ଟିମ୍ ଇଣ୍ଡିଆର ପୂର୍ବତନ ଅଧିନାୟକ ସୌରଭ ଗାଙ୍ଗୁଲି ହେବେ ବିସିସିଆଇ ସଭାପତି । ଅମିତ ଶାହାଙ୍କ ପୁଅ ଜୟ ଶାଙ୍କୁ ମିଳିବ ସମ୍ପାଦକ ଦାୟିତ୍ୱ, ଆନୁଷ୍ଠାନିକ ଘୋଷଣା ବାକି ।
କନକ ବ୍ୟୁରୋ : ଭାରତୀୟ କ୍ରିକେଟ୍ ଦଳର ପୂର୍ବତନ ଅଧିନାୟକ ତଥା ବେଙ୍ଗଲ ଟାଇଗର ସୌରଭ ଗାଙ୍ଗୁଲି ହେବେ ବିସିସିଆଇର ପରବର୍ତ୍ତୀ ସଭାପତି । ଏଥିପାଇଁ ରାସ୍ତା ପରିସ୍କାର ହୋଇଥିବା ଜଣାପଡିଛି । ସେହିପରି କର୍ଣ୍ଣାଟକର ବ୍ରିଜେଶ ପଟେଲ ଆଇପିଏଲ ଗଭର୍ଣ୍ଣିଂ କାଉନସିଲର ଚେୟାରମ୍ୟାନ ରହିପାରନ୍ତି । ସମ୍ପାଦକ ଦାୟିତ୍ୱ ତୁଲାଇବେ ଅମିତ ଶାହାଙ୍କ ପୁଅ ଜୟ ଶାହା । ଅରୁଣ ସିଂହ ଠାକୁର ଟ୍ରେଜରର ରହିବେ । ତେବେ କିଛି ଦିନ ମଧ୍ୟରେ ଏନେଇ ଆନୁଷ୍ଠାନିକ ଘୋଷଣା ହୋଇପାରେ ।
Kanak News is now on WhatsApp
Join and get latest news updates delivered to you via WhatsApp
ଭାରତର ଅନ୍ୟତମ ସଫଳ କ୍ରିକେଟ ଅଧିନାୟକ ଭାବେ ପରିଚିତ ୪୭ ବର୍ଷୀୟ ଗାଙ୍ଗୁଲି ବେଙ୍ଗଲ କ୍ରିକେଟ ସଂଘର ସଭାପତି ଅଛନ୍ତି । ସେଥିପାଇଁ ମାତ୍ର ୧୦ ମାସ ପର୍ଯ୍ୟନ୍ତ ବିସିସିଆଇର ସଭାପତି ପଦରେ ସେ ରହିପାରିବେ । ସଭାପତି ପଦ ଦୌଡରେ ପୂର୍ବତନ କ୍ରିକେଟର ବ୍ରିଜେଶ ପଟେଲ ମଧ୍ୟ ଥିଲେ । ବିସିସିଆଇର ପୂର୍ବତନ ସଭାପତି ଏନ ଶ୍ରୀନିବାସନଙ୍କ ସହଯୋଗରେ ସେ ଗତ ୨ସପ୍ତାହ ହେବ ସମର୍ଥନ ଯୋଗାଡରେ ଲାଗି ପଡିଥିଲେ । ହେଲେ ଅଧିକାଂଶ ସଦସ୍ୟ ତାଙ୍କ ପ୍ରାର୍ଥୀତ୍ୱକୁ ବିରୋଧ କରିଥିଲେ । ଅନ୍ୟପକ୍ଷରେ ଗାଙ୍ଗୁଲିଙ୍କୁ ପୂର୍ବାଂଚଳ ସହ ଦୁଇ ତୃତୀୟାଂଶରୁ ଅଧିକ ସଦସ୍ୟ ସମର୍ଥନ କରିଥିଲେ । ବ୍ରିଜେଶ ଶେଷ ଯାଏଁ ମୁଖ୍ୟ ଦାବେଦାର ଥିଲେ । ଶେଷରେ କିନ୍ତୁ ଗାଙ୍ଗୁଲି ବାଜି ମାରିନେଲେ । ତେବେ ବ୍ରିଜେଶଙ୍କୁ ଖୁସି କରିବା ଲାଗି ତାଙ୍କୁ ଆଇପିଏଲ ଅଧ୍ୟକ୍ଷ ପଦ ଦିଆଯାଇପାରେ ।