ନୀଳ ତିମି ପରେ ଏବେ ଗରମ ପାଣି ! ସୋସିଆଲ ମିଡିଆରେ ଜୀବନ ନେଲା ‘ହଟ୍ ୱାଟର ଚ୍ୟାଲେଂଜ’
‘ବ୍ଲୁ ହ୍ୱେଲ୍’ ଭଳି ଘାତକ ଖେଳର ଭୟ ଅଭିଭାବକଙ୍କ ମନରୁ ନ ଲିଭୁଣୁ, ଇଂଟରନେଟ୍ ଏବେ ପୁଣି ଏକ ଘାତକ ଖେଳ ଧରି ହାଜର ହୋଇଯାଇଛି । ଯାହାର ନାଁ ‘ହଟ୍ ୱାଟର ଚ୍ୟାଲେଂଜ’ । ଯଦିଓ ହଟ୍ ୱାଟର ଚ୍ୟାଲେଂଜକୁ ନେଇ ଅଧିକ କୌଣସି ସୂଚନା ମିଳିପାରିନାହିଁ ତେବେ ଏହି ଖେଳର ମୁଖ୍ୟ ଟ୍ୟାକ୍ସ ରହିଛି ନିଜ ବନ୍ଧୁ କିମ୍ବା ସହଯୋଗୀଙ୍କ ଉପରକୁ ଫୁଟନ୍ତା ପାଣି ଫିଙ୍ଗିବା କିମ୍ବା ଗରମ ପାଣି ପିଇବାକୁ ବାଧ୍ୟ କରିବା ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଆମେରିକାରୁ ଆରମ୍ଭ ହୋଇଥିବା ଏହି ଘାତକ ଖେଳରେ ଏପର୍ଯ୍ୟନ୍ତ ଅନେକ ଶିଶୁ ଗୁରୁତର ଭାବେ ଆହତ ହୋଇସାରିଲେଣି । ଏପରିକି ଏହି ଖେଳ କାରଣରୁ ଜଣେ ୮ ବର୍ଷର ଶିଶୁର ମୃତ୍ୟୁ ମଧ୍ୟ ହୋଇଛି । ମିଳିଥିବା ସୂଚନାରୁ ଯାହା ଅନୁମାନ କରାଯାଉଛି ଏହି ଘାତକ ଖେଳରେ ପ୍ରାୟ ୮ବର୍ଷରୁ ୧୫ ବର୍ଷର ପିଲା ସାମିଲ ଅଛନ୍ତି । ଏହି ଖେଳରେ ପିଲାଙ୍କୁ ନିଜ ବନ୍ଧୁ ବା ସହଯୋଗୀ ଉପରେ ଫୁଟନ୍ତା ପାଣି ଫିଙ୍ଗିବାକୁ ଉସକା ଯାଇଥାଏ । ନଚେତ୍ ତାକୁ ବିନା କେଉଁଠି ଅଟକି ଫୁଟନ୍ତା ପାଣି ପିଇବାକୁ ବାଧ୍ୟ କରାଯାଇଥାଏ ।
ଆମେରିକାରର ଏକ ବ୍ୟସ୍ତବହୁଳ ସହରରେ ଜଣେ ୧୫ ବର୍ଷର ବାଳକ ଏକ ଘର ଭିତରେ ଶୋଇଥିବା ସମୟରେ ତଥା ରାତି ପାଖାପାଖି ୩ଟା ବେଳେ ତା ଉପରେ ଗରମ ପାଣି ଢାଳି ଦେଇଥିଲେ । ଫଳରେ ବାଳକଟିର ମୁହଁ ଗଭୀର ଭାବେ ଜଳି ଯାଇଥିଲା ଏବଂ ଚମଡା ମଧ୍ୟ ଉତୁରି ଯାଇଥିଲା । ବାଳକଟିକୁ ଉଦ୍ଧାର କରାଯାଇ ଡାକ୍ତରଖାନାରେ ଭର୍ତ୍ତି କରାଯାଇଥିଲା ।
ସେହିପରି ଫ୍ଲୋରିଡାରେ ଏକ ୮ବର୍ଷର ଶିଶୁ ନିଜ ସାଥୀଙ୍କ କଥାରେ ପଡି ଫୁଟନ୍ତା ପାଣି ପିଇ ଦେଇଥିଲା । ଯାହାଦ୍ୱାରା ଶିଶୁଟିର ମୃତ୍ୟୁ ଘଟିଥିଲା । ଶିଶୁଟିର ପରିବାର ଲୋକଙ୍କ କହିବା କଥା ହେଲା, ଗରମ ପାଣି ପିଇବା କାରଣରୁ ଶିଶୁଟିର ଗଳା ଗୁରୁତର ଭାବେ ଜଳିଯାଇଥିଲା । ଯେଉଁଦିନ ଶିଶୁଟିର ମୃତ୍ୟୁ ହୋଇଥିଲା ସେ ଦିନ ତାର ନିଶ୍ୱାସପ୍ରଶ୍ୱାସ ନେବାରେ କଷ୍ଟ ଅନୁଭବ କରୁଥିଲା ।
ଏହା ପୂର୍ବରୁ ନ୍ୟୁୟର୍କରେ ବି ଅନୁରୂପ ଘଟଣା ଘଟିଥିଲା । ଯେଉଁଠାରେ ଜଣେ ୧୧ ବର୍ଷୀୟ ପିଲା ଉପରେ ତାର କିଛି ସାଥୀ ଗରମ ପାଣି ଫିଙ୍ଗି ଦେଇଥିଲେ । ଯାହାଦ୍ୱାରା ପିଲାଟିର ସଂପୂର୍ଣ୍ଣ ମୁହଁ ସହ ଶରୀରର ପାଖାପାଖି ୩୦ ପ୍ରତିଶତ ଭାଗ ଜଳି ଯାଇଥିଲା । ତେବେ ଏହି ମାମଲାରେ ପୁଲିସ୍ ଜଣେ ୧୨ ବର୍ଷର ବାଳିକାକୁ ଗିରଫ କରିଥିଲା ।
ତେବେ ଖୁନୀ ଖେଳ ‘ବ୍ଲୁ ହ୍ୱେଲ ଚ୍ୟାଲେଂଜ’ ଯେଭଳି ଋଷରୁ ଆରମ୍ଭ ହୋଇ ଓଡିଶା ପର୍ଯ୍ୟନ୍ତ କାୟା ବିସ୍ତାର କରିପାରେ ସଫଳ ହୋଇପାରିଛି । ସେହିପରି ଆମେରିକାରେ ଆରମ୍ଭ ହୋଇଥିବା ‘ହଟ୍ ୱାଟର୍ ଚ୍ୟାଲେଂଜ’ ନାମକ ଏହି ଘାତକ ଖେଳ ଆଉ ଯେମିତି କୌଣସି ନିରୀହ ଶିଶୁର ଜୀବନ ନନିଏ ।
ବ୍ଲୁ ହ୍ୱେଲ୍ ଗେମ୍ କଣ
ଏହି ବ୍ଲୁ-ହ୍ୱେଲ ଗେମ୍ ଲୋକଙ୍କୁ ଆତ୍ମହତ୍ୟା କରିବାକୁ ଚ୍ୟାଲେଞ୍ଜ କରିଥାଏ । ଏବଂ ଯିଏ ଏହି ଚ୍ୟାଲେଞ୍ଜ ଗ୍ରହଣ କରେ ସେ ଆତ୍ମହତ୍ୟା କରିଦିଏ । ଋଷିଆରୁ ଆରମ୍ଭ ହୋଇଥିବା ଏହି ଖେଳରେ ପ୍ରାୟ ୧୨ରୁ ୧୫ ବର୍ଷ ବୟସର ପିଲା ମାନେ ସାମିଲ୍ ଥାନ୍ତି । ଖେଳଟି କେବଳ ସୋସିଆଲ୍ ମିଡିଆରେ ଖେଳାଯାଏ । ଯାହାକୁ ନିୟନ୍ତ୍ରିତ କରିଥାଏ ଜଣେ ମାଷ୍ଟର୍ ବା ହ୍ୱାସସଆପ୍ ଗ୍ରୁପ୍ ଆଡମିନ୍ । ଏହି ମାଷ୍ଟରର ପରାମର୍ଶ ମାନିବାକୁ ଏକପ୍ରକାର ବାଧ୍ୟ ଖେଳାଳୀ । ମାଷ୍ଟର୍ ଯେଉଁ ଟ୍ୟାସ୍କ ଦେଇଥାଏ ତାକୁ ୫୦ ଦିନ ମଧ୍ୟରେ ଶେଷ କରିବାକୁ ପଡିଥାଏ । ଏହି ଖେଳ ମାନଙ୍କ ମଧ୍ୟରେ ଥାଏ ଭୂତ ସିନେମା ଦେଖିବା, ରାତି ରାତି ଅନିଦ୍ରା ରହିବା ଏବଂ ନିଜ ହାତକୁ କାଟି ବ୍ଲୁ ହ୍ୱେଲ୍ ଲେଖିବା । ଖେଳାଳୀ ଠିକ୍ ଭାବରେ ଏହାକୁ ମାନୁଛି ଏବଂ ଖେଳୁଛି କି ନାହିଁ ସେଥିପାଇଁ ଏକ ଫଟୋ ଉଠାଇ ସେୟାର୍ କରିବାକୁ ପଡିଥାଏ । ତେବେ ଏପରି ଭାବରେ ଆରମ୍ଭ ହୋଇଥିବା ଖେଳ ଧୀରେ ଧୀରେ କଠିନରୁ କଠିନତର ହୋଇଥାଏ । ଶେଷରେ ଖେଳ ଉକ୍ତ ଖେଳାଳୀର ମୃତ୍ୟୁରେ ଶେଷ ହୋଇଥାଏ । ତେବେ ଏହି ଖେଳରୁ ପିଲାମାନଙ୍କୁ ରକ୍ଷା କରିବା ପାଇଁ ପୁଲିସ୍ ସ୍କୁଲ୍ କର୍ତ୍ତୃପକ୍ଷ ଏବଂ ପିଲାଙ୍କ ବାପା ମାଙ୍କୁ ସେମାନଙ୍କ ଉପରେ ନଜର ରଖିବାକୁ ପରାମର୍ଶ ଦେଇଛି ।
କିଏ ଏବଂ କେମିତି ଆରମ୍ଭ ହୋଇଥିଲା ବ୍ଲୁ ହ୍ୱେଲ୍
ଅନଲାଇନରେ ଗେମ୍ ଖେଳି ଲୋକଙ୍କୁ ଆତ୍ମହତ୍ୟା ପାଇଁ ପ୍ରବର୍ତ୍ତାଉ ଥିଲେ ଜଣେ ଋଷୀୟ ଯୁବକ । ବିକୃତ ମାନସିକତା ହେଉ ଅବା ଅପରାଧିକ ଚିନ୍ତାଧାରା । ଋଷର ୨୨ ବର୍ଷିୟ ଯୁବକ ଫିଲିପ ବୁଡେଇକି ତିଆରି କରିଥଲା ମୃତ୍ୟୁର ଖେଳ ବ୍ଲୁ ହ୍ୱେଲ । ଇଂଟରନେଟ ଜରିଆରେ ସେ ବିଶ୍ୱର କୋଣ ଅନୁକୋଣରେ ଥିବା ଯୁବକ ଯୁବତୀଙ୍କୁ ଯୋଗାଯୋଗ କରୁଥିଲା । ତାପରେ ସ୍କାଏପି,ଭିଡିଓ ଚାଟ ଓ ସୋସିଆଲ ମିଡିଆ ଜରିଆରେ ଆରମ୍ଭ ହେଉଥିଲା କଥାବାର୍ତ୍ତା । ଆଉ ଅଜବ ଗଜବ କାରନାମା କରି ଅନଲାଇନରେ ଗେମ୍ ଖେଳିବାର ଅଫର୍ ଦେଉଥିଲା । ସାଧାରଣତଃ ଦୁର୍ବଳ ମାନସିକତା ଥିବା ଯୁବକ ଯୁବତୀଙ୍କୁ ଟାର୍ଗେଟ୍ କରୁଥିଲା ଫିଲିପ ।
ଯୁବକ ଯୁବତୀଙ୍କ ବ୍ରେନୱାସ୍ କରି ତାଙ୍କ ମାନସିକତାକୁ ପ୍ରଭାବିତ କରିବାରେ ମାହିର ଥିଲା ଫିଲିପ୍ । ଆଉ ନିଜର ବିକୃତ ଚିନ୍ତାଧାରା ଦ୍ୱାରା ଅନଲାଇନ ଗେମ୍ ଜରିଆରେ ରଚୁଥିଲା ମୃତ୍ୟୁର ଷଡଯନ୍ତ୍ର । ସବୁଠାରୁ ଆଶ୍ଚର୍ଯ୍ୟର କଥା ହେଲା ଏଥିପାଇଁ ଅର୍ଥ ପ୍ରଲୋଭନ ଦେଖାଉ ନଥିଲା ଫିଲିପ । ବରଂ ଯୁବକ ଯୁବତୀଙ୍କ ବ୍ରେନ ୱାସ କରି ସେମାନଙ୍କୁ ଜୀବନର କିଛି ନିଆରା ଅନୁଭୂତି ତିଆରି କରିବାକୁ ପ୍ରବର୍ତ୍ତାଯାଉଥିଲା ।
ଜାଣି ଆଶ୍ଚର୍ଯ୍ୟ ହେବେ କେବଳ ବ୍ଲୁ ହ୍ୱେଲ୍ ନୁହେଁ ଗତ ୫ ବର୍ଷ ମଧ୍ୟରେ ୨୩୦୦୦ ଅଧିକ ୱେବସାଇଟ୍ ଚିହ୍ନଟ ହୋଇଛି ଯାହା ପିଲାମାନଙ୍କୁ ଆତ୍ମହତ୍ୟା ପ୍ରବଣ କରାଉଛି । ଏଭଳି ଏକ ଚାଂଚଲ୍ୟକର ତଥ୍ୟ ଦେଇଛି ଋଷର ଉପଭୋକ୍ତା ସୁରକ୍ଷା ୱାଚଡଗ୍ ରୋସ୍ପୋତ୍ରେବନାଦଜୋର ।
ସୌଜନ୍ୟ: ଅମର ଉଜାଲା