କନକ ବ୍ୟୁରୋ: ପ୍ରାୟ ଦୁଇ ବର୍ଷ ହେଲା କରୋନା ମହାମାରୀ ପ୍ରଭାବରେ ଦହଗଞ୍ଜ ହେଉଛନ୍ତି ବିଶ୍ୱବାସୀ । ଲକଡାଉନ୍, ଆଇସୋଲେସନ ଆଉ ସଂକ୍ରମଣ ଭିତରେ ଲୋକଙ୍କ ପ୍ରତିଟି ସମୟ ବିତୁଥିବାବେଳେ ଏବେ ନୂଆ ଭାରିଆଣ୍ଟ ସମସ୍ତଙ୍କ ଚିନ୍ତାକୁ ଆହୁରି ବଢାଇ ଦେଇଛି । କରୋନା ଭାଇରସର ନୂଆ ଭାରିଆଣ୍ଟ ଓମିକ୍ରନ୍ ଏବେ ଚାରିଆଡେ ବ୍ୟାପୁଥିବାବେଳେ ଏହାକୁ ନେଇ ଏବେ ସମସ୍ତେ ଚିନ୍ତିତ । ଦକ୍ଷିଣ ଆଫ୍ରିକାରୁ ସୃଷ୍ଟି ହୋଇଥିବା ଏହି ନୂଆ ଭୂତାଣୁ ଏବେ ବିଶ୍ୱର ଅନ୍ୟ ଦେଶକୁ ମଧ୍ୟ ବ୍ୟାପିବାରେ ଲାଗିଛି ।
Kanak News is now on WhatsApp
Join and get latest news updates delivered to you via WhatsApp
ଆପଣ ଜାଣି ଆଶ୍ଚର୍ଯ୍ୟ ହେବେ, ଦକ୍ଷିଣ ଆଫ୍ରିକାର ଏମିତି ଏକ ସ୍ଥାନ ରହିଛି, ଯେଉଁଠିକାର ୯୦ ପ୍ରତିଶତ କରୋନା ରୋଗୀ ଏବେ ନୂଆ ଭାରିଆଣ୍ଟ ଦ୍ୱାରା ସଂକ୍ରମିତ ବୋଲି ଜଣାପଡିଛି । ଦକ୍ଷିଣ ଆଫ୍ରିକାର ନବମ ପ୍ରୋଭିନ୍ସ ଭାବେ ଜଣାଶୁଣା ଗୋତଙ୍ଗେ ହେଉଛି ସେହି ସ୍ଥାନ ଯେଉଁଠି ଅଧିକାଂଶ କରୋନା ରୋଗୀ ଏହି ନୂଆ ଭାଇରସ୍ ଦ୍ୱାରା ସଂକ୍ରମିତ ହୋଇଥିବା ଜଣାପଡିଛି । ସଂକ୍ରମଣ ଏତେ ଦ୍ରୁତ ଗତିରେ ବ୍ୟାପିଛି ଯେ, ସେଠାରେ ଲକଡାଉନ୍ ଲଗାଇବା ଭଳି ସ୍ଥିତି ଉପୁଜିଗଲାଣି । ବିଶ୍ୱବିଦ୍ୟାଳୟ ଓ କଲେଜକୁ ସେଠାରେ ବନ୍ଦ କରି ଦିଆଯାଇଥିବାବେଳେ, ପରୀକ୍ଷାକୁ ମଧ୍ୟ ବାତିଲ କରି ଦିଆଯାଇଛି । ସେଠାରେ ସମସ୍ତ ଲୋକଙ୍କୁ ଏବେ ଟେଷ୍ଟ କରାଯାଉଥିବାବେଳେ, ସେଠାରୁ ବିଶ୍ୱର ଅନ୍ୟ ଦେଶକୁ ବିମାନ ଉଡାଣ ମଧ୍ୟ ବାତିଲ କରିଦିଆଯାଇଛି ।
ସୂଚନାଯୋଗ୍ୟ ଯେ, ଦକ୍ଷିଣ ଆଫ୍ରିକାରେ ଯୁବବର୍ଗଙ୍କ ଟିକାକରଣ ନିରାଶାଜନକ ରହିଛି । ୧୮ ବର୍ଷରୁ ୩୪ ବର୍ଷ ବୟସ୍କ ଲୋକଙ୍କର କେବଳ ୨୨ ପ୍ରତିଶତ ଟିକାକରଣ ଶେଷ ହୋଇଥିବାବେଳେ ଅନେକ ଲୋକ ଏବେ ବି ଟିକା ନେଇନାହାଁନ୍ତି । ସେଠାକାର ଜଣେ ଯୁବକଙ୍କ କହିବା ଅନୁସାରେ, ତାଙ୍କ ସାଙ୍ଗଙ୍କ ଭିତରୁ ଏବେ ବି ଅନେକ ସାଙ୍ଗ ଏବେ ବି ଟିକା ନେଇନାହାଁନ୍ତି । ଏବେ ପ୍ରତିଦିନ ଅନେକ ଲୋକ କରୋନାରେ ସଂକ୍ରମିତ ହେଉଥିବା ମଧ୍ୟ ସେ ସୂଚନା ଦେଇଛନ୍ତି । ଅନ୍ୟପଟେ ବିଶ୍ୱ ସ୍ୱାସ୍ଥ୍ୟ ସଙ୍ଗଠନର କହିବା ମୁତାବକ, ନୂଆ ଭାରିଆଣ୍ଟକୁ ନେଇ ଏବେ କିଛି ବି ସ୍ପଷ୍ଟ ହୋଇନି । ଏହା ଅଧିକ ଲୋକଙ୍କୁ ସଂକ୍ରମିତ କରୁଛି କି ନାହିଁ ତା ମଧ୍ୟ ପ୍ରମାଣିତ ହୋଇନି । ତା ସହିତ ଓମିକ୍ରନ ଭାରିଆଣ୍ଟ ବିପକ୍ଷରେ ଟିକା କେତେଦୂର ପ୍ରଭାବିତ ହେବ ତା ମଧ୍ୟ ହୁ ପକ୍ଷରୁ କୌଣସି ସ୍ପଷ୍ଟୀକରଣ ରଖାଯାଇନି । ଏପରି ସ୍ଥଳେ ଲୋକଙ୍କୁ କେବଳ ସତର୍କ ରହିବାକୁ ବିଶ୍ୱ ସ୍ୱାସ୍ଥ୍ୟ ସଙ୍ଗଠନ ପରାମର୍ଶ ଦେଇଛି ।
ସୂଚନାନୁସାରେ, ଦକ୍ଷିଣ ଆଫ୍ରିକାର ନବମ ପ୍ରୋଭିନ୍ସ ହେଉଛି ଗୌତେଙ୍ଗ୍ । ଏହାର ଜନସଂଖ୍ୟା ପ୍ରାୟ ଏକ କୋଟି ୨୫ ଲକ୍ଷ ହୋଇଥିବାବେଳେ, ବିଶ୍ୱର ଏକ ଜନବହୁଳ ଅଞ୍ଚଳ ଭାବେ ଏହା ପରିଚିତ । ଏହାକୁ ଲ୍ୟାଣ୍ଡ ଅଫ୍ ଗୋଲ୍ଡ ଭାବେ ମଧ୍ୟ ଅନେକ ଲୋକ ଜାଣିଥାନ୍ତି । ଏହାର ସୀମା ସୁନା ଖଣିକୁ ଲାଗିଥିବାବେଳେ, ବିଶ୍ୱର ଅନେକ ଧନୀଲୋକ ବ୍ୟବସାୟ ପାଇଁ ଏଠାକୁ ଆସିଥାନ୍ତି ।