ବିଚିତ୍ର ବିଧିର ବିଧାନ! ସାପ କାମୁଡ଼ାରେ ଚାଲିଯାଇଥିଲେ ବାପା, ଏବେ ଦୁଇ ଭଉଣୀଙ୍କୁ କରେଣ୍ଟ କରିଦେଲା ମା’ ଛେଉଁଣ୍ଡ, ମେରୁଦଣ୍ଡ ଭାଙ୍ଗିଗଲା କେମିତି ଚଳିବ ପରିବାର?
କନକ ବ୍ୟୁରୋ: ବର୍ବର, ହୃଦୟବିଦାରକ ଆଉ ଏତେ ଅକଥନୀୟ ବିଧିର ବିଧାନ ତାହା କେହି କେବେ କଳ୍ପନାରେ ବି ଭାବିନଥିଲେ । ହସଖୁସିରେ ନିର୍ବନ୍ଧ ପାଇଁ ଗୋଟିଏ ବସରେ ଯାଉଥିଲେ ଅନେକ ପରିବାର ହେଲେ ବ୍ରହ୍ମପୁର ମେନ୍ଦ୍ରାଜପୁରଠାରେ ଜଗି ରହିଥିଲା ୧୧ କେ.ଭିର ମୃତ୍ୟୁର ତାର । କେହି କିଛି ବୁଝିବା ପୂର୍ବରୁ ପୂରା ବିଦ୍ୟୁତ୍ ବାହୁରେ ଆସିଗଲା ଚଳନ୍ତା ବସ୍ ଆଉ ଉଡ଼ିଗଲା ଅନେକ ପରିବାରର ପ୍ରାଣବାୟୁ । ତେବେ ଏହି ବସରେ ଏମିତି ଜଣେ ମହିଳା ଯାତ୍ରୀଙ୍କର ମୃତ୍ୟୁ ହୋଇଛି ଯାହାଙ୍କ ଉପରେ ପରିବାରର ୩କୁଟୁମ୍ବ ନିର୍ଭର କରନ୍ତି । ଏବେ ତାଙ୍କୁ ହରାଇ ପୂରାପରିବାର ଦୁଃଖ ଦାଉରେ ଭାଙ୍ଗି ପଡ଼ିଛି ।
Kanak News is now on WhatsApp
Join and get latest news updates delivered to you via WhatsApp
ଆମେ କହୁଛୁ, ବସ୍ ଦୁର୍ଘଟଣାରେ ପ୍ରାଣ ହରାଇଥିବା ଚିକିଟି ଡଙ୍କଲପାଡୁ ଗାଁର ବି.ଏରାମାଙ୍କ କଥା, ଦୀର୍ଘ ୧୦ ବର୍ଷ ତଳେ ସାପ କାମୁଡ଼ାରେ ସ୍ୱାମୀଙ୍କ ମୃତ୍ୟୁ ହୋଇଥିଲା । ଘରର ଛାତ ଚାଲିଗଲା ଭଳି ସ୍ୱାମୀଙ୍କୁ ହରାଇ ଦୁଇ ଝିଅଙ୍କ ସହ ବୁଢ଼ି ମାର ଦାୟିତ୍ୱ ନିଜ କାନ୍ଧକୁ ନେଇଥିଲେ ବି.ଏରାମା । ହେଲେ ଗତକାଲିର ବର୍ବର ବସ୍ ଦୁର୍ଘଟଣାରେ ତାଙ୍କର ମୃତ୍ୟୁ ହୋଇଛି । ବିଧିର ବିଧାନ ଏମିତି ଲେଖାଥିଲା ପ୍ରଥମେ ବାପା ଛେଉଁଣ୍ଡ ଏବେ ମା ଛେଉଁଣ୍ଡ ହୋଇଯାଇଛନ୍ତି ଦୁଇ ଭଉଣୀ । ଆର୍ଥିକ ସ୍ଥିତି ଶୋଚନୀୟ ହୋଇଥିଲେ ମଧ୍ୟ ପରପାରିକୁ ସ୍ୱାମୀ ଗଲାପରେ ବଡ଼ ଝିଅକୁ ଦଶମ ଓ ସାନ ଝିଅକୁ ଅଷ୍ଟମରେ ପାଠ ପଢ଼ାଉଥିଲେ, ଆଉ ସେହି ଶେଷ ଆଶା ଭରସାକୁ ବିଧାତା ଛଡ଼ାଇ ନେଇଛି । ଏବେ ଆମେ କ’ଣ କରିବୁ କେମିତି ଚଳିବୁ କହି ବାହୁନି କାନ୍ଦୁଛନ୍ତି ଦୁଇ ଭଉଣୀ ।
ସେପଟେ ବୋଝ ଉପରେ ନଳିତା ବିଡ଼ାପରି ବୁଢ଼ି ମା’କୁ ଆଦରି ବସିଛନ୍ତି ଦୁଇ ଭଉଣୀ । ହେଲେ ଯେଉଁ ବୟସରେ ପୁଅ-ବୋହୁଙ୍କ ଠାରୁ ସେବା ପାଇଁ ଶାନ୍ତି ଚାହୁଁଥିଲେ ଏବେ ନାତୁଣୀ ଦୁହିଁଙ୍କୁ ପରିଣତ ବୟସରେ କେମିତି ପାଳିବେ ତାହା ତାଙ୍କୁ ବଡ଼ ଦୁଃଖ ଆଣିଦେଇଛି । ପୁଅ ପରେ ନିଜ ବୋହୁକୁ ହରାଇ ଡହଳ ବିକଳ ହେଉଛନ୍ତି ଡଙ୍କଲପାଡୁର ଏହି ପରିବାର । ତେବେ ସ୍ଥାନୀୟ ସମାସେବୀ ସ୍ୱର ଉଠାଇ ଏହି ଅସହାୟ ପରିବାରକୁ ସରକାର ସହାୟତା କରନ୍ତୁ ବୋଲି ଅନୁରୋଧ କରିଛନ୍ତି ।