କରୋନା ପାଇଁ କଳା ଉପରେ କଟକଣା, ହେଲେ ହାରିନି କଳାକାର । ଅଭିନେତା ପରି ବୃତି ବଦଳାଇଛି, ବିକଳ୍ପ ବାଛିଚି । ଜୀବନ ଜୀବୀକା ଦୋଛକିରେ ଛିଡା ହୋଇ କଳାକାର ଡେଲିଭରୀ ବୟ ସାଜିଛି । ମହାମାରୀ ମଞ୍ଚରେ ଜୀବନ ଜିଇଁବାର ନୂଆ ନାଟକ କରୁଛନ୍ତି ନଳିନୀକାନ୍ତ । କରୋନା କାଳର ବ୍ରହ୍ମପୁରରୁ ଆସିଲା ପ୍ରେରଣାଦାୟୀ କାହାଣୀ…
କନକ ବ୍ୟୁରୋ: ଶୁଣିଥିଲି ସମୟ ସବୁକିଛି ବଦଳାଇଦିଏ । ସମୟ କେତେବେଳେ କାହାକୁ କେଉଁଭଳି ସଜାଇଦିଏ ତାହା କେହି କେବେ କଳ୍ପନା କରିନଥିବେ । ନାଟକର ଅଭିନେତା ନିର୍ଦ୍ଦେଶକର କଥାରେ ନାଚିବା ପରି ସମୟର ଇସାରାରେ ନାଚେ ମଣିଷ । ଏଇ ଯେମିତି ମୁଁ… ରଙ୍ଗମଞ୍ଚ ଛାଡି, ମୁହଁର ରଙ୍ଗ ପାଉଡର ଲିଭାଇ କଳାକାରରୁ ଆଜି ସାଜିଛି ଡେଲିଭରି ବୟ । ଆଜି ମଞ୍ଚରେ ଦର୍ଶକ ନାହାନ୍ତି, ମୁଁ କିନ୍ତୁ ପହଞ୍ଚୁଛି ଦର୍ଶକଙ୍କ ପାଖରେ, କଳାକାର ନୁହେଁ ବିକ୍ରେତା ଭାବରେ । ସେ ତାଳି ଆଜି ଅଳି ପାଲଟିଛି, ସେ ଲୁହ ଆଜି ଝାଳ ହୋଇ ବହିଯାଉଛି । ପେଟ ଚାଖଣ୍ଡେ ପାଇଁ ବିଧାତା ରଚିଥିବା ଏ ବିଚିତ୍ର ନାଟକରେ ମତେ ଆଜି ଅଭିନୟ କରିବାକୁ ପଡୁଛି… କାରଣ ଜୀବନଟା ପରା ଗୋଟେ ନାଟକ…
Kanak News is now on WhatsApp
Join and get latest news updates delivered to you via WhatsApp
କରୋନା ବଦଳାଇ ଦେଲା ଜୀବନଜୀବୀକା । କାଲି ଯିଏ ମଞ୍ଚ, ମଣ୍ଡପରେ କଳାକାର ସାଜିଥିଲେ ଆଜି ସିଏ ଘର ଘର ବୁଲି ସାମଗ୍ରୀ ଯୋଗାଉଛନ୍ତି, ସେବା ଦେଉଛନ୍ତି । ଆଉ ପେଟ ପାଇଁ ଅଭିନେତାରୁ ପାଲଟିଛନ୍ତି ଅନଲାଇନ ଡେଲିଭରି ବୟ । ହଁ, ବ୍ରହ୍ମପୁରର ନଳିନୀକାନ୍ତ ଗୌଡ । ନାଟ୍ୟକାର ଭାବେ ରାଜ୍ୟର ବଡ ବଡ ମଞ୍ଚରେ ଅଭିନୟ କରିଛନ୍ତି । ନାଟକ ଲେଖିବା ସହ ନିର୍ଦ୍ଦେଶନା ମଧ୍ୟ ଦେଇଛନ୍ତି । ହେଲେ କରୋନା ପାଇଁ ନାଟକ, ରଙ୍ଗମଞ୍ଚ ଉପରେ କଟକଣା ଥିବାରୁ ଅନେକ ଅଭିନେତାଙ୍କ ପରି ନଳିନୀ ବି ହରାଇଛନ୍ତି ଜୀବୀକା । ରୋଜଗାରର ସବୁ ପନ୍ଥା ବନ୍ଦ ହୋଇଯିବା ପରେ ହାତବାନ୍ଧି ବସିଥିଲେ ନଳିନୀ । ହେଲେ ଜଣେ କଳାକାର ହୋଇଥିବାରୁ ସ୍ୱାଭିମାନକୁ ଜଳାଞ୍ଜଳୀ ଦେଇ କାହା ପାଖେ ହାତପାତି ନାହାନ୍ତି ସେ । ପରିବାର ୪ ଜଣଙ୍କୁ ପୋଷିବାକୁ ବୃତି ବଦଳାଇଛନ୍ତି, ବିକଳ୍ପ ବାଛିଛନ୍ତି…
ରଙ୍ଗମଞ୍ଚରୁ ରାସ୍ତାକୁ ଓହ୍ଲାଇ ଘର ଘର ବୁଲି ଜିନିଷ ଯୋଗାଉଛନ୍ତି ନଳିନୀ । ତେବେ ରୋଜଗାର ପାଇଁ ଚିହ୍ନା ପରିଚିତ ଓ ସମ୍ପର୍କୀୟଙ୍କ ମୋବାଇଲ ନମ୍ବର ଯୋଗାଡ କରି ପ୍ରଥମେ ହ୍ୱାଟ୍ସଆପରେ ଏକ ଗ୍ରୁପ କଲେ । ପରେ ସେମାନଙ୍କ ଆବଶ୍ୟକ ସାମଗ୍ରୀ କିଣି ସେମାନଙ୍କ ଘରେ ପହଞ୍ଚାଇବାକୁ ନିବେଦନ କଲେ । ଆଉ ଏବେ ଯିଏ ଯାହା ବରାଦ କରୁଛନ୍ତି ସବୁତକ ତାଲିକା କରି, ଲୋକଙ୍କ କହିବା ମୁତାବକ ପନିପରିବା ଓ ଗ୍ରୋସରୀ ସାମଗ୍ରୀ ଘରେ ପହଞ୍ଚାଉଛନ୍ତି । ତେବେ ବଜାର ଦର ବାଦ୍ ଘର ପିଛା ହୋମ୍ ଡେଲିଭରି ବାବଦକୁ ୧୦ ଟଙ୍କା ନେଉଛନ୍ତି ନଳିନୀ । ଯେଉଁଥିରେ ତାଙ୍କ ଛୋଟ ପରିବାର ଚଳାଉଛନ୍ତି ।
ତେବେ ଘର ଘର ବୁଲି ସେବା ଯୋଗାଉଥିବା ନଳିନୀଙ୍କ ବ୍ୟବହାର, ମିଷ୍ଟ ଭାଷା ଓ ବିଭିନ୍ନ ଅଙ୍ଗଭଙ୍ଗୀରେ କଥାବାର୍ତ୍ତା ସମସ୍ତଙ୍କୁ ଭଲଲାଗେ । ଏମିତିକି ଅର୍ଡର ଡେଲିଭରି ବେଳେ ଲୋକଙ୍କ ଭଲମନ୍ଦ ବୁଝିବା ସହ କରୋନା ସଚେତନତା କରନ୍ତି ।
ଖାଲି ଅନଲାଇନରେ ଡେଲିଭରି କରନ୍ତିନି ବରଂ ଘରେ ମାସ୍କ ସିଲେଇ କରି ବଜାରରେ ବିକ୍ରି କରନ୍ତି ଏ କଳାକାର ଜଣଙ୍କ । ତେବେ ଅନେକ ନାଟକରେ ଅଭିନୟ କରିଥିବା ନଳିନୀ, ପିଲାଙ୍କୁ ଡ୍ରାମା ଶିଖାନ୍ତି, ବ୍ରହ୍ୁପୁର ଆକାଶବାଣୀରେ କେବେ କେବେ ଉଦଘୋଷକ ଭାବେ କାମ କରନ୍ତି । ଆଉ ବହୁ ପ୍ରତିଭାର ଅଧିକାରୀ ଥିବା ଏ ଅଭିନେତା ଆଜି କରୋନା ପାଇଁ କଳାକାରରୁ ଡେଲିଭରି ବୟ ସାଜିଛନ୍ତି । ସମୟର ରଙ୍ଗମଞ୍ଚରେ ନୂଆ ଏକ ନାଟକରେ ଅଭିନୟ କରୁଛନ୍ତି…