କରୋନା କଟକଣାରେ କଲବଲ ଦିବ୍ୟାଙ୍ଗ ମୁଡୁକିବାଲା । ପରିବାରର ପେଟରେ ଦାନାଗଣ୍ଡେ ଦେବାକୁ ଆଶାବାଡ଼ି ସାହାରାରେ ବୁଲୁଛନ୍ତି ଗାଁ କୁ ଗାଁ..
କନକ ବ୍ୟୁରୋ: ଦେହରେ ହଳେ କପଡ଼ା, ଚପଲ ନଥିବା ଚମଡ଼ା ଭରା ପାଦ, କାନ୍ଧରେ ବଡ଼ ବ୍ୟାଗ୍ ବୋଝ ବୋହି ଚାଲି ଚାଲି ଯାଉଛି, ଆଗକୁ ବଢୁଛି ଆଉ ହାତରେ ଥିବା ଆଶାବାଡ଼ି ଖଣ୍ଡେ ତାଙ୍କୁ ଟାଣି ନେଉଛି । କାରଣ ପେଟ ପାଇଁ ବଞ୍ଚିବାକୁ ତ ପଡ଼ିବ ନା, ଯେତେ ଲକଡାଉନ୍ କି ସଟଡାଉନ୍ ହେଉ, ପରିବାର ପାଟିରେ ଦୁଇମୁଠା ଦାନା ଦେବାକୁ ବାଡ଼ି ସାହାରାରେ ବାହାରି ପଡ଼ିଛନ୍ତି ଜଣେ ଦିବ୍ୟାଙ୍ଗ ମୁଡୁକି ବାଲା । କରୋନା କଟକଣାରେ କେମିତି ଜୀବନ ଜୀବିକା ଦହଗଞ୍ଜ ହେଉଛି କନକ ନ୍ୟୁଜ୍ କ୍ୟାମେରା କଏଦ କରିଥିବା କିଛି ଲକଡାଉନ୍ କାହାଣୀ ଆଜି ଆମେ ଦେଖାଇବୁ ।…
Kanak News is now on WhatsApp
Join and get latest news updates delivered to you via WhatsApp
ଏ ହେଉଛି ଗଂଜାମ ଜିଲ୍ଲା ରେଶମ ସହରର କଥା, ଏଠି ଅନେକ ଲୋକ ଏହି ମହାମାରି ସମୟରେ ନିଜ ରୋଜଗାର ହରାଇଛନ୍ତି । ଲକଡାଉନର ଏହି ଅଦେଖା ଗହଳି ଚହଳି ଭିତରେ ଆମ ନଜର ପଡିଥିଲା ଲୋଚାପଡ଼ା ଅଞ୍ଚଳର କୈଳାସ ମହାରଣା ଉପରେ । ବେପାର କହିଲେ ବୁଲିବୁଲି ମୁଡୁକି ବିକିବା, ଆଉ ପରିବାର କହିଲେ, ସ୍ତ୍ରୀ ଆଉ ଛୋଟ ଛୋଟ ଦୁଇଟି ଛୁଆ । କିଛି ବର୍ଷ ପୂର୍ବେ ଦୃଷ୍ଟିଶକ୍ତି ଚାଲିଗଲା, ଆଉ ତା’ ପରେ ପରିବାର ଚଳାଇବା ଟା ଭାରି କଷ୍ଟ ହୋଇପଡିଥିଲା । ତଥାପି ସେ ହାରି ନଥିଲେ ବରଂ ହାତରେ ବାଡ଼ି ଟିଏ ଧରି ବୁଲିବୁଲି ସହର ସାରା ବିକୁଥିଲେ ମୁଡୁକି । ହେଲେ କୋରୋନା କଟକଣା ଭାଙ୍ଗିଦେଲା ତାଙ୍କ ମନୋବଳ । ଘରଭଡାଠୁ ଆରମ୍ଭ କରି ରାସନ ଏମିତି କି ପରିବା ମଧ୍ୟ ବାକିରେ ଆଣି ଚଳୁଛନ୍ତି ଆଉ ଯଦି ଆଗକୁ ଏହି କଟକଣା ପୁଣି ବଢେ ତାହେଲେ ତାଙ୍କ ପରିବାର ଭୋକରେ ମରିଯିବା କଥା କହିଛନ୍ତି କୈଳାସ ।
ଖାଲି ସେତିକି ନୁହେଁ ଲକଡାଉନ ସଟଡାଉନରେ ଅନେକ ଲୋକ ଏମିତି ରୋଜଗାର ହରାଇଛନ୍ତି । ସେହି ଅଞ୍ଚଳରେ ଦୀର୍ଘ ୩୦ ବର୍ଷ ଧରି ସାଇକଲ ମରାମତି କରି ନିଜ ପରିବାର ପ୍ରତିପୋଷଣ କରୁଥିବା ପ୍ରତାପ ଚନ୍ଦ୍ର ପତିଙ୍କ ଅବସ୍ଥା ବି ସମାନ । ପରିବାରରେ ୬ ପ୍ରାଣୀ, ୧୦୦ ରୁ ୨୦୦ ଯାହା ରୋଜଗାର କରୁଥିଲେ ସେତିକିରେ ତାଙ୍କ ଘର ଚଳୁଥିଲା ହେଲେ ଲଗାତାର ଲକଡାଉନ ଆଉ ସଟଡାଉନରେ ସେ ମଧ୍ୟ ଏବେ ହରାଇଛନ୍ତି ତାଙ୍କ ରୋଜଗାର । ଯଦି ଆଗକୁ ପୁଣି ଏହି କଟକଣା ବୃଦ୍ଧି ହୁଏ ତ ପରିବାର ପେଟରେ ଦାନା ଗଣ୍ଡାଏ ଦେବା କାଠିକର ହୋଇପଡିବ ବୋଲି ସେ କହିଛନ୍ତି ।
ତେବେ ଲକଡାଉନର ଲକ୍ଷ୍ମଣରେଖା କାହା ପାଇଁ ସୁରକ୍ଷା, କାହା ପାଇଁ ଭୂତାଣୁ ଭିତରେ ଭୋକର ଭିକ୍ଷା । କରୋନା ଚେନ୍ ଭାଙ୍ଗିବାକୁ ଏହି କଟକଣାର ସୀମାରେଖା ଅନେକଙ୍କ ପାଇଁ ସଘର୍ଷର ସୀମା ଟପିଯାଇଛି । ଲଗାତାର ଲକଡାଉନ୍-ସଟଡାଉନ୍ ଜୀବନ-ଜୀବିକାକୁ ଏମିତି ଜାବୁଡ଼ି ଧରିଛି ଯେ ସେଥିରୁ ମୁକୁଳିବା ବି କଷ୍ଟ ହୋଇପଡ଼ିଛି ଯଦି ଆଗକୁ ସରକାର ଏମାନଙ୍କ କଥା ବିଚାର କରନ୍ତି ତେବେ ଏମାନଙ୍କ ବଞ୍ଚିବା କଷ୍ଟକର ହୋଇପଡ଼ିବ ।