ମାଟିରୁ ଆକାଶ ଆଜିର ମହିଳା... ଅସୀମ ଧର୍ଯ୍ୟର ଉଦ୍ଧ୍ୱର୍ରେ, ସଙ୍ଘର୍ଷ କରି ସବୁ ସଫଳତାର ଶୀର୍ଷରେ... ମହିଳା ଦିବସରେ ତେଜସ୍ୱିନୀ, ଓଜସ୍ୱିନୀଙ୍କୁ ଶତ ଶତ ପ୍ରଣାମ...

କନକ ବ୍ୟୁରୋ: ନାରୀ ସ୍ନେହ, ପ୍ରେମର ଫେଣ୍ଟାଫେଣ୍ଟି ପ୍ରତୀକ । ନାରୀ ସହି ଜାଣେ, ବୋଝ ବୋହି ବି ଜାଣେ । କେବେ ମମତାର ମଖମଲ ରଙ୍ଗ ମାରି ଜୀବନକୁ ରଙ୍ଗୀନ କରେ ତ ପୁଣି କେବେ ସୁରକ୍ଷା ପାଇଁ ସିଂହବାହିନୀ ସାଜେ । ନାରୀ ଈଶ୍ୱରଙ୍କ ଏକ ଅନବଦ୍ୟ ସୃଷ୍ଟି, ଭଗବାନଙ୍କ କାନଭାସରେ ଏକ ସୃଜନଶୀଳ ଚିତ୍ର । ନାରୀକୁ ନେଇ କେତେ ସୃଷ୍ଟି, କେତେ ସର୍ଜନା । ସେଇଥିପାଇଁ ତ ନାରୀ ସୃଷ୍ଟିର ଶ୍ରେଷ୍ଠ ସମ୍ପତ୍ତି, ସ୍ନେହ-ସଙ୍ଘର୍ଷ ଆଉ ସହନଶୀଳତାର ସାକ୍ଷାତ ପ୍ରତିମୂର୍ତ୍ତୀ ।

ଝିଅଟିଏ ଫୁଲଟିଏ । ବଗିଚାରୁ ମନ୍ଦିର ଯାଏଁ ଫୁଲର ଯାତ୍ରା ପରି ଘର ଅଗଣାରୁ ସାରା ବିଶ୍ୱକୁ ଝିଅଟିର ଯାତ୍ରା । ନାରୀ ଆଗ ଭଳି ଏରୁଣ୍ଡି ଭିତରେ ରହୁନି । ହାତେ ଓଢଣାର କଟକଣା ଭିତରେ ନିଜକୁ ସୀମିତ ରଖିନି । ସେ ସଶକ୍ତ, ସେ ସ୍ୱାବଲମ୍ବୀ ହୋଇଛି ଆଉ ନିଜ ଭିତରର ସୁପ୍ତ ପ୍ରତିଭାକୁ ଜାଗ୍ରତ କରି ସମାଜରେ ନୂଆ ପରିଚୟ ସୃଷ୍ଟି କରିଛି । ତେଣୁ ତ ଆଜି ନାରୀକୁ ସାରା ବିଶ୍ୱ ସଲାମ କରୁଛି, ତା ପାଇଁ ଦିନଟିଏ ପାଳୁଛି ।

ସମାଜରେ ଅନେକ ମହିଳା ଅଛନ୍ତି ଯେଉଁମାନେ ଘରର ପାଇଟି ଭିତରେ ବି ପରିବର୍ତ୍ତନର ସ୍ୱପ୍ନ ଦେଖନ୍ତି । ନିଜ ସହ ଅନ୍ୟମାନଙ୍କୁ ନେଇ ସମାଜକୁ ବଦଳାଇବାକୁ ଚେଷ୍ଟା କରନ୍ତି । ସେମିତି ଜଣେ ମହିଳା ହେଉଛନ୍ତି ଆସ୍କା ସାଂସଦ ପ୍ରମିଳା ବିଷୋୟୀ । ଚୁଳି ମୂଳରୁ ସମାଜର ସ୍ୱପ୍ନ ଦେଖିଥିବା ପ୍ରମିଳା ଆଜି ଲୋକଙ୍କ ଭରସା ଜିତି ଲୋକସଭାରେ ପାଦ ଦେଇଛନ୍ତି ।

ସେ କୋରାପୁଟର ବିହନର ଜନନୀ କମଳା ପୂଜାରୀ ହୁଅନ୍ତୁ ବା ଗାଁ ଦାଣ୍ଡରୁ ବିଶ୍ୱସ୍ତରୀୟ ଗ୍ରାଉଣ୍ଡରେ ଦୌଡି ସାରା ଦେଶ ପାଇଁ ସୁନା ଆଣିଥିବା ସୁନା ଝିଅ ଦୂତୀ ଚାନ୍ଦ ହୁଅନ୍ତୁ ସମସ୍ତେ ଏ ସମାଜ ପାଇଁ ଜଣେ ଜଣେ ସଫଳ ଉଦାହରଣ ।

ପେଟ ପାଇଁ, ପରିବାର ପାଇଁ ପୁରୁଷ ସମାଜରେ ରାସ୍ତାକୁ ଓହ୍ଲାଇ ଗୁପଚୁପ ବିକୁଥିବା ସମ୍ବଲପୁର କବରିବାହାଲର ପ୍ରତିମାଙ୍କ କାହାଣୀ ଅନ୍ୟ ମାନଙ୍କ ପାଇଁ ପ୍ରେରଣା ପାଲଟିଥିବା ବେଳେ କେନ୍ଦୁଝର ସଟତିରା ଗାଁର ସଞ୍ଜୁଲତାଙ୍କ କାହାଣୀ ଆଖିରେ ଲୁହ ଆଣିଦେବ ।

ତେବେ ନିଜ ବୋହୂକୁ ବିଧବା ହେବା ଦେଖି ନପାରି ତା ମଥାରେ ପୁଣି ଥରେ ସିନ୍ଦୂର ଦେଇ ଲାଲ ଟୁକଟୁକ ସାଧବ ବୋହୂ ସଜାଇଥିବା ଅନୁଗୁଳ ଗୋବରା ଗାଁର ପୂର୍ବତନ ସରପଞ୍ଚ ପ୍ରତିମା ବେହେରା ସମାଜକୁ ଭିନ୍ନ ଏକ ବାର୍ତ୍ତା ଦେଇଥିଲେ ।

ସେମିତି ବେକେ ପାଣିରେ ପିଲାଙ୍କ ଭବିଷ୍ୟତ ଗଢିବାକୁ ଭରା ନଈ ପାର କରି ପାଠ ପଢାଇବାକୁ ଯାଉଥିବା ଢେଙ୍କାନାଳ ରଥିଆପାଳ ସ୍କୁଲର ଶିକ୍ଷୟିତ୍ରୀ ବିନି ଦିଦି ବି ନିଜ ନିଷ୍ଠା ପାଇଁ ସମସ୍ତଙ୍କ ଆଖିରେ ଶିକ୍ଷାର ସାକ୍ଷାତ ଦେବୀ ପାଲଟିଥିଲେ ।

ତେବେ ମହିଳା ଦିବସ ଆସିଲେ ସମସ୍ତେ ସଫଳ ନାରୀଙ୍କ ଉଦା ହରଣ ଦେଅନ୍ତି, ନାରୀଙ୍କୁ ସମ୍ମାନ, ନାରୀର ସୁରକ୍ଷା କଥା କୁହନ୍ତି । ହେଲେ ଏବେ ଯେଉଁମାନେ ଝିଅଟିଏ ଜନ୍ମ କରୁଛନ୍ତି ସେମାନେ ତାଙ୍କ ଝିଅକୁ ଗଜପତି ଏସପି ସାରା ଶର୍ମା ଓ ଟ୍ରାଫିକ ଡିସିପି ସାଗରିକାଙ୍କ ପରି ହେବାକୁ ସ୍ୱପ୍ନ ଦେଖାଉଛନ୍ତି ।