ଟି-୨୦ ବିଶ୍ୱକପ : ଆଫଗାନିସ୍ତାନକୁ ମାତ୍ ଦେଇ ଫାଇନାଲରେ ଦକ୍ଷିଣ ଆଫ୍ରିକା । ମାତ୍ର ୯ ଓଭରରେ ବିଜୟଲକ୍ଷ୍ୟ ହାସଲ କଲା ମାରକ୍ରମ ବାହିନୀ ।
କନକ ବ୍ୟୁରୋ : ଟି-୨୦ ବିଶ୍ୱକପର ଫାଇନାଲରେ ଦକ୍ଷିଣ ଆଫ୍ରିକା । ଆଫଗାନିସ୍ତାନକୁ ୯ ୱିକେଟରେ ମାତ୍ ଦେଇ ଫାଇନାଲ ଟିକେଟ ହାତେଇଛି ଦକ୍ଷିଣ ଆଫ୍ରିକା ।ଆଫଗାନିସ୍ତାନ ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିବା ବେଳେ ଏହା ଦଳ ପାଇଁ ବୁମେରାଂ ସାବ୍ୟସ୍ତ ହୋଇଥିଲା । ମାତ୍ର ୫୬ ରନରେ ଦଳ ଅଲଆଉଟ ହୋଇଥିଲା । ଆଫଗାନିସ୍ତାନର ଜଣେ ଖେଳାଳୀଙ୍କୁ ଛାଡିଦେଲେ କୌଣସି ଖେଳାଳୀ ୨ ଅଙ୍କ ସ୍କୋର କରିବାରେ ମଧ୍ୟ ସଫଳ ହୋଇନଥିଲେ । ଅନ୍ୟପଟେ ମାତ୍ର ୫୬ ରନର ବିଜୟ ଲକ୍ଷ୍ୟ ନେଇ ପଡିଆକୁ ଓହ୍ଲାଇଥିବା ଦକ୍ଷିଣ ଆଫ୍ରିକା ୧ ୱିକେଟ ହରାଇ ଟାର୍ଗେଟ ହାସଲ କରି ନେଇଥିଲା ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ଅଷ୍ଟ୍ରେଲିଆ, ବାଂଲାଦେଶ ଭଳି ଦଳକୁ ହରାଇ ସେମିଫାଇନାଲ ଟିକେଟ ହାତେଇଥିବା ଆଫଗାନିସ୍ତାନ ପୂର୍ବ ପ୍ରଦର୍ଶନ ଦୋହରାଇବାରେ ବିଫଳ ହୋଇଥିଲା । ଦକ୍ଷିଣ ଆଫ୍ରିକା ବିପକ୍ଷରେ ଆଫଗାନିସ୍ତାନ ଦମଦାର ପ୍ରଦର୍ଶନ କରିବ ବୋଲି କ୍ରିକେଟପ୍ରେମୀ ଆଶା ବାନ୍ଧି ବସିଥିବା ବେଳେ ଏହା ମାତ୍ର କେଇ ଘଣ୍ଟା ମଧ୍ୟରେ ମଉଳି ଯାଇଥିଲା । ଅନ୍ୟପଟେ ଆଫଗାନିସ୍ତାନ ବିପକ୍ଷରେ ବଡ ବିଜୟ ହାସଲ କରିଥିବା ଦକ୍ଷିଣ ଆଫ୍ରିକା ଦ୍ୱିତୀୟ ସେମିଫାଇନାଲର ବିଜେତାଙ୍କୁ ଫାଇନାଲରେ ଭେଟିବ । ଦ୍ୱିତୀୟ ସେମିଫାଇନାଲ ଭାରତ-ଇଂଲଣ୍ଡ ମଧ୍ୟରେ ଖେଳାଯିବାକୁ ଥିବା ବେଳେ ବିଜୟୀ ଟିମ୍ ଦକ୍ଷିଣ ଆଫ୍ରିକା ସହ ୨୯ ଜୁନରେ ଫାଇନାଲ ମୁକାବିଲା ଖେଳିବ ।