ବ୍ଲାକ ବକ୍ସ ଭିତରେ ବିମାନ ଦୁର୍ଘଟଣା ସତ । ପ୍ଲେନ କ୍ରାସ ପରେ କାହିଁକି ଖୋଜାଯାଏ ବ୍ଲାକ ବକ୍ସ ? ଭୟଙ୍କର ଦୁର୍ଘଟଣା ପରେ ବି କେମିତି ସୁରକ୍ଷିତ ଥାଏ ସତ ଦେଖିଥିବା ଶେଷ ମୁକସାକ୍ଷୀ ? ଜାଣନ୍ତୁ ବ୍ଲାକ ବକ୍ସର ଗୁମର କଥା…

କନକ ବ୍ୟୁରୋ: ବିମାନରେ କାହିଁକି ଖଞ୍ଜାଯାଏ ବ୍ଲାକ୍ ବକ୍ସ ? କେମିତି ଦୁର୍ଘଟଣାର ସତ କହେ ଶେଷ ମୁକସାକ୍ଷୀ? ଶୁକ୍ରବାର ସଞ୍ଜରେ କେରଳରେ ତାଣ୍ଡବ ରଚିଥିଲା ମୃତ୍ୟୁ । କେରଳ କୋଝିକୋଡ୍ ବିମାନବନ୍ଦରରେ ଅବତରଣ କଲାବେଳେ ଫାସ ବସାଇ ବିମାନକୁ ଟାଣି ନେଇଥିଲା କାଳ । ଆଉ ବର୍ଷାଭିଜା ସେହି କାଳ ସଞ୍ଜର ଭୟାନକ ଦୁର୍ଘଟଣାରେ ୧୮ ଜଣ ଆଖି ବୁଜିଥିଲେ, ଶତାଧିକ ଗୁରୁତର ହୋଇଥିଲେ । ତେବେ ଦୁର୍ଘଟଣାର କାରଣ କଣ ଖୋଜା ଚାଲିଥିବା ବେଳେ ଉଦ୍ଧାର ହୋଇଛି ଦୁର୍ଘଟଣାଗ୍ରସ୍ତ ଏୟାର ଇଣ୍ଡିଆ ବିମାନର ବ୍ଲାକ ବକ୍ସ । ଆଉ ଏହି ବ୍ଲାକ ବକ୍ସ କହିବ ଲ୍ୟାଣ୍ଡି କ୍ରାସର ପୂରା କାହାଣୀ । ତେବେ କଣ ଏହି ବ୍ଲାକ୍ ବକ୍ସ ? ବିମାନ ଦୁର୍ଘଟଣା ପରେ ସତ ଜାଣିବାକୁ କାହିଁକି ଖୋଜାଯାଏ ବ୍ଲାକ ବକ୍ସ ? ଜାଣନ୍ତୁ ବ୍ଲାକ ବକ୍ସ ପଛର ବଡ ଗୁମର…

Kanak News is now on WhatsApp

Join and get latest news updates delivered to you via WhatsApp

Join Now

ବିମାନ ଦୁର୍ଘଟଣା ହେବା ମାତ୍ରେ ସଙ୍ଗେ ସଙ୍ଗେ ବ୍ଲାକ ବକ୍ସକୁ ନେଇ ଚର୍ଚ୍ଚା ଆରମ୍ଭ ହୁଏ । କେମିତି ଦୁର୍ଘଟଣା ହେଲା ? କିପରି ଦୁର୍ଘଟଣାର ତଥ୍ୟ ମିଳିପାରିବ? ସେଥିପାଇଁ ବ୍ଲାକ ବକ୍ସକୁ ଖୋଜାଯାଏ । ତେବେ ବ୍ଲାକ ବକ୍ସ ହେଉଛି ଏମିତି ଏକ ଯନ୍ତ୍ର ଯାହା ବିମାନର ପୂରା ଗତିବିଧି ଉପରେ ନଜର ରଖିଥାଏ । ବିମାନ ଉଡାଣର ପ୍ରତି ସେକେଣ୍ଟର ଚଳପ୍ରଚଳନକୁ ରେକର୍ଡ କରୁଥାଏ । ବିମାନର ଡାଟା ରେକର୍ଡ କରୁଥିବାରୁ ଏହାକୁ ବିମାନର ମୁକସାକ୍ଷୀ ବା ଫ୍ଲାଇଟ୍ ଡାଟା ରେକର୍ଡର ବୋଲି ବି କୁହାଯାଏ । ସେହିପରି ବିମାନର ଡାଟା ସଂଗ୍ରହ କରିବାକୁ ସିଭିଆର ମଧ୍ୟ ବଡ ଭୂମିକା ଗ୍ରହଣ କରିଥାଏ । ବିମାନ ଉଡାଣର ଶେଷ ୨ ଘଣ୍ଟାର ସବୁ ତଥ୍ୟ ସିଭିଆର ରେକର୍ଡିଂ କରିଥାଏ । ଜରୁରୀକାଳୀନ ସତର୍କ ଘଣ୍ଟି, ଇଞ୍ଜିନର ଶବ୍ଦ, କ୍ୟାବିନ ଶବ୍ଦ, ଏବଂ ପାଇଲଟ- କୋ ପାଇଲଟ ମଧ୍ୟରେ ହେଉଥିବା କଥାବାର୍ତ୍ତାକୁ ମଧ୍ୟ ରେକର୍ଡ କରିଥାଏ । ସିଭିଆର ହେଉଛି ବ୍ଲାକ ବକ୍ସର ଏକ ଅଂଶ ।

ବ୍ଲାକ୍ ବକ୍ସକୁ ସାଧାରଣତ କଳା ରଙ୍ଗ ବୋଲି ଅନେକ ଭାବନ୍ତି । କିନ୍ତୁ ଏହାର ରଙ୍ଗ କମଳା ଥାଏ । କାରଣ କୌଣସି ପରିସ୍ଥିତିରେ ଯଦି ଦୁର୍ଘଟଣା ହୁଏ ତେବେ ଏହା ପାଣିରେ କି ପାହାଡ ଭିତରେ ପଡିଲେ କିମ୍ବା ନିଆଁରେ ଜଳିଗଲା ପରେ ବି କଳା ହୋଇନଥାଏ । ଏହା ସେମିତି କମଳା ରଙ୍ଗ ବଜାୟ ରଖିଥାଏ । ଯାହା ଝଟକୁଥିବାରୁ ଅନୁସନ୍ଧାନକାରୀ ଟିମକୁ ଖୋଜିବାରେ ସହଜ ହୁଏ ।

ବ୍ଲାକ ବକ୍ସ ବିମାନର ପଛ ଭାଗରେ ଖଞ୍ଜାଯାଇଥାଏ । ଦୁର୍ଘଟଣାରେ ବିମାନର ପଛ ଭାଗ କମ କ୍ଷତି ହେଉଥିବାରୁ ଏହାକୁ ସୁରକ୍ଷିତ ସ୍ଥାନ ଭାବି ଏଠାରେ ରଖାଯାଇଥାଏ । ବଡ ଦୁର୍ଘଟଣାରେ ଯେମିତି ବ୍ଲାକ ବକ୍ସ ଅକ୍ଷତ ରୁହେ ସେଥିପାଇଁ ଶକ୍ତିଶାଳୀ ଧାତୁ ଟିଟାନିୟମର ଏକାଧିକ ପରସ୍ତ ଦେଇ ଏହାର ନିର୍ମାଣ ହୋଇଥାଏ । ଯାହା ନିଆଁରେ ଜଳିଗଲେ କି ଗଭୀର ସମୁଦ୍ରରେ ପଡିଗଲେ ଏହା ଭିତରେ ଥିବା ବିମାନର ସବୁ ଡାଟା ସମ୍ପୂର୍ଣ୍ଣ ସୁରକ୍ଷିତ ରହିବ । ଯାହା ଦୁର୍ଘଟଣାର ପ୍ରକୃତ ସତ କହିପାରିବ ।

ତେବେ ନିଆଁ ଲାଗିଲେ ୧ ହଜାର ଡିଗ୍ରୀ ସେଲସିୟସ ଯାଏଁ ଏହା ତାପ ସହିପାରେ । ଲୁଣି ପାଣିରେ ପଡିଲେ ବି ଏହା କାମ କରେ, ସିଗନାଲ ପଠାଏ । ବ୍ଲାକ ବକ୍ସର ବଡ ବିଶେଷତ୍ୱ ହେଉଛି ଏହା ମାସେ ପାଇଁ ବିନା ବିଜୁଳିରେ କାମ କରିଥାଏ । ଦୁର୍ଘଟଣା ହେଲେ ବ୍ଲାକ ବକ୍ସରୁ ଅହରହ ଏକ ସାଉଣ୍ଡ ବାହାରେ । ଏମିତିକି ସମୁଦ୍ର ଭିତରେ ୨୦ ହଜାର ଫୁଟ ତଳେ ଥିଲେ ବି ଏହି ଶବ୍ଦ ତରଙ୍ଗ ଦ୍ୱାରା ଅନୁସନ୍ଧାନକାରୀ ଟିମ୍ ମଝି ସମୁଦ୍ରରୁ ବ୍ଲାକ ବକ୍ସକୁ ଖୋଜି ପାଆନ୍ତି । ତେବେ ବିମାନ ଦୁର୍ଘଟଣା ମନୁଷ୍ୟକୃତ ନା ଯାନ୍ତ୍ରିକ ଏହା ଜାଣିବାକୁ ବ୍ଲାକ ବକ୍ସର ପରିକଳ୍ପନା କରାଯାଇଥିଲା । ଆଉ ୧୯୫୪ ମସିହାରେ ଅଷ୍ଟ୍ରେଲିଆରେ ଏହାର ଉଦ୍ଭାବନ ହୋଇଥିଲା ।