ନବେ ବର୍ଷର ନାଥ ମଉସା । ବୟସର ଅପରାହ୍ଣରେ ବି ବୃତ୍ତିକୁ ଜାବୁଡି ଧରିଛନ୍ତି । ଖେଳନାଠୁ ସ୍ନୋ ପାଉଡର, କାନ୍ଧରେ କାନେ୍ଧଇ ଗାଁ ଗାଁ ବୁଲୁଛନ୍ତି… ପଢ଼ନ୍ତୁ ୬୦ ବର୍ଷ ଧରି ଫେରି କରୁଥିବା ଜଣେ ବୁଲାବିକାଳୀଙ୍କ କାହାଣୀ…
କନକ ବ୍ୟୁରୋ: ମୁଣ୍ଡରେ ଗାମୁଛା, ଦେହରେ ଧୋତି ପାଇଜାମା ଆଉ ହାତରେ ବାଉଁଶ ବାଡିରେ ଗୋଟେ ଛୋଟ ଦୋକାନ ମୁଣ୍ଡେଇ ଗାଁ ଗାଁ, ସାହି ସାହି, ସହରର ଗଳିକନ୍ଦି ବୁଲି ବୁଲି ବେପାର କରନ୍ତି ଏ ବୃଦ୍ଧ ଜଣଙ୍କ । ନାଁ ନାଥ ସାହୁ । ବୟସ ପାଖାପାଖି ୯୦ ହେବ । କିନ୍ତୁ ବୟସର ଅପରାହ୍ଣରେ ବି ହାରି ଯାଇନାହାନ୍ତି ସିଏ । ଚମ ଧୁଡୁଧୁଡୁ ହାତ ଥରୁଥିଲେ ବି ଛାତିରେ ଛାତିଏ ଦମ୍ଭ ଧରି ଏ ବୟସରେ ବି ବୁଲି ବୁଲି ଫେରି କରୁଛନ୍ତି ନାଥ ସାହୁ । ସେଇଥିପାଇଁ ତ ତାଙ୍କୁ ଲୋକେ ଆଦରରେ ନାଥ ମଉସା ବୋଲି ଡାକନ୍ତି…
Kanak News is now on WhatsApp
Join and get latest news updates delivered to you via WhatsApp
ନାଥ ମଉସାଙ୍କୁ କେବଳ ଢେଙ୍କାନାଳ ମାଣ୍ଡପା ସାହିର ଲୋକେ ଜାଣନ୍ତିନି ବରଂ ଆଖପାଖ ଗାଁ ଓ ଖଣ୍ଡମଣ୍ଡଳରେ ତାଙ୍କୁ ସମସ୍ତେ ଚିହ୍ନନ୍ତି । କିଏ କାହାକୁ ଜାଣୁ ବା ନଜାଣୁ ନାଥ ମଉସାକୁ ଆଗ ଜାଣିଥିବେ । ପିଲାଠୁ ବୁଢା ସମସ୍ତଙ୍କ ପାଇଁ ସେ ଚିହ୍ନା ମୁହଁ କାରଣ ସକାଳ ହେଲା କ୍ଷଣି ରାସ୍ତାରେ ଫେରି ଝୁଲା ଧରି ବାହାରି ଯାଆନ୍ତି ନାଥ ମଉସା । କୁହାଯାଏ ନାଥ ମଉସାଙ୍କ ଫେରି ଝୁଲାରେ ବାପାମାଆଙ୍କୁ ଛାଡିଦେଲେ ଆଉ ସବୁ ମିଳିବ । ପିଲାଙ୍କ ଖେଳନା, ଝିଅଙ୍କ ଟିକିଲି, ସଜ ପାଇଁ ସ୍ନୋପାଉଡର ଆଉ ଯାବତୀୟ ଘରକରଣା ଜିନିଷ । ସବୁ ସାମଗ୍ରୀ କାନ୍ଧରେ କାନେ୍ଧଇ ଫେରି କରନ୍ତି ନାଥ ମଉସା ।
ଆଜି କି କାଲି ନୁହେଁ ଦୀର୍ଘ ୬୦ ବର୍ଷ ଧରି ବୁଲା ବିକାଳି ସାଜି ଘର ଚଳାଇ ଆସୁଛନ୍ତି ସେ । ଖୋର୍ଦ୍ଧା ବାଳକାଟିରୁ ଢେଙ୍କାନାଳ ମାଣ୍ଡପା ସାହି ଆସି ସେବେଠୁ ଫେରି କରି ଦୁଖ କଷ୍ଟରେ ପରିବାର ପୋଷି ଆସୁଥିଲେ ନାଥ ମଉସା । ୟାରି ଭିତରେ ତାଙ୍କ ପୁଅମାନେ ବାହାରେ ଚାକିରି ବାକିରି କରି ଘର ଖଣ୍ଡେ କରିଛନ୍ତି । ସେପଟେ ଯୁଗ ସହ ତାଳ ଦେଇ ବଦଳିଛି ଲୋକଙ୍କ ରୁଚି । ବଡ ବଡ ମଲ, ଦାମିକା ଦୋକାନରୁ ଲୋକେ ସାମଗ୍ରୀ କିଣୁଥିବା ବେଳେ ମଉସାଙ୍କ ଠାରୁ କାଁ ଭାଁ କିଣୁଥିବାର ଦେଖିବାକୁ ମିଳୁଛି । ବେପାର କମିଥିଲେ ବି ନିଜ ବେଉସାକୁ ଛାଡି ନାହାନ୍ତି ନାଥ ମଉସା । ବେପାର ହେଉ କି ନହେଉ ନିଜ ବୃତ୍ତିକୁ ଜାବୁଡି ଧରି ଏବେବି ବୟସ୍କ କାନ୍ଧରେ ଫେରି ଝୁଲା ପରି ପୁଅମାନଙ୍କୁ ବୋଝକୁ ହାଲକା କରିବାକୁ ପଣ କରିଛନ୍ତି ନାଥ ।
ତେବେ କିଛିଦିନ ତଳେ ନାଥ ମଉସାଙ୍କୁ ପୁଅମାନେ ପଚାରୁ ନଥିବା ନେଇ ଏକ ଟିଭି ଚ୍ୟାନେଲ ଖବର ପ୍ରକାଶ କରିଥିଲା । ବୟସ ହୋଇଯାଇଥିବାରୁ ସ୍ମୃତିଶକ୍ତି ହରାଇବାକୁ ବସିଲେଣି ନାଥ ମଉସା । ତେଣୁ କାହାକୁ କେତେବେଳେ କଣ କହୁଛନ୍ତି କିିଛି ଜାଣି ପାରୁନାହାନ୍ତି । ଆଉ ମଉସାଙ୍କ ବୟାନକୁ ନେଇ ଖବର ବାଜିବା ପରେ ଲଜ୍ୟାରେ ମୁହଁ ଲୁଚାଇଥିଲା ତାଙ୍କ ପରିବାର । ତେବେ ବୟସର ପଶ୍ଚିମତୀରରେ ନିଜ ବୃତ୍ତିକୁ ଜାବୁଡି ଧରି ପୁଅମାନଙ୍କୁ ସାହାଯ୍ୟ କରୁଥିବା ଏ ବୁଢା ବାପା ଜଣଙ୍କ ସମସ୍ତଙ୍କ ପାଇଁ ଉଦାହରଣ ସାଜିଛନ୍ତି ସବୁ ପିତୃ ଦିବସ ପାଇଁ ପ୍ରେରଣା ପାଲଟିଛନ୍ତି ।