କନକ ବ୍ୟୁରୋ: ମୁଣ୍ଡ ଉପରେ ଭଙ୍ଗା ମାଟିଘର, ତୁଣ୍ଡକୁ ଯାଉଛି ଭାତ ଲଙ୍କା-ଲୁଣ । ଅସିହା କାଳର ମସିହା ରିଲିଫ୍ ପାଲ ପଲିଥିନ୍ରେ ଢ଼ାଙ୍କି ହୋଇଛି ଘରର ଇଜ୍ଜତ । ବାସ୍ ଏତିକି ହିଁ ବୟାନ କରୁଛି ଯେ, ଆଜି ବି ଓଡ଼ିଶାର ଏମିତି କିଛି ଗାଁ ଅଛି ଯେଉଁଠି ବିକାଶର ପାଦ ଚିହ୍ନ ବି ଦିଶୁନାହିଁ । କଲବଲ କରୁଥିବା କାଦୁଅ ରାସ୍ତା, ଅଚଳ ପଡ଼ିଥିବା ଟ୍ୟୁବଲ୍ କହୁଛି ସରକାରୀ ଯୋଜନାର ବାଟବଣା କାହାଣୀ… ଏମିତି ଏକ ଅପହଞ୍ଚ, ଅବହେଳିତ ଗାଁର ସ୍ଥିତି ପରଖିଛି କନକ ନ୍ୟୁଜ୍…
Kanak News is now on WhatsApp
Join and get latest news updates delivered to you via WhatsApp
ବାଲେଶ୍ୱର ବସ୍ତା ଅଧିନସ୍ଥ ବରୁଣଗଡିଆ ପଞ୍ଚାୟତର ଅଭିଶପ୍ତ ଗାଁ ଅର୍ଜୁନୀ । ବସ୍ତା ସଦର ମହକୁମା ଠାରୁ ମାତ୍ର ୧୦ କିଲୋମିଟର ଦୂରରେ ପଡେ ଏହି ଗାଁ । ଏହି ଗାଁରେ ବସବାସ କରନ୍ତି ୧୨ଟି ପରିବାରର ୮୦ ରୁ ଅଧିକ ଲୋକ । ହଁ ସ୍ୱାଧିନତା ମିଳିଛି ସତ କିନ୍ତୁ ବଞ୍ଚିବାର ସଂଘର୍ଷରୁ ମୁକ୍ତି ମିଳିନି । ଭାଗ୍ୟ ରେଖାରେ ଗରିବୀର ଗାର ଟାଣି ହେବାସହ ଆଦିବାସୀ ବୋଲି ଟ୍ୟାଗ୍ ଲାଗିଛି । ବୋଧ ହୁଏ ସେଥିପାଇଁ ସରକାରୀ ବାବୁଙ୍କ ଆଖି ଆଢୁଆଳରୁ ବହୁ ଦୂରରେ ଅର୍ଜୁନୀ ଗାଁ ।
ବିକାଶର ଡିଣ୍ଡିମ ପିଟୁଥିବା ସରକାର ଥରେ ଅର୍ଜୁନୀ ଗାଁର ଅବସ୍ଥାକୁ ଦେଖିଛନ୍ତି ତ? ଯେଉଁ ଗାଁକୁ ନା ଅଛି ରାସ୍ତା, ନା ଅଛି ପାଣି, ନା ଶିକ୍ଷା,ସ୍ୱାସ୍ଥ୍ୟ କିମ୍ବା ବାସଗୃହ । ୧୨ଟି ପରିବାର ମଧ୍ୟରେ ଛୋଟ ଛୋଟ ପିଲାଙ୍କ ସଂଖ୍ୟା ଅଧିକ । କିନ୍ତୁ ସେମାନଙ୍କ ଭବିଷ୍ୟତ ବି ଅର୍ଜୁନୀ ଗାଁ ଭଳି ଅନ୍ଧାର ସଦୃଶ । ଗାଁଠୁ ୨ରୁ ୩ କିଲୋମିଟର ଦୂରରେ ପଡେ ଅଙ୍ଗନୱାଡ଼ି ଓ ସ୍କୁଲ । ହେଲେ ଭଲ ରାସ୍ତାଟିଏ ନଥିବାରୁ ପିଲାମାନଙ୍କ ପାଠପଢ଼ାରେ ବେଡି ପଡ଼ିଛି । ଯେଉଁଥି ପାଇଁ ଗାଉଁଲି ଖେଳରେ ନିଜର ସମୟ ବିତାଉଛନ୍ତି ଦେଶର ଆଗାମୀ ଭବିଷ୍ୟତ ।
ଦୁଃଖ କହିବା ନା ର୍ଦୁଭାଗ୍ୟ । ନେତା ଆସନ୍ତି କେବଳ ଭୋଟ୍ ପାଇଁ, ନିର୍ବାଚନ ସରିଗଲେ ସ୍ୱାର୍ଥପର ଭଳି ସବୁ ଭୁଲିଯାଆନ୍ତି । ଯେଉଁଥି ପାଇଁ ଆଜି ଅର୍ଜୁନୀ ଗାଁ ଅବହେଳିତ ବା ଗାଁ ଲୋକଙ୍କ ପାଇଁ ଅଭିଶପ୍ତ ପାଲଟିଛି । ଏଠାକାର ଜନପ୍ରତିନିଧି କୁହନ୍ତି, ପୂର୍ବରୁ କେବେ ଜଣେ କେହି ନେତାଙ୍କ ପାଦ ଏଠି ପଡ଼ି ନାହିଁ । ‘ବିକାଶ’କୁ ନୁହେଁ ବରଂ ଏମାନେ ବିକଳ ଚିତ୍ରକୁ ଦେଖିଛନ୍ତି ।
ହଁ ଏହା ବି ସତ, ଅର୍ଜୁନୀ ପରି ଏମିତି ଅନେକ ଗାଁ ଆଜି ବି ଅନ୍ଧାରୀ ମୂଲକରେ ଅଛି । ନେତାଏଁ ନିଜ ପ୍ରତିଶ୍ରୁତିର ପୁଡ଼ିଆକୁ ଯଦି ପୂରଣ କରିଥାନ୍ତେ, ଆଜି ଅର୍ଜୁନୀବାସୀ ନିଜକୁ ଅଭିଶପ୍ତ କୁହନ୍ତେନି । କାଗଜ କଲମରେ ବିକାଶର ବାଃ ବାଃ କରିବା ଅପେକ୍ଷା ଅର୍ଜୁନୀ ଭଳି ଅନେକ ଗାଁକୁ ଯଦି ଆଖିପକାନ୍ତେ ସରକାର, ସେମାନଙ୍କ ମୁହଁରେ ହସ ଫୁଟନ୍ତା । ଆଉ ବିକାଶର ସଂଜ୍ଞା କ’ଣ ତାହା ପ୍ରକୃତରେ ଲୋକଲୋଚନକୁ ଆସନ୍ତା । ଏ ଖବର ଦେଖିବା ପରେ ୧୨ଟି ପରିବାରର ଭାଗ୍ୟ ଭବିଷ୍ୟତ ସରକାର ବୁଝିବେ ବୋଲି ଆମେ ଆଶା କରୁଛୁ… ।