ସୁରକ୍ଷାକର୍ମୀଙ୍କ ମାନବିକତା ! ବାଉଁଶ ଭାର କରି ରୋଗୀକୁ ବୋହିଲେ ୭ କିଲୋମିଟର
ଗୁଳିଗୋଳାର ଅଂଚଳ ଛତିଶଗଡ଼ । ଯାହାର ନାଁ ଶୁଣିଲେ ମନ ଭିତରେ ଚାଲିଆସେ ମାଓବାଦୀ ଏବଂ ସିଆରପିଏଫ୍ ଯବାନଙ୍କ ମଧ୍ୟରେ ଚାଲିଥିବା ମୁହାଁମୁହିଁ ପରିସ୍ଥିତି । ତେବେ ଏହି ଯବାନମାନେ ନା କେବଳ ମାଓଦମନ ପାଇଁ କାମ କରନ୍ତି ତାହା ନୁହେଁ ବରଂ ଗରିବ ଆଦିବାସୀମାନଙ୍କ ସୁଖଦୁଃଖର ସାଥୀ ମଧ୍ୟ ହୋଇଥାନ୍ତି ଆଉ ଯାହାର ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି ଦାନ୍ତେୱାଡା ଅଂଚଳରେ ।
Kanak News is now on WhatsApp
Join and get latest news updates delivered to you via WhatsApp
ଜାତୀୟ ଗଣମାଧ୍ୟମ ଏବିପିରେ ପ୍ରକାଶିତ ଖବର ମୁତାବକ, ଦାନ୍ତେୱାଡା ଜିଲ୍ଲାର କଟକଲ୍ୟାଣ ଥାନା ଅନ୍ତର୍ଗତ ବୁଡେନ ନାମକ ଜଙ୍ଗଲକୁ ନିକଟରେ ଶତାଧିକ ସିଆରପିଏଫ୍ ବାଟାଲିୟନ କମ୍ବିଂ କରିବାକୁ ଯାଇଥିଲେ । ତେବେ ମାଓପ୍ରବଣ ଏବଂ ନଦୀ ପାହଡରେ ପରିପୂର୍ଣ୍ଣ ଏହି ଅଂଚଳରେ ମାଓ ଶିବିର ଥିବା ନେଇ ଖବର ପାଇବା ପରେ ଯବାନମାନେ ସର୍ଚ୍ଚ ଅପରେସନ କରିଥିଲେ । ହେଲେ ଯବାନଙ୍କ ଆସିବା ଖବର ପାଇ ସେଠାରେ ଥିବା ମାଓବାଦୀମାନେ ଛତ୍ରଭଙ୍ଗ ଦେଇଥିଲେ । ପରେ ଯବାନମାନେ ସର୍ଚ୍ଚ ଅପରେସନ ସାରି ଫେରିଥିବା ସମୟରେ ଜଙ୍ଗଲ ମଧ୍ୟରେ ଥିବା ଏକ ଛୋଟ ଗାଁରେ ପହଂଚିଥିଲେ । ଆଉ ସେମାନଙ୍କ ଆଖି ପଡିଥିଲା ଗାଁଠାରୁ ଖଣ୍ଡିଏ ଦୂରରେ ଥିବା ଏକ ପାଲଟଣା ଘର ଉପରେ ।
ସନ୍ଦେହରେ ଯବାନମାନେ ସେହି ଘର ଭିରକୁ ଯାଇଥିଲେ ଆଉ ସେଠାରେ ସେମାନେ ଜଣେ ରୋଗୀଣା ମହିଳାଙ୍କୁ ଯନ୍ତ୍ରଣାରେ ଛଟପଟ ହେଉଥିବାର ଦେଖିଥିଲେ । ତେବେ ମହିଳା ଜଣକ ସେଠାରେ ପାଖାପାଖି ୧୦ ଦିନ ହେଲା ରୋଗରେ ସେଭଳି ଛଟପଟ ହେଉଥିବା ଜାଣିବାକୁ ପାଇଥିଲେ ପୀଡିତ ଥିଲେ ହେଲେ ଏଭଳି ଦୁର୍ଗମ ଅଂଚଳରେ ନା ଥିଲା ସେଭଳି କୌଣସି ଯିବାଆସିବାର ବ୍ୟବସ୍ଥା ନା ଡାକ୍ତରଖାନା । ଅନ୍ୟପଟେ ବର୍ଷା କାରଣରୁ ଗାଁ ନିକଟରେ ଥିବା ନଦୀଟି ଭାରପାଣିରେ ରହିଥିଲା । ଯାହାଦ୍ୱାରା କି ମହିଳା ଜଣଙ୍କ ନଦୀ ପାର ହୋଇ ଚିକିତ୍ସାଳୟ ଯିବାକୁ ସାହସ ଜୁଟାଇ ପାରିନଥିଲେ ।
ମାତ୍ର ଏଭଳି ପରିସ୍ଥତିରେ ଦେବଦୂତ ସାଜିଥିଲେ ଏହି ଯବାନମାନେ । ଏକ ବାଉଁଶର ଭାର କରି ଯବାନମାନେ ସଂପୃକ୍ତା ମହିଳାଙ୍କୁ କାନ୍ଧରେ ବୋହି ପାଖାପାଖି ୭ କିଲୋମିଟର ପାଣିକାଦୁଅ ରାସ୍ତା ଅତିକ୍ରମ କରି ନିକଟସ୍ଥ କଟକଲ୍ୟାଣକୁ ଆଣି ୧୦୮ ଆମ୍ବୁଲାନ୍ସ ସହାୟତାରେ ଡାକ୍ତରଖାନାକୁ ପଠାଇଥିଲେ ଆଉ ସୁରକ୍ଷାକର୍ମୀଙ୍କ ଏହି ମାନବିକତା କାରଣରୁ ମହିଳା ଜଣଙ୍କ ଜୀବନ ବଂଚିଯାଇଥିଲା । ତେବେ ଯବାନମାନଙ୍କର ଏଭଳି କାର୍ଯ୍ୟକୁ ବିଭିନ୍ନ ମହଲରୁ ପ୍ରଶଂସା ମଧ୍ୟ କରାଯାଇଛି ।
ଏଠାରେ ଆମେ କହିରଖୁଛୁ କି, ମାଲକାନଗିରି ଏବଂ ଛତିଶଗଡ଼ ସୀମାରେ ପାଖାପାଖି ୩୦ ବାୟାଲିୟନ ସିଆରପିଏଫ୍ ଓ ବିଏସଏଫ ଯବାନ ମୁତୟନ ହୋଇଛନ୍ତି ଏବଂ ମାଓବାଦୀଙ୍କ ଦମନ କରିବା ହେଉଛି ଏମାନଙ୍କ ମୁଖ୍ୟ କାମ ।