କନକ ବ୍ୟୁରୋ : ବ୍ରଣ ହେଉଛି ଏକ ସାଧାରଣ ଚର୍ମ ରୋଗ । ଯାହାକି ଆଜିର ଦିନରେ ଉଭୟ ପୁରୁଷଙ୍କଠାରୁ ଆରମ୍ଭ କରି ମହିଳା ଆଉ ଛୋଟ ପିଲାଙ୍କ ପାଖରେ ଦେଖିବାକୁ ମିଳୁଛି । ବିଶେଷକରି ଯୁବପିଢି ମୁହଁରେ ବ୍ରଣ ସସମ୍ୟାକୁ ନେଇ ଅଧିକ ଚିନ୍ତାରେ ରହିଥାନ୍ତି । ଆଉ ବ୍ରଣରୁ ମୁକ୍ତି ପାଇବା ପାଇଁ ମୁହଁରେ ଅନେକ ପ୍ରକାରର କ୍ରିମ୍ ଓ ଅଏଟଂମେଟଂ ଲଗାଇଥାନ୍ତି । ତେଣୁ ଆଜି ଆସନ୍ତୁ ଜାଣିବା ଏହି ବ୍ରଣର କାରଣ କଣ ଏହାକୁ ଆପଣ କେମିତି ରୋକିପାରିବେ…
Kanak News is now on WhatsApp
Join and get latest news updates delivered to you via WhatsApp
ବ୍ରଣ ହେବାର ମୁଖ୍ୟ କାରଣ ହେଲା ହରମୋନାଲ । ଯେତେବେଳେ ପୁଅ ପିଲାଙ୍କର ଦାଢି ନିଶ ଉଠିବା ଆରମ୍ଭ କରେ ଓ ଝିଅମାନଙ୍କର ଋତୁସ୍ରାବ ଆରମ୍ଭ ହୁଏ , ସେ ସମୟରେ ଉଭୟ ମହିଳା ଓ ପୁରୁଷଙ୍କର ହରମୋନାଲ ସନ୍ତୁଳନ ବିଗିଡି ଯାଇଥାଏ । ଏହି ସମୟରେ ଶରୀରରେ ଆଣ୍ଡ୍ରୋଜେନ୍ ନାମକ ହରମୋନ୍ କ୍ଷରିତ ହୋଇଥାଏ । ଫଳରେ ତ୍ୱଚା ଅଧିକ ତେଲିଆ ହେବା ସହ ମୁହଁର ଚର୍ମ ଭିତର ଛିଦ୍ର ବନ୍ଦ ହୋଇଯାଏ । ଯାହା ଫଳରେ ତ୍ୱଚାରେ ଅଧିକ ତେଲ ଜମା ହୋଇ ବ୍ରଣ ସୃଷ୍ଟି ହୋଇଥାଏ ।
ଏହାସହ ଅନେକ ସମୟରେ ପିଲାମାନେ ବ୍ରଣରେ ହାତ ମାରି ଏହାକୁ ଛିଣ୍ଡାଇ ଦେଇଥାନ୍ତି । ଯାହାଫଳରେ ବ୍ରଣ ଆହୁରି ଅଧିକ ବଢିଥାଏ । ତା ସହିତ ଚିନି, ଫାଷ୍ଟଫୁଡ୍, ଜଙ୍କଫୁଡ୍ ଅଧିକ ଖାଇଲେ ମୁହଁରେ ବ୍ରଣ ହେବାର ଆଶଙ୍କା ରହିଥାଏ । ବର୍ତମାନର ଜୀବନଶୈଳୀ ଓ ମାନସିକ ଚାପ ମଧ୍ୟ ମୁହଁରେ ବ୍ରଣ ହେବାର ଅନ୍ୟ ଏକ ପ୍ରମୁଖ କାରଣ ।
ବ୍ରଣ ହେଉଥିଲେ ମୁହଁର ଯତ୍ନ କେମିିତି ନେବେ ?
• ବ୍ରଣରେ ହାତ ମାରିଲେ ତାହା ଦାଗ ହୋଇପାରେ କିମ୍ବା ସେହି ସ୍ଥାନରେ ଖାଲ ହୋଇପାରେ । ତେଣୁ ବ୍ରଣରେ କଦାପି ହାତ ମାରନ୍ତୁ ନାହିଁ
• ମୁହଁରେ ଅଯଥାରେ କୌଣସି କ୍ରିମ୍, ମେକଅପ୍ ଲଗାନ୍ତୁ ନାହିଁ । ମୁହଁରେ ଅଧିକ ମେକଅପ୍ ଲଗାଇଲେ ମୁହଁର ଛିଦ୍ର ବନ୍ଦ ହୋଇଯାଏ, ଆଉ ମୁହଁରେ ବ୍ରଣ ବାହାରେ
• ଯଦି ଆପଣ ମୁହଁରେ ମେକଅପ୍ ଲଗାଉଛନ୍ତି, ତେବେ ମେକଅପକୁ ଭଲ ଭାବରେ ଛଡାନ୍ତୁ । ମେକଅପ୍ ଛଡାଇବା ସମୟରେ ମେକଅପ୍ ରିମୁଭର, ଗୋଲାପ ଜଳ ଓ ନଡିଆ ତେଲ ବ୍ୟବହାର କରନ୍ତୁ
• ମୁହଁରେ ଅଯଥାରେ କୌଣସି କ୍ରିମ୍ ଲଗାନ୍ତୁ ନାହିଁ । ଫାଷ୍ଟଫୁଡ୍, ଜଙ୍କଫୁଡଠାରୁ ଯଥା ସମ୍ଭବ ଦୂରରେ ରୁହନ୍ତୁ
• ପ୍ରତିଦିନ ୭ରୁ ୮ ଘଂଟା ଶୁଅନ୍ତୁ ଏବଂ ମାନସିକ ଚାପରୁ ଦୂରେଇ ରୁହନ୍ତୁ । ସଠିକ୍ ସମୟରେ ନଶୋଇବା ମଧ୍ୟ ମୁହଁରେ ବ୍ରଣ ହେବାର ଏକ ପ୍ରମୁଖ କାରଣ
• ମୁହଁରେ ସନସ୍କ୍ରିନ ବ୍ୟବହାର କରନ୍ତୁ, ଏହାଦ୍ୱାରା ତ୍ୱଚା ଭଲ ରହିଥାଏ । ଯଦି ତା ପରେ ବି ମୁହଁରେ ଅତ୍ୟଧିକ ବ୍ରଣ ବାହାରୁଛି, ତେବେ ଡାକ୍ତରଙ୍କ ପରାମର୍ଶ ନିଅନ୍ତୁ
ଘରୋଇ ଉପଚାର କେତେ ସୁରକ୍ଷିତ ?
ଆମ ସମସ୍ତଙ୍କର ଚର୍ମ ଭିନ୍ନ ଭିନ୍ନ । ଯଦି ଜଣଙ୍କ ତ୍ୱଚାରେ କୌଣସି ଘରୋଇ ଉପଚାର ସୁହାଇଥାଏ, ଅନ୍ୟ ଜଣକ ତ୍ୱଚାରେ କିନ୍ତୁ ତାହା ସୁହାଇନଥାଏ । ତେଣୁ ନିଜ ମନଇଚ୍ଛା କୌଣସି ଘରୋଇ ଉପଚାର ବ୍ୟବହାର କରନ୍ତୁ ନାହିଁ । ଅଧିକାଂଶ ଲୋକ ମୁହଁରୁ ବ୍ରଣ ଯିବା ପାଇଁ ବେସନ, ହଳଦୀ ଭଳି ଘରୋଇ ଜିନିଷ ଲଗାଇଥାନ୍ତି । ହେଲେ ଏହା ମୁହଁକୁ ଅଧିକ ନଷ୍ଟ କରିଦେଇଥାଏ । ତେଣୁ ବ୍ରଣ ଯିବା ପାଇଁ ସବୁବେଳେ ମୁହଁକୁ ସଫା ରଖନ୍ତୁ ।