ମାସକୁ ୧ ଟଙ୍କା ଦେଇ ପାଇପାରିବେ ୨ ଲକ୍ଷ ଟଙ୍କାର ବୀମା । ୧୮ରୁ ୭୦ ବର୍ଷ ବୟସର ସମସ୍ତ ବ୍ୟକ୍ତି କରିପାରିବେ ଆବେଦନ, ଜାଣନ୍ତୁ କଣ ରହିଛି ପ୍ରକ୍ରିୟା ଓ କେଉଁଠି ଆପଣ କରିବେ ଆବେଦନ?

କନକ ବ୍ୟୁରୋ: ସାଧାରଣ ଲୋକଟିଏ ପାଇଁ ବୀମା ବେଶ ଗୁରୁତ୍ୱପୂର୍ଣ୍ଣ । କେତେବେଳେ ଯେ କଣ ଘଟିବ ତାହା କିଏ ବା କହିପାରିବ । ତେଣୁ ପରିବାର ଓ ନିଜ ଭବିଷ୍ୟତର ସୁରକ୍ଷା ପାଇଁ ଅଧିକାଂଶ ଲୋକେ ବୀମା କରିଥାନ୍ତି । କିନ୍ତୁ ଏମିତି ଅନେକ ଲୋକ ଅଛନ୍ତି ଯେଉଁମାନେ ଟଙ୍କା ନଥିବା କାରଣରୁ ବୀମା କରିପାରିନଥାନ୍ତି । ତେବେ ସବୁ ବର୍ଗର ଲୋକଙ୍କ ପାଖରେ ବୀମା ସୁବିଧା ପହଞ୍ଚାଇବାକୁ ମୋଦି ସରକାର ଅନେକ ଗୁଡିଏ ବୀମା ଯୋଜନା ଆଣିଛନ୍ତି । ଯେଉଁଥିରୁ ପ୍ରଧାନମନ୍ତ୍ରୀ ସୁରକ୍ଷା ବୀମା ଯୋଜନା ଅନ୍ୟତମ । ଏହି ଯୋଜନା ଜରିଆରେ ମାସକୁ ମାତ୍ର ୧ ଟଙ୍କା ହିସାବରେ ବର୍ଷକୁ ୧୨ ଟଙ୍କା ଦେଇ ୨ ଲକ୍ଷ ଟଙ୍କାର ବୀମା ରାଶିର ଲାଭ ପାଇପାରିବେ  ।

ପ୍ରଧାନମନ୍ତ୍ରୀ ସୁରକ୍ଷା ବୀମା ଯୋଜନା ଅନୁଯାୟୀ, ଦୁର୍ଘଟଣାରେ ମୃତ୍ୟୁ କିମ୍ବା ଦିବ୍ୟାଙ୍ଗ  ହୋଇଗଲେ ଏହି ବୀମା ରାଶି ମିଳିବ । ଯଦି ଦୁର୍ଘଟଣାରେ ବୀମା ଧାରକଙ୍କର ମୃତ୍ୟୁ ହୋଇଯାଏ ତେବେ  ନୋମିନିକୁ ୨ ଲକ୍ଷ, ସମ୍ପୂର୍ଣ୍ଣ ରୂପେ ଦିବ୍ୟାଙ୍ଗ ହୋଇଗଲେ ଯେପରିକି  ଦୁଇ ଆଖି, ଦୁଇ ହାତ ଓ ଦୁଇ ଗୋଡ ହରାଇଥିଲେ ବୀମା ରାଶି ବାବଦକୁ ୨ ଲକ୍ଷ ଟଙ୍କା ମିଳିବ । ସେହିପରି ଦୁର୍ଘଟଣାରେ ଆଂଶିକ ରୂପେ କ୍ଷତିଗ୍ରସ୍ତ ବା ଦିବ୍ୟାଙ୍ଗ ହୋଇଗଲେ ଯେପରିକି  ଦୃଷ୍ଟି ଶକ୍ତି ହରାଇଲେ, ଗୋଟିଏ  ହାତ ଓ ଗୋଡ କାମ ନକରିଲେ ୧ ଲକ୍ଷ ଟଙ୍କାର ବୀମା ରାଶି ପାଇପାରିବେ ଖାତାଧାରକ ।

୧୮ରୁ ୭୦ ବର୍ଷ ବୟସର ଲୋକ ଏହି ଯୋଜନାର ଲାଭ ଉଠାଇପାରିବେ । ତେବେ ଏଥିପାଇଁ ବ୍ୟାଙ୍କରେ ଆକାଉଣ୍ଟ ନିହାତି ରହିବା ଆବଶ୍ୟକ । ଯେଉଁ ଆକାଉଣ୍ଟରୁ ବର୍ଷକୁ ବର୍ଷକୁ ବୀମା ପ୍ରିମିୟମ ବାବଦକୁ ଟଙ୍କା କାଟି ନିଆଯିବ । ମେ’ ୩୧ ସୁଦ୍ଧା ପଲିସି ବାବଦକୁ ଖାତାଧାରକଙ୍କ ଆକାଉଣ୍ଟରୁ ଟଙ୍କା କାଟି ଦିଆଯାଇଥାଏ । ଯଦି ମେ ମାସ ଶେଷ ସୁଦ୍ଧା ଆକାଉଣ୍ଟରେ ପର୍ଯ୍ୟାପ୍ତ ଟଙ୍କା ନଥାଏ ତେବେ ଏହି ପଲିସିକୁ ରଦ୍ଦ କରି ଦିଆଯାଇଥାଏ । ସେହିଭଳି ବ୍ୟାଙ୍କ ଆକାଉଣ୍ଟ ବନ୍ଦ ହୋଇଗଲେ ଖାତାଧାରକଙ୍କ ପଲିସି କ୍ୟାନସଲ କରି ଦିଆଯାଏ । ଏକାଧିକ ଆକାଉଣ୍ଟ ଥିଲେ ମଧ୍ୟ କେବଳ ଗୋଟିଏ ଆକାଉଣ୍ଟରେ ଏହି ଯୋଜନାର ଲାଭ ଉଠାଇପାରିବେ ଖାତାଧାରକ ।