କନକ ବ୍ୟୁରୋ : ଦକ୍ଷିଣ ଆଫ୍ରିକାରେ କରୋନାର ନୂଆ ଭ୍ୟାରିଆଣ୍ଟ ଚିହ୍ନଟ ହେବା ପୁଣିଥରେ ଚିନ୍ତା ବଢ଼ାଇଛି । ସବୁଠୁ ଉଦବେଗ ଜନକ କଥା ହେଉଛି ଭୂତାଣୁ ବହୁସଂଖ୍ୟାରେ ମ୍ୟୁଟେସନ କରିବା ପରେ ଏହି ନୂଆ ଭ୍ୟାରିଆଣ୍ଟ ସୃଷ୍ଟି ହୋଇଛି । ଦକ୍ଷିଣ ଆଫ୍ରିକାରେ ଚିହ୍ନଟ ହୋଇଥିବା ଏହି ନୂଆ ଭ୍ୟାରିଆଣ୍ଟର ନାଁ ହେଉଛି ବି-ୱାନ. ୱାନ-ଫାଇଭ-ଟୁ-ନାଇନ୍ । ଅସ୍ୱାଭାବିକ ଭାବେ ଅନେକ ମ୍ୟୁଟେସନ୍ ହୋଇ ଏହି ଭ୍ୟାରିଆଣ୍ଟ ସୃଷ୍ଟି ହୋଇଥିବାରୁ ସମସ୍ତଙ୍କ ଚିନ୍ତା ବଢ଼ିଯାଇଛି ।
Kanak News is now on WhatsApp
Join and get latest news updates delivered to you via WhatsApp
କରୋନାର ଏହି ନୂଆ ରୂପ ସାମ୍ନାକୁ ଆସିବା ପରେ ବିଶ୍ୱ ସ୍ୱାସ୍ଥ୍ୟ ସଂଗଠନର ଅଧିକାରୀମାନେ ଆଜି ବୈଠକ କରିଛନ୍ତି । ତେବେ ଏହା କେତେ ସଂକ୍ରମକ, ଏ ନେଇ ସବିଶେଷ ତଥ୍ୟ ମିଳି ପାରିନାହିଁ । ଦକ୍ଷିଣ ଆଫ୍ରିକାରେ ଗତ କିଛି ଦିନ ଧରି ହଠାତ୍ ନୂଆ ଆକ୍ରାନ୍ତଙ୍କ ସଂଖ୍ୟା ବଢ଼ିଯାଇଛି । ଗତ ୨୨ ତାରିଖରେ ୩୧୪ ଜଣ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ୨୪ ତାରିଖରେ ଦୈନିକ ସଂକ୍ରମଣ ୧୨୭୫ରେ ପହଞ୍ଚିଛି । କେଉଁ କାରଣରୁ ସଂକ୍ରମଣ ବଢ଼ୁଛି, ଏ ନେଇ ଅନୁଧ୍ୟାନ ଚାଲିଥିବା ବେଳେ ୨୨ ଜଣ ଆକ୍ରାନ୍ତଙ୍କ ଦେହରେ କରୋନାର ନୂଆ ଭ୍ୟାରିଆଣ୍ଟ ଚିହ୍ନଟ ହେବା ପରେ ଦକ୍ଷିଣ ଆଫ୍ରିକାରେ ପୁଣିଥରେ ମହାମାରୀ ଭୟ ବଢ଼ିଯାଇଛି ।