କନକ ବ୍ୟୁରୋ: ସହର ଶୋଇଛି, ମୋ ରିକ୍ସା ଚାହିଁଛି । ଧାଡ଼ି ଧାଡ଼ି କରି ଲାଇନରେ ଛିଡ଼ା ବି ହୋଇଛି, ପଇସା ପାଇଁ କେତେବେଳେ ତା’ ପିଠି ଉପରେ ଗରାଖ ଜଣେ ଆସି ବସିବ ସେ ସମ୍ଭାବନାକୁ ଆଦରି ସଟଡାଉନ-ଲକଡାଉନରେ ଖରା-ବରଷା ବି ସହୁଛି । ସହରର ଗଳି କନ୍ଦିରେ ରିକ୍ସା ମୋର ଶୋଇଛି…. ରିକ୍ସା ମୋର ଶୋଇଛି, ମୁଁ ରିକ୍ସାବାଲା କହୁଛି…
Kanak News is now on WhatsApp
Join and get latest news updates delivered to you via WhatsApp
ଯେତେବେଳେ କରୋନାର ଦ୍ୱିତୀୟ ଲହର ଦେଶର ବିଭିନ୍ନ କ୍ଷେତ୍ରକୁ ଦୁର୍ବଳ କରିଚାଲିଛି, ତା’ରି ଭିତରେ ଶୁଭୁଛି ରିକ୍ସା ବାଲାର ହୃଦୟର ବେଦନା । ଭୂତାଣୁ ଭୟ ଭିତରେ ବି ଭୋକର ଯାତନା କେତେ ଯେ କଷଣ ଦେଇପାରେ ତାହା ଏହି କାନ୍ଥକୁ ଆଉଜି ପିଠି ପାରିଥିବା ରିକ୍ସାବାଲା ହିଁ ବେଶ୍ ଭଲ କରି ବୁଝିଛି । ଗଣ୍ଡେ ଦାନା ପାଇଁ ଗାମୁଛାଟିଏ ମୁହଁରେ ବାନ୍ଧି ସଂକ୍ରମଣକୁ ନାଲି ଆଖି ଦେଖାଉଛି ସତ କିନ୍ତୁ ଲକଡାଉନ ଲୁହ ପୋଛିବା ପାଇଁ ପଇସାଟିଏ ନାହିଁ ।
ଗାଁଠୁ ଆରମ୍ଭ କରି ସହର, ଦ୍ୱିତୀୟ ଲହର ପାଇଁ ସବୁ ଯେବେ ଦିନ-ରାତି ଶୋଇପଡ଼ିଛି ଠିକ୍ ସେତିକିବେଳେ ରେଶମ ସହରର ରିକ୍ସାବାଲା ପେଟର ଭୋକ ମାରିବାକୁ ଗରାଖକୁ ଅପେକ୍ଷା କରିଛି । ସେ ଜାଣିଛି ସଂକ୍ରମଣକୁ ରୋକିବା ପାଇଁ ସରକାର କଟକଣା ଲଗାଇଛନ୍ତି, କିନ୍ତୁ ପେଟପାଟଣା ପାଇଁ ତାକୁ ମୁଠାଏ ଦାନା ଯେମିତି ହେଲେ ବି ଯୋଗାଡ଼ କରିବାକୁ ପଡ଼ିବ । ମହାମାରୀ ଭୟରେ ମଣିଷ ପଦାକୁ ନବାହାରିଲେ ତା ମନକୁ ମାରି ରିକ୍ସା ଚକକୁ ଟିକେ ଆଗକୁ ଆଗକୁ ଗଡ଼ାଇଦେଉଛି ।
ଜନଶୂନ୍ୟ ରାସ୍ତା ଜୀବନ ପାଇଁ ସଂଘର୍ଷ ବୋଧ୍ ହୁଏ ଏହାଠାରୁ ବେଶୀ ଦାରୁଣ ଦୃଶ୍ୟ କିଛି ନହୋଇପାରେ । କରୋନାର କୋପ ଆଉ ତା’ ଉପରେ କଷଣ ଭରା କଟକଣା ସତେ ଯେମିତି ଏମାନଙ୍କ ଉପରେ ଦ୍ୱିତୀୟ ଲହର ରୂପରେ ଦଇବ ଦଣ୍ଡ ଭଳି ସଦୃଶ । ଏଦୃଶ୍ୟ ରେଶମ ସହର ବ୍ରହ୍ମପୁରର । ଠିକ୍ ବର୍ଷେ ତଳେ ଯେମିତି ଥିଲା ଏହି ସମୟର ଦୃଶ୍ୟ ତାହାର ପୁନରାବୃତ୍ତି ଦ୍ୱିତୀୟ ଲହରରେ ଦେଖିବାକୁ ମିଳିଛି । କରୋନା ପାଇଁ କରଜ ଓ ହାତ ଉଧାର କରି ଦୀର୍ଘ ବର୍ଷେ ଧରି ଜୀବନ କାଟିଥିଲେ ଏମାନେ । ସଂକ୍ରମଣରେ ବିରତି ଲାଗିଲା ପରେ ଧିରେ ଧିରେ କଟକଣା ହଟିବାରେ ଲାଗିଥିଲା କିନ୍ତୁ ଏ ମହାମାରୀ ମଣିଷର ଜବୀନ ଓ ଜୀବିକାକୁ ପୁଣି ଥରେ ଏମିତି ସଂକ୍ରମଣ ଭରା ଶାସ୍ତି ଦେଉଛି ଯେ ତାହା ଏ ଦୃଶ୍ୟ ହିଁ ବୟାନ କରୁଛି ।
ତେବେ ସରକାରଙ୍କ ପକ୍ଷରୁ ଲୋକଙ୍କ ସୁରକ୍ଷା ପାଇଁ ଅନେକ ଯୋଜନା କରାଯାଉଛି କିନ୍ତୁ ଅନେକ ନିୟମ ଓ କଟକଣା ଭିତରେ ଗରିବ ଖଟିଖିଆମାନେ ଜୀବିକା ହରେଇ ବସୁଛନ୍ତି । ଗାଁ ଗହଳିରେ ଦିନ ମଜୁରିଆଙ୍କୁ କେଉଁଠି ନା କେଉଁଠି ରୋଜଗାର ମିଳିଯାଉଛି ହେଲେ ସଂକ୍ରମଣ ଭୟରେ ଶୋଇରହିଥିବା ସହରରେ ଏବେ ବି ଜୀବନ ପାଇଁ ସଂଘର୍ଷ ଜାରି ରହିଛି । ଯଦି ପ୍ରଶାସନ ଏମାନଙ୍କ ପାଇଁ କିଛି ସ୍ଥାୟୀ ବ୍ୟବସ୍ଥା କରନ୍ତା ତେବେ ଏମାନେ ବି ଖୁସିଖୁସିରେ ପରିବାର ପେଟ ପୂରା କରିପାରନ୍ତେ ।
ଏପଟେ ଜୀବନ ସେପଟେ ଜୀବିକା ମଝିରେ ମହାମାରୀ କରୋନା ଟାଣିଛି କଟକଣାର ଲକ୍ଷ୍ମଣରେଖା । ଆଉ କରୋନା ପାଇଁ ବର୍ଷକ ତଳେ ଯେମିତି ଦହଗଞ୍ଜ ହେଉଥିଲେ ଏମାନେ ଠିକ୍ ସେମିତି ଦ୍ୱିତୀୟ ଲହରର ଦୋହରାଇ ଦେଇଛି ସମାନ ଦୁର୍ଦ୍ଦଶା ।