ ଟାରିଫ୍ ପ୍ରଭାବରେ ଦେଶରେ ଗ୍ରୋସରୀ ସାମଗ୍ରୀର ମୂଲ୍ୟ ବୃଦ୍ଧି ପାଉଛି । ଏଥିରେ ବିଚଳିତ ହୋଇ ଆମେରିକୀୟ ଲୋକମାନେ ସେମାନଙ୍କର କିଣାକିଣି ଅଭ୍ୟାସ ପରିବର୍ତ୍ତନ କରୁଛନ୍ତି । ସେମାନେ ଏବେ ଅର୍ଥନୀତିକୁ ନେଇ ଚିନ୍ତିତ । ଟ୍ରମ୍ପଙ୍କ ଶୁଳ୍କର ପ୍ରଭାବ ସାରା ବିଶ୍ୱରେ ଦେଖାଯାଉଛି । ଏହା ସହିତ ଆମେରିକାରେ ମଧ୍ୟ ତାତି ବଢୁଛି । 

ସିଏନଏନ ରିପୋର୍ଟ ଅନୁଯାୟୀ, ଏକ ସାମ୍ପ୍ରତିକ ସର୍ଭେରୁ ଜଣାପଡିଛି ଯେ ଅଧାରୁ ଅଧିକ ଆମେରିକୀୟ ଖାଦ୍ୟ ସାମଗ୍ରୀର ମୂଲ୍ୟକୁ ନେଇ ଚିନ୍ତିତ ।  ୫୩% ଲୋକ କହିଛନ୍ତି ଯେ ଗ୍ରୋସରୀ ସାମଗ୍ରୀର ମୂଲ୍ୟ ସେମାନଙ୍କର ସବୁଠାରୁ ବଡ଼ ଚିନ୍ତା । ସର୍ଭେରୁ ଜଣାପଡୁଛି ଯେ ଆମେରିକୀୟମାନେ ଖାଦ୍ୟ ସାମଗ୍ରୀର ଉଚ୍ଚ ମୂଲ୍ୟ ଏବଂ ଅର୍ଥନୀତିର ଅବସ୍ଥାକୁ ନେଇ ଚିନ୍ତିତ । ବିଶେଷକରି ଅଣ୍ଡା, ଗୋମାଂସ, କମଳା ରସ ଏବଂ ଅନ୍ୟାନ୍ୟ ଜିନିଷର ମୂଲ୍ୟ ବୃଦ୍ଧି ପାଇଛି । ଟ୍ରମ୍ପଙ୍କ ଶୁଳ୍କ ଯୋଗୁଁ, ବିଦେଶରୁ ଆସୁଥିବା ଫଳ, କଫି ଏବଂ ଅନ୍ୟାନ୍ୟ ଜିନିଷର ମୂଲ୍ୟ ବୃଦ୍ଧି ପାଉଛି ।

ଆମେରିକା ବିଶ୍ୱର ସବୁଠାରୁ ବଡ଼ ଅର୍ଥନୀତି ଏବଂ ପ୍ରାୟ ସମସ୍ତ ଦେଶ ସହିତ ବାଣିଜ୍ୟିକ ସମ୍ପର୍କ ରଖିଛି । ଆମେରିକାର ବଜାର ବହୁତ ବଡ଼ କିନ୍ତୁ ସେଠାକାର ଅଧିକାଂଶ ଜିନିଷ ଆମଦାନୀ କରାଯାଏ । ଏପରିକି ପାନୀୟ ସାମଗ୍ରୀ ମଧ୍ୟ ଆମଦାନୀ କରାଯାଏ । ପୂର୍ବରୁ, ଆମେରିକାକୁ ଆସୁଥିବା ସାମଗ୍ରୀ ଉପରେ ଅତି କମରେ ୧୦% ଶୁଳ୍କ ଲାଗୁ କରାଯାଉଥିଲା, କିନ୍ତୁ ବର୍ତ୍ତମାନ ପରିସ୍ଥିତି ସମ୍ପୂର୍ଣ୍ଣ ବଦଳି ଯାଇଛି । ଟ୍ରମ୍ପ ପ୍ରତ୍ୟେକ ଦେଶ ଉପରେ ଭିନ୍ନ ଭିନ୍ନ ଶୁଳ୍କ ଲାଗୁ କରିଛନ୍ତି । ଯାହାର ପ୍ରଭାବ ଅନ୍ୟ ଦେଶ ଉପରେ ପଡ଼ିବା ସହ ଆମେରିକା ବି ଏଥିରେ ପ୍ରଭାବିତ ହୋଇଛି । 

ଆମେରିକା ଉପରେ ଭାରତ ଲଗାଇବ ଟାରିଫ୍ ! 
ଆମେରିକା ବର୍ତ୍ତମାନ ଭାରତର ଇସ୍ପାତ, ଆଲୁମିନିୟମ ଭଳି ବିଭିନ୍ନ ସାମଗ୍ରୀ ଉପରେ ୫୦% ଟାରିଫ ଲଗାଇଛି । ଏହାର ଜବାବରେ ଭାରତ ଆମେରିକାର ବଛା ବଛା ସାମଗ୍ରୀ ଉପରେ ୫୦% ଟାରିଫ ଲଗାଇପାରେ । ଏ ନେଇ ଭାରତ ବିଚାର କରୁଛି ବୋଲି ହିନ୍ଦୁସ୍ତାନ ଟାଇମ୍ସର ଏକ ରିପୋର୍ଟରେ ପ୍ରକାଶ ପାଇଛି । ଏଭଳି ହେଲେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଟାରିଫ ବିରୋଧରେ ଭାରତର ପ୍ରଥମ ଔପଚାରିକ ପାଲଟା କାର୍ଯ୍ୟାନୁଷ୍ଠାନ ହେବ ।

ଟ୍ରମ୍ପ ୩୧ ଜୁଲାଇରେ ସବୁ ଭାରତୀୟ ସାମଗ୍ରୀ ଉପରେ ୨୫% ଟାରିଫ ଲାଗୁ କରିଥିଲେ । ଏହା ପରେ ପୁଣି ଥରେ ୬ ଅଗଷ୍ଟରେ ଋଷଠାରୁ ତେଲ କିଣାକୁ ନେଇ ଭାରତ ବିରୋଧରେ ଅତିରିକ୍ତ ୨୫% ଟାରିଫ ଲାଗୁ କରିଥିଲେ । ଭାରତ ଏବଂ ଆମେରିକା ମଧ୍ୟରେ ଏବେ ମୋଟ ୧୧ ଲକ୍ଷ କୋଟି ଟଙ୍କାର ଦ୍ଵିପାକ୍ଷୀକ କାରବାର ରହିଛି । ଆମେରିକା ଭାରତକୁ ୩.୪୬ ଲକ୍ଷ କୋଟିର ସାମଗ୍ରୀ ରପ୍ତାନି କରୁଛି । ଏହା ମଧ୍ୟରେ ଅଶୋଧିତ ତୈଳ, ପେଟ୍ରୋଲିୟମ, କୋଇଲା, ହୀରା, ବିମାନ ଏବଂ ମହାକାଶ ଯାନ ଯନ୍ତ୍ରାଂଶ ସାମିଲ ରହିଛି । ସେହିଭଳି ଭାରତ ଆମେରିକାକୁ ୭.୩୫ ଲକ୍ଷ କୋଟିର ସାମଗ୍ରୀ ରପ୍ତାନି କରିଥାଏ । ଏହା ମଧ୍ୟରେ ଫାର୍ମାସ୍ୟୁଟିକାଲ ସାମଗ୍ରୀ, ଟେଲିକମ ଡିଭାଇସ, ଜୁଏଲେରୀ, ପେଟ୍ରୋଲିୟମ୍ ଏବଂ ପୋଷାକ ସାମିଲ ରହିଛି । 

ତେବେ ଟ୍ରମ୍ପଙ୍କ ଏହି ଟାରିଫ୍ ପ୍ଲାନ୍ ଆଗାମୀ ଦିନରେ ଟ୍ରମ୍ପ ଏବଂ ଟ୍ରମ୍ପଙ୍କ ଦେଶ ଓ ନାଗରିକଙ୍କ ପାଇଁ ବଡ଼ ସମସ୍ୟା ସୃଷ୍ଟି କରିପାରେ ବୋଲି ମତ ପ୍ରକାଶ ପାଇଛି…