ନାଗଫାଶରୁ ସହରୀ ବାଘ, ଜଗା ହାତରେ ପଘାରୁ ସତ୍ୟ ମେବ ଜୟତେ… ସବୁଠି ନିଜ ଅଭିନୟର ସ୍ୱତନ୍ତ୍ର ଛାପ ଛାଡିଗଲେ ବିଜୟ । ଅଝଟ ଛୁଆକୁ ଶୁଆଇବାକୁ ମାଆ ଯେବେବି ବିଜୟଙ୍କ ‘ଶୋଇଯା ମାମା…’ ଗୀତ ଗାଇବ, ପ୍ରେମ ମନସ୍କ ଯୁବକ ରୂପା ଶଗଡିରେ ସୁନା କନିଆ ଗୁଣଗୁଣାଇବ ସେବେସେବେ ମନେପଡିବେ ବିଜୟ ମହାନ୍ତି…
କନକ ନ୍ୟୁଜ୍: ଆଉ ନାହାନ୍ତି ବିଜୟ ମହାନ୍ତି । ଜୀବନ ଯୁଦ୍ଧରେ ହାରି ଯାଇଛନ୍ତି ଜଗା ହାତରେ ପଘାର ଜଗନ ଭାଇ । ଆଉ ଶେଷ ନିଦ୍ରାରେ ଶୋଇଯାଇଛନ୍ତି ସହରୀ ବାଘ । ବିଜୟଙ୍କ ଜୀବନ ନାଟକରେ ସିନା ଯବନିକା ପଡିଛି ହେଲେ ଚିଲିକା ତୀରେରୁ ଛାତିରେ ଲେଖିଛି ତୋରି ନାଁ… ନାଗ ଫାଶରୁ ନାରୀ ଆଖିରେ ନିଆଁ ସବୁଠି ବିଜୟଙ୍କ ବିଜୟ ଯାତ୍ରା ଅମର ହୋଇ ରହିବ, ଅକ୍ଷୂର୍ଣ୍ଣ ହୋଇ ରହିବ । ଯେବେଯେବେ ଅଝଟ ପିଲାକୁ ମାଆ ଶୋଇଯା ମାମା… ଗୀତ ଗାଇ ଶୁଆଉଥିବ ସେବେସେବେ ମନେ ପଡୁଥିବେ ବିଜୟ । ଆଉ ପ୍ରେମ ମନସ୍କ ଯୁବକଟି ରୂପା ଶଗଡିର ସୁନା କନିଆ ଗୀତ ଗାଉଥିବ ତା ଚାରିପାଖେ ସେ ବିଜୟଙ୍କ ଉପସ୍ଥିତି ଅନୁଭବ କରୁଥିବ । କାରଣ ବିଜୟ ମହାନ୍ତିଙ୍କ ଏ ଗୀତ ଘରେ ଘରେ ପରିଚିତ । ରକ୍ତରେ ମିଶ୍ରିତ…
Kanak News is now on WhatsApp
Join and get latest news updates delivered to you via WhatsApp
୭୦ ବର୍ଷ ବୟସରେ ବିଜୟଙ୍କ ପରଲୋକ ପରେ ସ୍ତବ୍ଧ ହୋଇଛି ଓଡିଶା, ଶୋକରେ ବୁଡିଯାଇଛି ସାରା ସିନେ ଜଗତରେ । ତେବେ ବିଜୟ ଥିଲେ ଓଡିଆ ସିନେ ଆକାଶର ଉଜ୍ଜଳ ତାରକା, ଏକ ଲମ୍ବା ମାଇଲ ଖୁଣ୍ଟ । ୧୯୫୦ ମସିହା ଏପ୍ରିଲ ୮ ତାରିଖରେ କେନ୍ଦ୍ରାପଡା ଜିଲ୍ଲାରେ ଜନ୍ମ ହୋଇଥିଲେ ବିଜୟ । ସ୍ୁଲରେ ପଢିବା ଦିନ ଠାରୁ ବିଜୟଙ୍କ କଳା ପ୍ରତି ଅହେତୁକ ରୁଚି ଥିଲା ଆଉ ସେ ସେବେଠାରୁ ଅଭିନୟ କରିଆସୁଛନ୍ତି । ତେବେ ନ୍ୟାସନାଲ ସ୍କୁଲ ଅଫ ଡ୍ରାମାରେ ସେ ବଲିଉଡ ଅଭିନେତା ଓମ୍ ପୁରୀ, ନାସିରୁଦ୍ଦିନ ସାହାଙ୍କ ସହ ପାଠ ପଢୁଥିଲେ । ଦିଲ୍ଲୀରୁ ପାଠ ପଢା ସାରି ସେ ଓଡିଶାରେ ୧୯୭୫ରେ ପାଦ ଦେଇ ନାଟକରେ ମନୋନିବେଶ କରିଥିଲେ । ଆଉ ପରେ ୧୯୭୭ରେ ଜୀବନର ପ୍ରଥମ ଥର ପାଇଁ ସିନେମା ଜଗତରେ ପାଦ ଥାପିଥିଲେ ବିଜୟ ।
୧୯୭୭ରେ ଓଡିଆ ସିନେମା ‘ନାଗଫାଶ’ରୁ କ୍ୟାରିୟର ଆରମ୍ଭ କରିଥିଲେ । ସେହି ବର୍ଷ ‘ଚିଲିକା ତୀରେ’ରେ ମଧ୍ୟ ଅଭିନୟ କରିଥିଲେ ବିଜୟ । ତେବେ ଅନେକ ଚଳଚ୍ଚିତ୍ରରେ ଖଳନାୟକ ଭୂମିକାରେ ନଜର ଆସିଥିବା ବିଜୟ ନାଗ ଫାସ, ସମୟ ବଡ ବଳବାନ, ଦଣ୍ଡା ବାଳୁଙ୍ଗା, ସହରୀ ବାଘ, ଚକା ଭଉଁରୀ ଏବଂ ଚକା ଆଖି ସବୁ ଦେଖୁଛି ଆଦିରେ ନିଜ ଅଭିନୟର ଯାଦୁ ଦେଖାଇଥିଲେ ବିଜୟ । ତେବେ ନାୟକ, ଖଳ ନାୟକ, କମେଡି, ପାଶ୍ୱର୍ ଅଭିନେତାରେ ନଜର ଆସିଛନ୍ତି ବିଜୟ । କ୍ୟାରିଅୟ ଆରମ୍ଭରୁ ୧୭୫ଟି ସିନେମାରେ ଅଭିନୟ କରିଛନ୍ତି ବିଜୟ ।
ସିନେ ଜଗତର ଅନ୍ୟ ଜଣେ ଅଭିନେତ୍ରୀ ତନ୍ଦ୍ରା ରାୟଙ୍କୁ ବିବାହ କରିଥିଲେ ବିଜୟ । ତେବେ ଜୀବନରେ କଳାକୁ ଭଲପାଇ ଆସିଥିବା ବିଜୟ ଅଭିନୟ ସହ ନାଟକ ଓ ନିର୍ଦ୍ଦେଶନାରେ ବି ସିଦ୍ଧହସ୍ତ ଥିଲେ । ୨୦୧୪ରେ ଜୟଦେବ ପୁରସ୍କାର ସହ ଅନେକ ସମ୍ମାନରେ ସମ୍ମାନୀତ ହୋଇଛନ୍ତି ସେ । ତେବେ ୨୦୧୩ରେ ମିତ ବସିଛି ମୁଁ ଭୂତ ସାଥିରେ, ଡାହା ବାଳୁଙ୍ଗା, ହାତ ଧରି ଚାଲୁଥା ଆଦି ଚଳଚ୍ଚିତ୍ରରେ ଅଭିନୟ କରି ଦର୍ଶକଙ୍କ ମନ ଜିଣିଥିଲେ ବିଜୟ ।
ଖାଲି ଅଭିନୟ ନୁହେଁ ରାଜନୀତିରେ ବି ରୁଚି ରଖିଥିଲେ ସେ । ୨୦୧୪ ଫେବୃୟାରୀ ୨୭ରେ କଂଗ୍ରେସରେ ଯୋଗଦେଇଥିଲେ ଏବଂ ଭୁବନେଶ୍ୱର ସଂସଦୀୟ କ୍ଷେତ୍ରରୁ ସାଂସଦ ଭାବେ ଲଢିଥିଲେ । ବିଜୟଙ୍କ ପରଲୋକ ହୋଇଛି ସତ ହେଲେ ଯେବେବି ଗାଁ ଗଣ୍ଡାରେ କିମ୍ବା କାନରେ ରୂପା ଶଗଡିରେ ସୁନା କନିଆ… ଗୀତ ବାଜିବ ସେଦିନ ବିଜୟ ମହାନ୍ତିଙ୍କ ମୁହଁ ମନ ଭିତରେ ଚିତ୍ର ତୋଳିବ…